Read MUKANDA WANZAMBI Joani 5 Bible Online

Joani 5 - MUKANDA WANZAMBI bible

Joani 5

¹Kulondela hayumiyi, kwadiŋi chawija chawaYudeya; Yesu hakukanduka kuYerusalema.

²MuYerusalema, kuchisu chanyikoku, kwekala ŋiya ijina dadu mwidimi daHeberu nawu Beteseda, dikweti makeki atanu.

³Mwenomu mwakaminaŋa izaza dawantu akata, niamputamesu, niayifwayi, niakwakalepa, hiyakuchiŋililaŋa hakuvundulawu meji;

⁴muloŋa kaŋelu wasulukilaŋa nakuvundula meji; hakuvundulawu meji, muntu wukusambilaŋahu dehi kudatamu hakukola kumusoŋu windi ngu.

⁵Kwenoku kwadiŋi iyala wumu wakata dehi nyaka makumi asatu nanyaka yitanu nayisatu.

⁶Yesu chamumweniyi nakami, welukili nindi wakata dehi hanalehi, hakumwihula nindi, Wukukeŋa akukoleshi tahindi?

⁷Owu iyala wakata hakumwakula nindi, Mwanta, hinikweti muntu wakuŋinŋa mwijiya havundulaŋawu mejuku; hinélaŋami nami niyumu, muntu wacheŋi hakunyakala kwijila mu.

⁸Yesu hakumwila nindi, Hiridukaku, sendaku yikaŋa yeyi, wendi.

⁹Hohe-nohu iyala yokola nikukola, hakusenda yikaŋa yindi, hakwenda.

¹⁰Dena ifuku odu dadiŋi dasabata. Dichi aYudeya hiyakumwila muntu anakoleshuwu dehi, nawu, Lelu hisabata, kusenda yikaŋa yeyi chinjila.

¹¹Ilaŋa yena hakuyakula nindi, Muntu nankoleshi diyi naŋili nindi, Sendaku yikaŋa yeyi, wendi.

¹²Wena hiyakumwihula nawu, iyala wakwila nindi, Sendaku yikaŋa yeyi, wendi; hinyi?

¹³Ilaŋa owu muntu kwiluka wamukolesha nehi; Yesu nawomboloki dehi nezaza dawantu dadiŋuku.

¹⁴Chihanalehi chanti Yesu hakumuwana mutembeli, hakumwila nindi, Tala, eyi anakukoleshi dehi, bayi wakavulumuna cheŋuku, chuma chabadika kutama chakamba kakuwana.

¹⁵Owu iyala hakudiyila kwindi, hakuleja aYudeya nindi, Yesu diyi wankolesha.

¹⁶Cheliliyi Yesu yumiyi hasabata dichi chamukabishiluwu kudi aYudeya.

¹⁷Ilaŋa Yesu hakuyakula nindi, Tata yami wuchidi kukalakala nihanu, ninami nawa nidi nakukalakala.

¹⁸Henohu dihu hafumini aYudeya kukeŋa nankashi kumujaha, nawu hanakumini dakujilola kwasabataku, ilaŋa nateni niNzambi nindi Tata yami; hakudibwambula naNzambi.

¹⁹Dichi Yesu hakuyakula nindi, Chalala chalala, nukuyileja nami, Mwana hatweshaŋa kwila chuma chakanka winduku, chiŋa amona chadi nakwilayi Tata. Yuma yelaŋa Tata yejima, diyi yelaŋa ni mwana nawa.

²⁰Muloŋa Tata wakeŋa a Mwana, wamulejaŋa yuma yejima yelaŋayi yomweni; wakamuleja ninyidimu yakubadika yeniyi, kulonda enu mwakahayami.

²¹Muloŋa chasaŋulaŋayi Tata afu nakuyihandisha, dichi nawa chahandishaŋayi Mwana antu anafuukuliyi.

²²Tata hasompeshaŋa muntuku, nakunjiki kusompesha kwejima kudi Mwana;

²³kulonda antu ejima alemeshi Mwana mwomwalemeshelaŋawu Tata. Muntu wabulaŋa kulemesha Mwana wabulaŋa kulemesha Tata yindi wamutemesheli.

²⁴Chalala chalala, nukuyileja nami, muntu wukutiya mazu ami, hakukuhwelela yena wantemesheli, wukweti wumi wahaya nyaka; hakamona kumusompeshaku, nafumi dehi mukufwa, nepili dehi muwumi.

²⁵Chalala chalala, nukuyileja nami, mpinji yikwinza, yashika dehi, mwakutiyilawu afu izu daMwana kaNzambi, akutiya akuhanda.

²⁶Muloŋa chahetayi Tata wumi mudi yomweni, dichi chanamwinkiyi ni mwana Ŋovu yakuheta wumi mudi yomweni.

²⁷Namwinki niwanta wakusompesha nanochu chadiyi Mwana kamuntu.

²⁸Bayi muhayama chumichuku; mpinji yakenza henohu antu ejima adi mumajamu akatiya izu dindi;

²⁹akedikamu; elili chachiwahi akasaŋukila wumi, akoŋeli chatama akasaŋukila kuyisompesha.

³⁰Ami hinukutwesha kwila chuma chakanka wami hela chimuku. Munatiyaŋa dimu nasompeshelaŋa, nikusompesha kwami kwaloŋa; muloŋa hinalondaŋa muchima wamami awenuku, chiŋa muchima waTata wantemesheli.

³¹Ami neyi nukudishimwina wunsahu wamami aweni, wunsahu wami hiwukwikala walalaku.

³²Wunsahu wami awushimunaŋa kudi wacheŋi; ami neluki mwakunshimunayi mwalala.

³³Mwatemesheli antu kudi Yowanu, yena washimwini mwalala hohu.

³⁴Ilaŋa wunsahu wunetejaŋami hiwakudi antuku; chinahoshaŋa mazu awa nalondi muhandi.

³⁵Yena Yowanu wadiŋi inoŋu, dela nikubutuka nikutoŋaeka; enu mwetejeli kuzaŋalala chilaaka chimu muchejeji chindi.

³⁶Ilaŋa wunsahu wunikwetami wabadika waYowanu, nyidimu yanyinkeliyi Tata kumanisha, yena nyidimu iyi vinelaŋa, diyi yanshimunaŋa wunsahu, nawu antemesheii kudi Tata.

³⁷NiTata wantemesheli diyi nekali chinsahu chami, diyi nanshimuni dehi; enu kanda mutiyaloŋahu dehi izu dindi, hela kumumona chekalayi.

³⁸Mazu aNzambi hiyashakamaŋa mudenuku, muloŋa ona atemesheliyi himwamwitiyaloŋaku.

³⁹Enu mwatalatalaŋa munyikanda yajila, muloŋa mwatoŋojokaŋa nenu dimu mumukumwena wumi wahaya nyaka; yeniyi diyi yanshimunaŋami.

⁴⁰Ilaŋa enu kwenu kwonti kwenu kwinza kudami kulonda mumoni wumi.

⁴¹Ami hinetejaŋa kunlemesha kudi antuku.

⁴²Ilaŋa mi nayiluki, nami mudenu himwekala kukeŋa kwaNzambuku.

⁴³Ami nenzi mwijina daTata yami, himunantambuluku; neyi wacheŋi wukwinza mwijina dindi yomweni, mukumutambula.

⁴⁴Enu mwetejaŋa kuyilemesha kudi akwenu, ilaŋa kuyilemesha kudi Nzambi wumu hohu himwachikeŋaŋaku, mukutwesha kwitiya ŋahi?

⁴⁵Bayi mutoŋojoka nenu ami yami nukuyiholokela kudi Tataku; kudi wumu wayiholokelaŋa, diyi Mosi, imwakuhwelelaŋa.

⁴⁶Muloŋa neyi enu mwamwitiyili Mosi mutenowu mwadi kuŋitiya ninami, muloŋa yena wasonekeli nakuntenami.

⁴⁷Ilaŋa neyi mukubula kwitiya nyikanda yajila yasonekeliyi yena, indi mazu inahoshaŋami mukuyiitiya ŋahi?