Read MUKANDA WANZAMBI Joani 19 Bible Online

Joani 19 - MUKANDA WANZAMBI bible

Joani 19

¹Pilatu hakumukwata Yesu, hakumuvupola nachikoti.

²Mashidika hiyakuyinda chibaaba chanyimbambaŋoma, hiyakumuvwikachu kunamutu, amuvwika niihina dawusombu.

³Hiyakuya kudi yena, hiyakumwila nawu, Eyi Mwanta wawaYudeya, kalombu! Hiyakumweta namakasawu.

⁴Pilatu hakwidika cheŋi, hakuyila nindi, Talenu, hinukuyiidishilayi kulonda mwiluki nenu ami hinamumoni nachitelaku.

⁵Dichi Yesu hakwidika, navwali chibaaba chanyimbambaŋoma ninodu ihina dawusombu. Pilatu hakuyila nindi, Talenu iwu muntu!

⁶Dichi awakulumpi jawatupristu niatulama chanamumonuwu, hiyakubidika nawu, Mupopelenu kukulusu, mupopenu! Pilatu hakuyila nindi, Mutambulenu enu aweni, mumupopeli kukulusu; ami kwami hinamumoni nachitelaku.

⁷AYudeya hiyakumwakula nawu, Etu tukweti lushimbi, lushimbi olu lwelaŋa nawu nateli kufwa, muloŋa waditeneni nindi, ni mwana kaNzambi.

⁸Dichi Pilatu chanatiyiyi mazu awa, yotiya niwoma wasweja.

⁹Hakwijila mwitala dakusompela, hakumwihula Yesu nindi, Eyi wafuma kudihi? Yesu kumwakula nehi.

¹⁰Dichi Pilatu hakumwila nindi, Eyi kuhosha nanami nehi? Eyi kwiluka neyi ami ni kweti Ŋovu jakukuumbaku, ni kweti niŋovu jakukupopela kukulusu, nehi?

¹¹Yesu hakumwakula nindi, Neyi abula kukwinka Ŋovu jakufuma mwiwulu, mutenowu wunakaŋanyi kuŋila chuma. Dichi iwu nanhani kudeyi wukweti muloŋa wakubadika.

¹²Henohu Pilatu hakukeŋa nindi amuumbuku. Ilaŋa Yudeya hiyakubidika nawu, Neyi wukumuumbaku yeniwu, hiwukwikala ibwambu daKesaruku; muntu waditenaŋa nindi nimwanta, halemeshaŋa Kesaruku.

¹³Dichi Pilatu chanatiyiyi mazu awa, hakumwidisha Yesu, hakushakama hetanda dakusompela kwatenaŋawu nawu, Kuchisesa chamalola; muHeberu nawu, KuGabata.

¹⁴Denodu dadiŋi ifuku dakuloŋesha paseka; hadiŋi neyi kwiji ora yamuchitanu nayimu. Hakuyila aYudeya nindi, Talenu Mwanta wenu!

¹⁵Wena hiyakubidika nawu, Waadi! Waadi! Mupopelenu kukulusu! Pilatu hakuyila nindi, Nipopeli Mwanta wenu kukulusu? Akulumpi jawatupristu hiyakumwakula nawu, Mwanta wetu Kesari hohu; hitukweti mwanta wacheŋuku.

¹⁶Dichi hakumuhana kudi wena kulonda amupopeli kukulusu.

¹⁷Dichi hiyakumukwata Yesu, hiyakumutwala. Yena hakwidika, iku nadisendeli kulusu yindi, hakuya kwatenaŋawu nawu, Kuchaŋu; muHeberu nawu, Kugologota.

¹⁸Hiyakumupopela kukulusu kwenoku, hamu nawakwawu ayedi, wumu hambadi, wumu hambadi, Yesu mukachi.

¹⁹Pilatu hakusoneka ninsaŋu nawa, hakuyisha hakulusu. Asonekeluhu nawu, Yesu wakuNazareta, Mwanta wawaYudeya.

²⁰Dichi nsaŋu iyi ayitaŋili kudi aYudeya amavulu; muloŋa oku kwamupopeleluwu Yesu kukulusu kwadiŋi kwakwihi naŋanda; ayisonekeli mwidimi dawaHeberu, nimwidimi dawaRoma, nimwidimi dawaHeleni.

²¹Dichi awakulumpi jawatupristu niaYudeya hiyakumwila Pilatu nawu, Bayi wusoneka neyi, Mwanta wawaYudeyaku; chiŋa neyi, Yena waditeneni nindi, Ami niMwanta wawaYudeya.

²²Pilatu hakwakula nindi, Mwonsu munasoneki mwomu.

²³Mashidika chanamupopeluwu Yesu kukulusu, hiyakunona yuma yindi yakuvwala, hiyakwambula muwana, mashidika ejima hiyakuwanina iwu nachibalu chindi, iwu nachibalu chindi. Ilaŋa mupila windi wadiŋi wakutuŋa kufumisha kwiwulu, wejima wakadi muchiminu.

²⁴Dichi hiyakudila wumu namukwawu nawu, Bayi tuwutabulaku, tuditondeli nachinjikijilu chakusakula nachu, tumoni muntu wukuwutambula; kulonda nyikanda yajila yilumbuluki, yasonekeluwu nawu, Yuma yami yakuvwala anadipaŋili mukachi kawu, mupila wami hiyakusakula nachinjikijilu chakusakula nachu. Dihu hafumini mashidika kwila yumiyi.

²⁵Kwakwihi nakulusu yaYesu kwemeni mama yindi namana kwamama yindi wamumbanda, Mariya iŋoda Kiŋasi naMariya Mandaleni.

²⁶Dichi Yesu chanamoniyi mama yindi nikambanji kindi akeŋeliyi anemani hamu kwakwihi, hakumwila mama yindi nindi, Eyi mumbanda, talaku mwaneyi owu.

²⁷Hakumwila owu kambanji kindi nindi, Talaku mama yeyi owu. Kufumisha kumpinji oyu, owu kambanji hakumutwala kwiindi.

²⁸Kulondela henohu, Yesu chanelukiyi nindi yuma yejima yinamani dehi, hakwila nindi, Natiyi mpwila; kulonda nyikanda yajila yilumbuluki.

²⁹Kwenoku kwadiŋi nsaba yakutenteka, yenzala walwa wabatuka; hiyakunona siponja yenzala walwowu wabatuka, hiyakusha kuchiputa chahisopi hiyakumushayi kukanwa.

³⁰Dichi Yesu chanatambuliyi owu walwa wabatuka, hakwila nindi, Chinamani. Yonoŋeka ninamutu windi, yotula niwumi windi.

³¹Chidadiŋi ifuku dakuloŋesha paseka, aYudeya hiyakeŋeli nyijimba yishali hamakulusu hasabatoyuku, muloŋa yenoyu sabata yadiŋi yalema, hiyakumulomba Pilatu nawu ayiteji kukotola nyendu yawu, ayifumishuku.

³²Dichi mashidika hiyakwinza, hiyakukotola nyendu yanowu wakusambila, niyamukwawu apopeleluwu kumakulusu hamu nindi.

³³Ilaŋa chanashikuwu hadi Yesu, kumumona nafwi dehi, hiyamukotweh nyenduku;

³⁴Ilaŋa ishidika wumu hakumupwika iyoŋa kukabavu, henohu hikukwidika nimashi nimeji.

³⁵Owu wamweni yumiyi nekali chinsahu, niwunsahu windi walala, yena neluki nindi nahoshi mwalala, kulonda ninenu nawa mwitiyi.

³⁶Yumiyi ayilili kulonda nyikanda yajila yilumbuluki, yeliluwu nawu, Hiyakakotola hoku ifwaha dindi nidimuku.

³⁷Nicheŋi mukanda wajila wukwawu nawu, Akatala hadi yena apwikiluwu.

³⁸Kulondela hayumiyi Yosefu wakuAramateya, wadiŋi kambanji kaYesu, ilaŋa chakujinda nawoma wawaYudeya, hakumulomba Pilatu amwiteji kufumisha mujimba waYesu. Pilatu hakmnwiteja. Dichi hakwinza, hakufumisha mujimba windi.

³⁹Hikukwinza nawa niNikodemu, owu wenjili hatachi kudi Yesu nawufuku. Hakuleta yitumbu yakubomba nimora nialowe, pezu yayu yashika neyi jipawundi nkulakaji.[1]

⁴⁰Hiyakunona mujimba waYesu, hiyakuwujiŋajiŋa mtunahina atooka hamu nanyitondu yamavumba amawahi, mwomuchaaku chajiikaŋawu nachu aYudeya.

⁴¹Oku kwamupopeleluwu kukulusu kwadiŋi itempa; omu mwitempa mwadiŋi ŋamu dadiha kanda akamikaŋamu dehi muntuku.

⁴²Ochu chadiŋi ŋamu kwakwihi, hiyakumukamikamu, Muloŋa wefuku dawaYudeya dakulopesha paseka.