Read MUKANDA WANZAMBI Joani 2 Bible Online

Joani 2 - MUKANDA WANZAMBI bible

Joani 2

¹Hefuku damu chisatu, kuKana wamuŊaliliya kwadiŋi antu akudisumbula; mama yaYesu wadiŋi kwoku.

²Hiyakutambika Yesu niatumbanji twindi enzi kwakudisumbulawu,

³Chelili vinyu yinamani dehi, mama yaYesu hakumwila nindi, Hiyakweti vinyuku.

⁴Yesu hakumwila nindi, Eyi mumbanda, hinsaŋu yetuku. Mpinji yami kanda yishiki.

⁵Mama yindi hakuyila atuluŋwiji nindi, Mwonsu mwakuyilejayi, ilenu.

⁶Henohu hadiŋi nsaba jamalola jitanu nayimu jakutenteka dehi, jadiŋi jakudiŋilika nachu aYudeya; munsaba mwayaloŋa nswaha jiyedi indi kwiji jisatu.

⁷Yesu hakuyila nindi, Inzeshenu nsaba nameji. Hiyakujinzesha to-o, nikunyivumbu.

⁸Hakuyila nindi, Huŋununenu dinu, mumutwe U mwini mawŋa. Hiyakutwala.

⁹Mwini mawŋa chanatompiyi meji anabalumuki dehi vinyu, helukili kuyinafumuku, atuluŋwiji atahili meji diwu elukili. Owu mwini mawŋa hakutambika nsumbuli,

¹⁰hakumwila nindi, Antu ejima asambilaŋa kwidisha vinyu yayiwahi; neyi antu ananwi dehi yayivulu, aletaŋa yatama. Ilaŋa eyi wunasweki vinyu yayiwahi nihanu.

¹¹Dichi chinjikijilu chakutachika cheliliyi Yesu kuKana wamuŊaliliya, hakumwekesha kulema kwindi, atumbanji twindi hiyakumwitiya.

¹²Chaneliyi yumiyi, yena namama yindi niatumbanji twindi hamu, hiyakuya kuKaperinawu; ashakama nikwenoku mafuku antesha hohu.

¹³Paseka yawaYudeya hiyikushika kwakwihi, Yesu hakukanduka kuYerusalema.

¹⁴Hakuwana mutembeli antu adi nakulandisha aŋombi ninyikoku nitupompa; akwakuhimpa mali anashakami.

¹⁵Hakushinta chikoti chanfuŋa, hakuyihaŋa wejima wawu mutembeli, hamu nanyikoku ni aŋombi; hakumwaŋa mali awakwakuhimpa, hakuhinuna nijimesa jawu.

¹⁶Hakuyila adiŋi nakulandisha tupompa nindi, Yumiyi yifumishenu munu; bayi mubalumuna itala daTata yami diikali itala dakulandilaku.

¹⁷Atumbanji twindi hiyakwanuka chasonekeluwu nawu, Iyena detala deyi dikuŋudya kumuchima.

¹⁸Dichi aYudeya hiyakumwakula nawu, Tuleji chinjikijilu chakwiluka nachu hanafumi Ŋovu jeyi jakwila yumiyi.

¹⁹Yesu hakwakula nindi, Sandenu tembeli iyi, mafuku asatu nakayituŋulula cheŋi.

²⁰Dichi aYudeya nawu, Tembeli iyi yakutuŋa nyaka makumi awana nanyaka yitanu nawumu, eyi wuyituŋululi mafuku asatu?

²¹Ilaŋa yena wadiŋi nakutena tembeli yamujimba windi.

²²Dichi chamusaŋwiluwu mudi afu, atumbanji twindi hiyakwanuka mwahosheliyi, hiyakwitiya nyikanda yajila, nimwahosheliyi Yesu.

²³Hadiŋiyi muYerusalema kuchawija chapaseka, antu amavulu hiyakwitiya ijina dindi chamwenuwu yinjikijilu yeliliyi.

²⁴Ilaŋa Yesu hayikuhweleleluku, muloŋa yena wadiŋi weluka chekalawu antu ejima.

²⁵Muloŋa yena hakeŋeli wakumuleja chekalawu antuku, yomwenindi diyi welukili yekala mudi antu.