Read MUKANDA WANZAMBI Joani 7 Bible Online

Joani 7 - MUKANDA WANZAMBI bible

Joani 7

¹Kulondela hayumiyi, Yesu hakwenda muŊaliliya; walekeli kwenda muYudeya muloŋa aYudeya akeŋeli kumujaha.

²Henohu chawija chawaYudeya chamuyisolu chashika dehi kwakwihi.

³Dichi ana kwindi hiyakumwila nawu, Fumaku kunu, yaloŋa kweyi muYudeya kulonda atumbanji tweyi niwena akamoni nyidimu yeyi yiwelaŋa.

⁴Muntu wakeŋa a kutiyakana, helilaŋa yuma kumbaduku. Neyi eyi welaŋa yumiyi, kadimwekeshi eyi aweni kudi antu.

⁵Muloŋa hela ana kwindi niwena hiyamwitiyiluku.

⁶Dichi Yesu hakuyila nindi, Mpinji yami kanda yishiki; hakwila enu mpinji jejima jenu hohu.

⁷Antu ampata yamunu mwishina hiyanatweshi kuyihela enuku; hakwila ami anhelaŋa, muloŋa yami nayishimunaŋa nami nyidimu yawu yatama.

⁸Enu kwenu yenu kuchawija, ami kwami kukanduka kuchawija chi kanda, muloŋa mpinji yami kanda yishiki chikupu.

⁹Chanayilejiyi yumiyi hakushakama tuhu muŊaliliya.

¹⁰Chanakandukuwu ana kwindi kuchawija, niyena nawa hakuya kwenoku; hayili hatookaku, ilaŋa chakumbadi hohu.

¹¹Dichi aYudeya hiyakumukeŋakeŋa kuchawija, nawu, Wudi kudihi?

¹²Hamazaza awantu hadiŋi kumunyinyita nankashi; amunawu, Himuntumuwahi; amakwawu nawu, Nehi, wudi nakuluwisha antu.

¹³Hela chochu, hikwadiŋi muntu wamuteneni hatookaku, nawoma wawaYudeya.

¹⁴Chihanashiki hakachi kachawija, Yesu hakukanduka ayi mutembeli, hakuleja antu.

¹⁵Dichi aYudeya hiyakuhayama nawu, Muntu iwu neluki ŋahi kutaŋa chakadi kudiza?

¹⁶Dichi Yesu hakuyakula nindi, Kuleja kwami hikwamami awenuku, kwambala kwayena wantemesheli.

¹⁷Neyi kudi muntu nakeŋi kwila mwaya muchima windi, wakeluka kulejiku, neyi kunafumi kudi Nzambi, hela neyi nahoshi chakumuchima wamami aweni.

¹⁸Wahoshaŋa chakumuchima windi yomweni, diyi walondaŋa kudilemesha yomwenindi; ilaŋa iwu wakeŋa aŋa kulemesha wamutemesheli, diyi walala, mudi yena himwekala kuheŋaku.

¹⁹Mosi wayinkeli nshimbi, ilaŋa hikwekala mwinenu welaŋa nshimbuku. Mudi nakukeŋa kunjahiladi?

²⁰Izaza hidikumwakula nawu, Eyi wudi nademoni. Anakeŋi kukujaha kudinyi?

²¹Yesu liakuyakula nindi, Nela mudimu wumu, himukuhayama wejima wenu.

²²Dichi chayinkeliyi Mosi kwalama; hichafumini kudi Mosuku, chafumini kudi ankakulula; mwalamishaŋa ntu hasabata.

²³Neyi muntu amwalamisha hasabata kulonda nshimbi jaMosi abuli kujimotoka, indi enu muzuwaŋa nanami nanichi chinakoleshi muntu hasabata ngu chikupu?

²⁴Bayi musompeshaŋa chakumesuku, chiŋa musompeshaŋa kusompesha kwaloŋa.

²⁵Dichi antu akuYerusalema amakwawu hiyakwila nawu, Hidiyi adi nakukeŋa kujahawuku, tahindi?

²⁶Iwu wukuhosha hatooka iwu; izunidimu dakumwilawu kwosi. Anyuli aneluki dehi chalala nawu diyi Kristu, tahindi?

²⁷Hakwila etu tuneluki kwafumayi iwu iyala. Chamba kenzayi Kristu hikwakekala muntu wakeluka kwakufumayuku.

²⁸Dichi Yesu hakubidika mutembeli, iku wudi nakuleja antu, nindi, Mwaŋiluka, mweluka nikunafumini. Ami hinadinjila ami awenuku, ilaŋa yena wantemesheli diyi walala, himwamwilukaku.

²⁹Ami namwiluka, muloŋa diku nafumini, yena diyi wantemesheli.

³⁰Dichi hiyakukeŋa kumukwata, ilaŋa hikwadiŋi muntu wakumwolwela chikasaku, muloŋa henohu mpinji yindi kanda yishiki.

³¹Ilaŋa ntu amwizaza amavulu hiyakumwitiya, nawu, Chakenzayi Kristu, wakela yinjikijilu yakubadika yaneliyi iwu iyala, tahindi?

³²AFwarisi hiyakutiya mwadiŋi nakumunyinyita izaza. Akulumpi jawatupristu niaFwarisi atemesha niatulama amukwati.

³³Dichi Yesu hakwila nindi, Nichidi nanenu mafuku antesha, hinakaya kudi yena wantemesheli.

³⁴Mwakankeŋakeŋa, kunwananehi; ikukunakekalami, himwakatwesha hushika kwoku.

³⁵AYudeya hiyakuhosha mukachi kawu, nawu, Iyaliwu keŋa ayi kudihi kutukubula kumuwana? Wukuya kudi aYudeya amakwawu apalaŋana dehi mukachi kawaHeleni nakuleja aHeleni, tahindi?

³⁶Idi izu danahoshiyi dakwila nindi, Mwakankeŋakeŋa, kunwana nehi; iku kunakekalami, himwakatwesha kushika kwoku; daya mudihi?

³⁷Hefuku dakukuminina, dodifuku dalemena chawija, Yesu hakwimana nakubidika, nindi, Neyi kudi muntu natiyi mpwila, enzi kudami anwi.

³⁸Muntu wukunkuhwelela, mumuchima windi mukufumaŋa tuloŋa twameji amomi, mwomunahoshi mukanda wajila.

³⁹Chahosheliyi ochu wateneni Spiritu, akukeŋa kutambulawu antu akumwitiya chakukuhwelela; henohu Spiritu wuchidi kanda enzi, muloŋa Yesu wuchidi kanda amulemeshi.

⁴⁰Amakwawu amwizaza chatiyiluwu mazu owu hiyakwila nawu, Chalala diyi owu kaprofwetu.

⁴¹Amakwawu nawu, Diyi Kristu. Ilaŋa makwawu nawu, Aka! Kristu afumi muŊaliliya, tahindi?

⁴²Mukanda wajila wunahoshi nawu, Kristu wukufuma kumutaŋa waDavidi, nikuBetelemi, mukala wadiŋi Davidi.

⁴³Izaza dambuka nihansaŋu yindi.

⁴⁴Amakwawu akeŋeli nawu amukwati; ilaŋa hikwadiŋi muntu wakumwolwela makasaku.

⁴⁵Atulama hiyakufunta kudi awakulumpi jawatupristu nawaFwarisi; wena hiyakuyihula nawu, Munabulilidi kumuleta?

⁴⁶Atulama hiyakwakula nawu, Hikudi muntu wahoshahu dehi neyi iwuku.

⁴⁷Kuchinka aFwarisi nawu, Ninenu nawa anayidimbi dehi, tahindi?

⁴⁸Kunamwekani nyuli wumu hela kaFwarisi namwitiyi, tahindi?

⁴⁹Ilaŋa ntu awa amavulu anabuli kwiluka nshimbi ashiŋewa.

⁵⁰Nikodemu, owu wenjili dehi kudi Yesu, wadiŋi mwinawu niyena,

⁵¹hakuyila nindi, Nshimbi jetu jasompeshaŋa muntu chakadi kusambila kutiya mwakuhoshayi yomweni, hela kwiluka mwakwilayi, tahindi?

⁵²Wena hiyakumwakula nawu, Komana nineyi nawa wumuntu wakuHaliliya, tahindi?

⁵³Talatalaku munyikanda yajila, wiluki kuŊaliliya hikwafumana kaprofwetuku.