Read MUKANDA WANZAMBI Joani 6 Bible Online

Joani 6 - MUKANDA WANZAMBI bible

Joani 6

¹Kulondela hayumiyi Yesu hakufumaku, hakuya kwishinadi di kwawu dejiya daŊaliliya dodaTiberasi.

²Hikukumulondela izaza deneni dawantu muloŋa anamoni dehi yinjikijilu yelililiyi akata.

³Yesu hakukanduka mpidi, hakushakama kwenoku nawatumbanji twindi.

⁴Henohu paseka, chawija chawaYudeya, chashika dehi kwakwihi.

⁵Dichi Yesu hakufumbula mesu, hakumona antu amavulu adi nakwinza kudi yena, hakumwila Fwilipu nindi, Kudya tukupawila kudihi kulonda antu awa adiyi?

⁶Chenochu wachihosheli nindi amutompi nachu; muloŋa yomweni neluki chakukeŋa kwilayi.

⁷Fwilipu hakumwakula nindi, Yakudya yakulanda namali makulakaji ayedi kulonda antu ejima atambuli kanti kanti, hiyikuwaninaku.

⁸Kambanji kindi wumu, Anderi mana kwaShimona Petulu,

⁹hakumwila nindi, Kunu kudi kansi wukweti mankendi abali atanu, nitunyisaŋi tuyedi; indi yeniyi antu amavulu chishi ka hichi akuyiwanina?

¹⁰Yesu hakwila nindi, Yishakamishenu antu. Henohu hadiŋi matahu amavulu. Amayala ashakamini; kuyichinda ashikili neyi kwiji makombakaji atanu.

¹¹Yesu hakutambula owu mankendi; chanasakililiyi, hakuyipaŋila antu anashakami; ninyisaŋi nawa mwomumu, mwonsu mwakeŋa eluwu.

¹²Chanekutuwu, hakuyileja atumbanji twindi nindi, Nonenu yibalu yinashaluhu kulonda tubuli kuyikisaŋana.

¹³Ayinona nikuyinona, hiyakwinzesha mabaŋu ikumi nayedi nayibalu yamankendi abali atanu yashiyiluwu antu heliluwu anadyi dehi.

¹⁴Dichi antu chanamonuwu chinjikijilu cheliliyi, hiyakwila nawu, Chalala yeniwu diyi kaprofwetu elaŋawu nawu wakenza mumpata yamunu mwishina.

¹⁵Yesu chanamoniyi antu hiyakukeŋa kwinza nakumukwata naŋovu amudiishi wanta, hakuwombolokela kumpidi kwakanka windi.

¹⁶Chikuneli dehi melela atumbanji twindi hiyakukunkumukila kwijiya, eŋila nimuwatu.

¹⁷Hiyakuzambuka hejiya, nawu ayi kuKaperinawu. Henohu kuneli dehi wufuku, Yesu niyena wuchidi kanda enzi kudi wena.

¹⁸Ŋiya hidikutachika kwila mankanda amaneni, muloŋa wampepela yeneni yadiŋi nakukunka.

¹⁹Cheliluwu wena anavuwi dehi kilometa jiwana indi kwiji jitanu, hiyakumona Yesu wudi nakwenda hewulu dameji, wudi nakuswila kwakwihi nawatu. Afwa nimutentu.

²⁰Yena hakuyila nindi, Yami aweni, bayi mutiyawomaku.

²¹Atiya nikuwaha kumwiŋija muwatu; hohenohu watu wushika nikuchikumu kwadiŋi nakuyawu.

²²Chikunachi, izaza dasheli kwishinadi dejiya amona nawu kwadiŋi watu wumu hohu, nawu Yesu heŋila muwatu owu hamu nawatumbanji twinduku, afumakukanka wawu.

²³Ilaŋa kuTiberasi hikukufuma tumaatu twacheŋi, hitukushika kwakwihi nakwadiilawu mankendi, hasakililayi Mwanta.

²⁴Dichi izaza dawantu chabulili kumonawu Yesu, hela atumbanji twindi, wena hiyakwijila namutumaatu otu, hiyakuya nakumukeŋakeŋa Yesu kuKaperinawu.

²⁵Chanamuwanuwu kwishinadi dejiya hiyakumwila nawu, Eyi Rabi, wenza kunu ifukwinyi?

²⁶Yesu hakuyakula nindi, Chalala chalala, nukuyileja nami, chimunankeŋakeŋi hichinafumi hakumona yinjikijiluku, chinafumi hakwikuta mankendi mwadya.

²⁷Bayi mukalakelaŋa yakudya yanoŋaŋaku, chiŋa yakudya yashikaŋa nikuwumi wahaya nyaka yakuyinkayi Mwana kamuntu, diyi anafunduwu mufunda kudi Tata Nzambi.

²⁸Hiyakumwihula nawu, chiŋa twili ŋahi kulonda tukalakalaŋa nyidimu yaNzambi?

²⁹Yesu hakwakula nindi, Mudimu wakumukalakela Nzambi yowu kwitiya yena atemesheliyi.

³⁰Dichi wena hiyakumwihula nawu, Wukwila chinjikijilwinyi tuchimoni, tukwitiyi? Wakalakalaŋadi?

³¹Ankakulula jetu adiilaŋa manina mwisaŋa, mwomwanasonekuwu munyikanda yajila nawu, Wayinkeli yakudya yakufuma mwiwulu, adiyi.

³²Kuchinka Yesu nindi, Chalala chalala, nukuyileja nami, Mosi hidiyi wayinkeli yakudya yakufuma mwiwuluku. Tata yami diyi wayinkaŋa a yakudya yalala yakufuma mwiwulu.

³³Muloŋa yakudya yaNzambi yowu wasulukili mwiwulu, wahandishaŋa ntu ampata yamunu mwishina.

³⁴Hiyakumwila nawu, Mwanta, atwinki yakudya oyu mafuku ejima.

³⁵Yesu hakuyila nindi, Ami yami nshima yawumi; muntu wukwinza kudami hakutiya cheŋi nzalaku, muntu wukunkuhwelela hamba katiya cheŋi mpwilaku.

³⁶Ilaŋa mi nayileji dehi nami, munanmoni dehi, enu kwitiya nehi.

³⁷Ejima akunyinkayi Tata diwu akwinza kudami; muntu wukwinza kudami, ami hinakamúumbaku.

³⁸Ichi chinasuluki mwiwulu hinalondi kwila muchima wamami awenuku, nalondi kwila muchima wayena wantemesheli.

³⁹Muchima wayena wantemesheli, nakeŋi yuma yejima yananvinkiyi nibuli kujimbeshahu hela chimu, chiŋa nakachisapula hefuku dakukuminina.

⁴⁰Muloŋa muchima waTata yami, nakeŋi antu ejima atalaŋa Mwana amwitiyaloŋa chakukuhwelela, muntu himuntu, amoni wumi wahaya nyaka, ninami nakamusaŋula hefuku dakukuminina.

⁴¹AYudeya hiyakumutobela nanochu cheliliyi nindi, Yami nshima yasulukili mwiwulu.

⁴²Hiyakwila nawu, Yeniwu hidiyi Yesu, mwana kaYosefuku? Tata yindi namama yindi twayiluka. Indi yena welaŋa ŋahi nindi, Ami nasulukili mwiwulu?

⁴³Yesu hakuyakula nindi, Bayi mutobapaku.

⁴⁴Kwosi muntu natweshi kwinza kudami chakadi kumukoka kudi Tata wantemesheluku, ninami nakamusaŋula hefuku dakukuminina.

⁴⁵Anasoneki munyikanda yawatuprofwetu nawu, Antu ejima akayileja maana kudi Nzambi. Antu ejima anatiyi kudi Tata, anashinshiki, diwu akwinza kudami.

⁴⁶Hikwekala muntu wamonahu dehi Tataku, chiŋa iwu wafumini kudi Nzambi, diyi namoni Tata.

⁴⁷Chalala chalala, nukuyileja nami, muntu wukwitiya chakukuhwelela wukweti wumi wahaya nyaka.

⁴⁸Ami yami nshima yawumi.

⁴⁹Ankakulula jenu adiili manina mwisaŋa; afwili dehi.

⁵⁰Nshima yakudyayi muntu abuli kufwa, diyi yasulukili mwiwulu.

⁵¹Ami yami nshima yayumi yasulukili mwiwulu. Neyi muntu wukudya kunshimiyi wakahandaŋa haya nyaka. Eŋa, nshima yinakahana kulonda antu ampata yamunu mwishina ahandi, diyi musunyi wami.

⁵²AYudeya hiyakutadika ntadi mukachi kawu, nawu, Muntu iwu wukutwesha kutwinka musunyi windi ŋahi, mwaka tuwidyi?

⁵³Dichi Yesu hakuyila nindi, Chalala chalala, nukuyileja nami, neyi mukubula kudya musunyi waMwana kamuntu, mubula kunwa nimashi indi, himukwikala nawumi mudenu awenuku.

⁵⁴Muntu wadyaloŋa musunyi wami, wanwaŋa nimashi ami, diyi wukweti wumi wahaya nyaka; ami nakamusaŋula hefuku dakukuminina.

⁵⁵Muloŋa musunyi wami hikudya kwalala, mashi ami hikunwa kwalala.

⁵⁶Muntu wadyaloŋa musunyi wami, wanwaŋa nimashi ami, diyi washakamaŋa mudami, ninami mudi yena.

⁵⁷Chantemesheliyi Tata wamumi, ninami chinukuhandila kudi Tata, dichi chakahandaŋa nimuntu waŋudyaloŋa.

⁵⁸Diyi yakudya yasulukili mwiwulu; hiyidi neyi yadiili ankakululaku, niwena afwa dehi; muntu wukudya yakudya iyi wakahanda haya nyaka.

⁵⁹Mazu awa hakuyihoshela mushikola chadiŋi nakulejayi antu kuKaperinawu.

⁶⁰Chachitiyiluwu atumbanji twindi amavulu hiyakwila nawu, Mazu awa akala; wukutwesha kutiyamu hinyi?

⁶¹Yesu welukili mumuchima windi chadiŋi nakutobawu atumbanji hachumichi; hakuyila nindi, Munamoni chumichi kukala, tahindi?

⁶²Indi neyi mwakamona Mwana kamuntu hakukandama kwadiŋilaŋayi?

⁶³Spiritu diyi wahandishaŋa, kumujimba hiwukumwenaku chumaku. Mazu awa nahoshi nanenu, diyi spiritu, diwu wumi.

⁶⁴Ilaŋa hadenu hadi amu abula kwitiya. Muloŋa Yesu welukili kufumisha kutachi, ninawa abulili kwitiya, niwamba kamufukeja.

⁶⁵Yena nindi, Dichi nayileji nami, kwosi muntu wukutwesha kwinza kudamuku, chiŋa amwinkachu kudi Tata.

⁶⁶Henohu atumbanji twindi amakwawu hiyakufuntamu, kwenda nawa cheŋi nindi nehi.

⁶⁷Dichi Yesu hakwihula ikumi nayedi nindi, Ninenu nawa keŋa muyi kwenu, tahindi?

⁶⁸Kuchinka Shimona Petulu nindi, Tukuyakudinyi? Eyi yeyi wukweti mazu awumi wahaya nyaka.

⁶⁹Tunetiyi, tuneluki netu eyi yeyi Wajila waNzambi.

⁷⁰Yesu hakuyakula nindi, Ami hinayitondeli enu ikumi nayeduku? Ilana mwinenu wumu hidiyabolu.

⁷¹Komana hakutena Yudasi, mwana kaShimona Isakaroti, muloŋa diyi wamba kamufukeja, diyi wahekumi nayedi.