Read MUKANDA WANZAMBI Joani 3 Bible Online

Joani 3 - MUKANDA WANZAMBI bible

Joani 3

¹Kwadiŋi iyala wumu, kaFwarisi, nyuli yawaYudeya, ijina dindi Nikodemu.

²Yeniwu wayili kudi yena nawufuku, hakumwila nindi, Eyi Rabi, etu tuneluki netu eyi wunkuluŋaŋa wafuma kudi Nzambi; muloŋa yinjikijilu iyi yiwelaŋaeyi kwosi muntu niwumu wukutwesha kuyila, chiŋa wekala naNzambi.

³Yesu hakumwakula nindi, Chalala chalala, nukukuleja nami, muntu kutwesha kumona wanta waNzambi chiŋa avwalika chachiha.

⁴Nikodemu hakumwila nindi, Muntu wakula dehi wukutwesha kuvwalika ŋahi? Wukutwesha kwijila mwivumu damama yindi kamuchiyedi avwaliki cheŋi, tahindi?

⁵Yesu hakwakula nindi, Chalala chalala, nukukuleja nami, muntu kutwesha kwijila muwanta waNzambi, chiŋa avwalika nikumeji nikudi Spiritu.

⁶Chavwalikaŋa kumujimba himujimba; chavwalikaŋa kudi Spiritu hispiritu.

⁷Bayi wuhayama chinakwili nami chiŋa muvwalika chachihaku.

⁸Mpepela yakunkaŋa kwokuyinakeŋi kuya kwoku, eyi watiyaloŋa chiyikuvuma, ilaŋa kwiluka kuyikufuma, hela kuyikuya nehi, dichi chaduwu ejima akuvwali ka kudi Spiritu.

⁹Nikodemu hakumwihula nindi, Yumiyi yikutwesheka ŋahi?

¹⁰Yesu hakumwakula nindi, Eyi yeyi nkuluŋaŋa yawaIsarela, wubuli kushinshika mwalumbulukila yumiyi?

¹¹Chalala chalala, nukukuleja nami, twahoshaŋa yitweluka, twashimunaŋa wunsahu wayuma yakumona namesu, enu kwitiya mutwashimunaŋa nehi.

¹²Chinayileji yuma yahamaseki enu kwitiya nehi, indi chinukuyileja yuma yamwiwulu mukwitiya ŋahi?

¹³Hikudi muntu wakandamahu dehi mwiwuluku, chiŋa yowu wasulukili mwiwulu, diyi Mwana kamuntu wekala mwiwulu.

¹⁴Chanyamwiniyi Mosi kapela hewulu mwisaŋa, dichi chakanyamunawu ni mwana kamuntu hewulu;

¹⁵kulonda muntu wukwitiya chakukuhwelela amoni mudi yena wumi wahaya nyaka.

¹⁶Chaswejeliyi Nzambi kukeŋa mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoŋa.

¹⁷Chatemesheliyi Nzambi Mwanindi mumpata yamunu mwishina, halondeli kusompesha antu ampata yamunu mwishinaku, walondeli nindi antu amunu mwishina ahandili mudi yena.

¹⁸Muntu wukumukuhwelela hakufwa namuloŋaku; muntu wukubula kumukuhwelela nafwi nachu, muloŋa naleli kukuhwelela ijina daMwana kaNzambi wumu hohu.

¹⁹Kufwa namuloŋa kunafumi hakwila chejeji chenjili dehi mumpata yamunu mwishina, ilaŋa antu hiyakeŋeli chejejuku, akeŋeli mwidima muloŋa nyidimu yawu yatama.

²⁰Muloŋa antu ejima akoŋaŋa yatama ahelaŋa chejeji, hiyenzaŋa kuchejejuku kuchina nyidimu yawu kuyikonkolola.

²¹Ilaŋa muntu wakoŋaŋa yalala wenzaŋa kuchejeji kulonda nyidimu yindi akayimwekeshi nawu anayikoŋi mudi Nzambi.

²²Kulondela hayumiyi Yesu niatumbanji twindi hiyakuya mwituŋa daYudeya; hakulaba nawu kwenoku nakupapatisha.

²³Yowanu niyena wadiŋi nakupapatisha kuEnoni kwakwihi naSalimi, muloŋa kwadiŋi meji amavulu. Antu hiyakwinza akayipapatishi.

²⁴Henohu Yowanu wuchidi kanda amushi mukaleyaku.

²⁵Dichi hasaŋumukili ntadi hadi atumbanji twaYowanu nakaYudeya wumu hansaŋu yakuditookesha.

²⁶Wena hiyakwinza kudi Yowanu nakumwila nawu, Eyi Rabi, ona wadiŋi naneyi kwishinadi daYodana, iwashimwineyi wunsahu, tiya dinu, niyena hakupapatisha, antu ejima hiyakuya kudi yena.

²⁷Yowanu hakwakula nindi, Muntu kutwesha kutambula chuma, chiŋa anamwinkichu kwiwulu.

²⁸Enu aweni mukunshimwina wunsahu chinahoshelaŋa nami ami hiniKristuku, nami anantemeshaŋahu dehi kumbidi.

²⁹Muntu wukweti mumbanda diyi nsumbuli; ilaŋa ibwambu dansumbuli, chakwimanayi nakumutiya, wazaŋalalaŋa nankashi chakutiyayi izu dansumbuli. Dichi iwu muzaŋalu wami wunawanini dehi.

³⁰Chiŋa yena atohi, ami nikehi.

³¹Wafuma mwiwulu wabadika ejima; wahamaseki hiwahamaseki kwindi, watenaŋa yahamaseki. Wafuma mwiwulu wabadika ejima;

³²washimunaŋa mwanamoniyi nimwanatiyiyi; ilaŋa kwosi muntu wetiyaloŋa mwashimunaŋayuku.

³³Muntu netiyi mwakushimunayi, nashuku mufunda wakwila nindi, Nzambi walala.

³⁴Muloŋa iwu atemesheluwu kudi Nzambi wahoshaŋa mazu aNzambi, muloŋa hahanaŋa Spiritu nakwesekelaku.

³⁵Tata wakeŋa a Mwana, nenki yuma yejima muchikasa chindi.

³⁶Muntu wukukuhwelela Mwana wukweti wumi wahaya nyaka; hakwila muntu wabulaŋa kwovwahila Mwana hakamona wumuku, kuzuwa kwaNzambi kwashakama hadi yena.