Read MUKANDA WANZAMBI Joani 4 Bible Online

Joani 4 - MUKANDA WANZAMBI bible

Joani 4

¹Dichi Mwanta chelukiliyi nindi aFwarisi anatiyi dehi nawu Yesu hakutambika atumbanji amavulu akubadika aYowanu, hakuyipapatisha;

²ilaŋa yomweni Yesu hidiyi wapapatishiluku, atumbanji twindi diwu apapatishilaŋa;

³yena hakufuma muYudeya, ayi cheŋi muŊaliliya.

⁴Chiŋa yohita muSamariya.

⁵Hakuya kumukala wamuSamariya ijina dawu Sika, kwakwihi nakapata kenkeliyi Yakoba mwanindi Yosefu.

⁶Ishima daYakoba dadiŋi kwenoku. Dichi Yesu, nazeyi dehi nanjila yanendiyi, hakushakama chochina kwishima. Kuneli dehi neyi ora yamuchitanu nayimu.

⁷Mumbanda wamuSamariya hakwinza nakutaha meji. Yesu hakumwila nindi, Anyinkuhu meji ninwi.

⁸Muloŋatumbanji twindi aya dehi kumukala nakulanda yakudya.

⁹Dichi owu kaSamariya wamumbanda hakumwila nindi, Eyi wukaYudeya, ami nikaSamariya, indi ami wunanlombelidi meji? Muloŋa Yudeya hiyakundaŋana nawaSamariyaku.

¹⁰Yesu hakumwakula nindi, Neyi weluka chamukunkulu chaNzambi, ninowu nakwili nindi nyinkuhu meji ninwi, mutenowu yeyi wadi kumulomba yena, wadi kukwinka meji amomi.

¹¹Mumbanda hakumwila nindi, Mwanta, eyi hiwukweti chakutaha nachuku, niishima dakunama; indi owu meji amomi wunayiwani kudihi?

¹²Yeyi wabadika tata yetu Yakoba, watwinkeli idi ishima, wanwinumu niyomweni, ni anyanindi, niyimuna yindi, tahindi?

¹³Yesu hakumwakula nindi, Antu ejima akunwa meji awa akutiya cheŋi mpwila;

¹⁴ilaŋa muntu wukunwa meji nukuinwinkami, hakatiya cheŋi mpwilaku, ilaŋa meji nukumwinkami akwikala mudi yena kaseloki kameji kakusefukila kuwumi wahaya nyaka.

¹⁵Mumbanda hakumwila nindi, Mwanta, nyinki meji owu, kulonda nibuli kutiya mpwila, nakabuli kwinzaŋa kwejima kunu nakutaha.

¹⁶Yesu hakumwila nindi, Yaku katambiki nfumweyi, winzi cheŋi kunu.

¹⁷Mumbanda hakumwakula nindi, Hinikweti nfumwamuku. Yesu hakumwila nindi, Chiwuneli neyi hinikweti nfumwamuku, wunahoshi chalala.

¹⁸Muloŋa wadiŋi nawanfumu jeyi atanu, niniwu wudi nindi katataka hinfumweyuku, ochu chiwunahoshi chalala.

¹⁹Mumbanda liakumwila nindi, Mwanta, nakushinshiki dehi, komana wukaprofwetu.

²⁰Ankakulula jetu adifukwilaŋa kudi Nzambi kumpidi iyi; hakwila enu nenu muYerusalema dimu mwawahila kudifukula kudi Nzambi.

²¹Yesu hakumwila nindi, Eyi mumbanda, ŋitiyi chinukukuleja, nami kukwinza mpinji yakabula kudifukulawu antu kudi Tata kumpidi iyi, hela muYerusalema.

²²Chuma chimwadifukulaŋa himwachilukaku; etu tweluka chitwadifukulaŋa; muloŋa wamwinu wafuma kudi aYudeya.

²³Ilaŋa mpinji yikwinza, eŋa yashika dehi, yenoyu akwakudifukula alala akadifukula kudi Tata chalala muspiritu; muloŋa diwu akukeŋayi Tata ekali akwakudifukula kudi yena.

²⁴Nzambi hiSpiritu; akudifukula kudi yena chiŋa adifukulaŋa chalala muspiritu.

²⁵Mumbanda hakumwila nindi, Neluki nami Mesiya, diyi atenawu nawu Kristu, wakenza; chakenzayi wakatuleja yuma yejima.

²⁶Yesu hakumwila nindi, Diyi ami nidi nakuhosha naneyi.

²⁷Henohu atumbanji twindi ashika nikushika; hiyakuhayama chadi nakuhoshayi namumbanda; hela chochu, kwosi wamwihwili nindi, Wunakepidi? indi kwiji nindi, Wudi nakuhosheladi nayena?

²⁸Mumbanda ashiya ninsaba yindi, hakuya kumukala, hakuyila amayala,

²⁹nindi, Inzenu mutali iyala nanleji yuma yinakoŋeli yejima; yeniwu hidiyi Kristuku, tahindi?

³⁰Wena hiyakufuma mumukala, hiyakwinza kudi yena.

³¹Mwejimomu atumbanji twindi adi nakumulembelela nawu, Eyi Rabi, dyaloŋa.

³²Yena hakuyila nindi, Ni kweti yakudya yimwabula kwilukenu.

³³Dichi atumbanji hiyakudihujola nawu, Hadi muntu namuleteli yakudya, tahindi?

³⁴Yesu hakuyila nindi, Kudya kwami yowu kwila muchima wayena wantemesheli, nakamanishi mudimu windi.

³⁵Enu mwelaŋa nenu kunashali tukweji tuwana hikwakenza chilaaka chakumuna. Talenu, nukuyileja nami, fumbulenu mesu mutali mumaha, chimwatookashana dehi to-o, ashika dehi hakumuna.

³⁶Wamunaŋa watambulaŋa wufwetu, wapompeshelaŋa mbutu yakutwala kuwumi wahaya nyaka; kulonda niwakuwaŋa niwamunaŋa akazaŋaleli hamu.

³⁷Dimu munalumbulukili chishimu chelaŋawu nawu, Wumu wakuwaŋa, wacheŋi wamunaŋa.

³⁸Ami nayitemesheli nakumuna kumwabulili kukalakala; kwakalakeli acheŋi, enu munadiili kunyidimu yawu.

³⁹ASamariya amavulu amumukalowu amwitiyili nezu danowu mumbanda washimwini nindi, Nanleji yuma yinakoŋeli yejima.

⁴⁰Dichi chenjiluwu aSamariya kudi yena, hiyakumulembelela nawu akamuku mafuku. Hakujiŋilaku mafuku ayedi.

⁴¹Amakwawu amavulu hiyakwitiya namazu ahosheliyi yomwenindi.

⁴²Hiyakumwila owu mumbanda nawu, Ichi tunetiyi, hichinafumi hakutuleja kudeyuku, tunamutiyi etu aweni; tuneluki netu chalala diyi Chamwinu champata yamunu mwishina.

⁴³Wenowu mafuku ayedi chanahituwu, hakufuma kwenoku hakuya muŊaliliya.

⁴⁴Muloŋa yomweni Yesu washimuna dehi nindi, Kaprofwetu hiyamulemeshaŋa mwituŋa dindi yomwenuku.

⁴⁵Dichi chayiliyi muŊaliliya, aŊaliliya hiyakumutambula chachiwahi, amona dehi yuma yejima yeliliyi kuYerusalema kuchawija; muloŋa niwena nawa ayili kuchawija.

⁴⁶Dichi hakufunta cheŋi kuKana wamuŊaliliya, oku kwabalumwiniyi meji ekali vinyu. KuKaperinawu kwadiŋi kalama kamwanta, wadiŋi namwanindi weyala wakata.

⁴⁷Chatiyiliyi nawu Yesu wafuma dehi muYudeya, nenzi muŊaliliya hakuya kudi yena, hakumulembelela nindi akunkumuki akoki mwanindi, muloŋa hakukeŋa kufwa.

⁴⁸Dichi Yesu hakumwila mindi, chiŋa mumona yinjikijilu niyihayamisha, neyi nehi himukwitiyaku.

⁴⁹Kalama hakumwila nindi, Mwanta kunkumukaku hohanu hachidiyi mwanami kanda afwi.

⁵⁰Yesu hakumwila nindi, Diyilaŋa kweyi, mwaneyi nahandi dehi. Owu iyala hakwitiya mazu ahosheliyi Yesu, hakudiyila kwindi.

⁵¹Chadiŋi nakukunkumukayi, anduŋu jindi hiyakumukinkilila nawu, Mwaneyi wahanda dehi.

⁵²Hakuyihula mpinji yatachikayi kukola. Hiyakumuleja nawu, Haloshi ora yamuchitanu nachiyedi dihu hamufuma chishi ka.

⁵³Dichi tata yindi hakwiluka nindi komana yoyu ora yamulejayi Yesu nindi, Mwaneyi nahandi dehi. Yomweni hakwitiya niakwetala dindi ejima.

⁵⁴Dichi chinjikijilu chamuchiyedi cheliliyi Yesu hafuminiyi muYudeya, hayiliyi muŊaliliya.