Read MUKANDA WANZAMBI Joani 21 Bible Online

Joani 21 - MUKANDA WANZAMBI bible

Joani 21

¹Kulondela hayumiyi, Yesu hakudimwekesha cheŋi kudi atumbanji kwijiya daTiberasi. Tiyenu mwadimwekesheleliyi.

²Adiŋi hamu niShimona Petulu, niTomasi atenaŋawu nawu Mpamba, niNataneli wakuKana wamuŊaliliya, nianyana kaZebedewu, niatumbanji twindi amakwawu ayedi.

³Shimona Petulu hakuyila nindi, Nukuya nakuta anshi. Hiya kumwila nawu, Ninetu tukuya neyi. Hiyakuya hiyakwijila muwatu; wena wufuku owu kukwata hela nikanti nehi.

⁴Chikunatachiki kucha, Yesu hakwimana hachi kumu, ilaŋa atumbanji kwiluka nawu diyi Yesu nehi.

⁵Dichi Yesu hakuyihula nindi, Anyikenu, mukweti yakudya? Hiyakumwakula nawu, Nehi.

⁶Yena hakuyila nindi, Lalu mwinenu wanda kumbavu yawatu yakuchidiilu, mukujimona. Dichi hiyakulalumuna. Akaŋanya nikuwukoka nawanshi kuvula.

⁷Dichi kambanji owu akeŋeluwu kudi Yesu hakumwila Petulu nindi, Diyi Mwanta. Shimona Petulu chanatiyiyi nawu diyi Mwanta, hakudikumbakesha chi kovwelu chindi, muloŋa wadiŋi nzekesi, hakudumbila mwijiya.

⁸Ilaŋa tumbanji amakwawu hiyakwinza mukawatu kanyanya nakukoka wanda wanshi; muloŋa hiyadiŋi kwakulehi nachikumuku, adiŋi neyi kwiji nkulakaji yayintampu yanyendu.

⁹Chanakandukuwu kumpata, hiyakumona kwenoku kesi kamakala, anashuhu inshi, nimankendi.

¹⁰Yesu hakuyila nindi, Letenuhu anshi ŋamu nakwati.

¹¹Dichi Shimona Petulu hakuyaku, hakukokela wanda hachi kumu, wa-to nanshi jamaneni, nkulakaji namakumi atanu nanshi jisatu; hela jadiŋi jajivulu chochochu, wanda kutabuka nehi.

¹²Yesu hakuyila nindi, Inzenu mudawuli. Atumbanji ejima adiŋi nawoma wakumwihula nawu, Yeyinyi? muloŋa elukili nawu diyi Mwanta.

¹³Yesu hakwinza, hakunona mankendi, hakuyinka ninshi kumu.

¹⁴Didu ipampa damu chisatu dadimwekesheliyi Yesu kudi atumbanji, kufumisha hasaŋukiliyi mudi afu.

¹⁵Chanadawuluwu, Yesu hakumwihula Shimona Petulu nindi, Eyi Shimona mwana kaYowanu, wankeŋa chakubadikawa? Yena hakumwakula nindi, Eŋa Mwanta, eyi weluka chinakukunda. Yena hakumwila nindi, Diishaŋa twanami twanyikoku.

¹⁶Hakumwihula cheŋi kamuchiyedi nindi, Eyi Shimona mwana kaYowanu, wankeŋa? Hakumwakula nindi, Eŋa Mwanta, eyi weluka chinakukunda. Hakumwila nindi, Biŋaŋa anyikoku jami.

¹⁷Hakumwihula kamuchisatu nindi, Eyi Shimona mwana kaYowanu, wankunda? Petulu hakutiya chikela chanamwihuliyi Mwanta ipampa damu chisatu nindi, Wankunda? Hakumwila nindi, Mwanta, eyi weluka yuma yejima, eyi weluka chinakukunda. Yesu hakumwila nindi, Diishaŋa nyikoku jami.

¹⁸Chalala chalala, nukukuleja nami, chiwadiŋi kansi wadivwikilaŋa eyi aweni, wadiŋi nakuya kwonsu kuwunakeŋi kwoku. Ilaŋa chiwamba kekala kashinakaji, wamba kolola makaseyi, amba kakuvwika kudi wacheŋi, amba kakutwala kuwakabula kukeŋa.

¹⁹Chahosheliyi mwenomu, walondeli kushimuna nachu kufwa kwamba kalemeshayi nachu Nzambi. Chanamanishiyi kuhosha mwenimu, hakumwila nindi, Nlondaŋa.

²⁰Petulu hakushetumuka, hakumona kambanji akeŋeluwu kudi Yesu, wudi nakulondela; yowu waKundameneni hebwambu dindi hadiililuwu, wehwili nindi, Mwanta, wukukufukeja hinyi?

²¹Dichi Petulu chanamumoniyi, hakumwihula Yesu nindi, Mwanta, indi yeniwu niyena wukwiladi?

²²Yesu hakumwila nindi, Neyi nakeŋi nami yena akashaluhu nichinakenza, hinsaŋu yeyi? Eyi kumina dakunlondami.

²³Dihu hafuma nikuhoshahosha ana kwawu nawu owu kambanji hamba kafwaku. Hakwila Yesu hamwilili nindi, Wakabula kufwaku; wamwilili nindi, Neyi nakeŋi nami yena akashaluhu nichinakenza, hinsaŋu yeyi?

²⁴Diyi iwu kambanji nashimuni wunsahu wayumiyi, nasoneki yumiyi; etu tweluka netu mwanashimuniyi mwalala.

²⁵Kudi niyuma yayivulu yi kwawu yehiliyi Yesu, yenoyu nayitoŋojoki nami neyi ayisoneka yejima, mpata yamunu mwishina hiyadi kumona hakutenteka nyikanda yadi kusonekawuku.