Read MUKANDA WANZAMBI Joani 9 Bible Online

Joani 9 - MUKANDA WANZAMBI bible

Joani 9

¹Chadiŋi nakuhitayi, hakumona iyala wadiŋi mputamesu kufumisha havwalikiliyi.

²Atumbanji twindi hiyakumwihula nawu, Eyi Rabi, wavulumwini hinyi, iwu iyala, tahindi anvwali jindi, mwaka avwaliki mputamesu?

³Yesu hakwakula nindi, Hela iyala iwu hela anvwali jindi hiyavulumwinuku; Nzambi walondeli nyidimu yindi yakamwekeni mudi yena.

⁴Chiŋa tukalakalenu nyidimu yayena wantemesheli hikuchidi mwaana; wufuku keŋa winzi mwabulaŋa kukalakalawu nyidimu.

⁵Hohanu hinichidi mumpata yamunu mwishina, nichejeji champata yamunu mwishina.

⁶Chanahoshiyi ochu, hakufwija mazeŋi hamaseki, hakuputa maseki namazeŋi, hakumulambawu hamesu indi,

⁷hakumwila nindi, Yaku wuweli mwijiya daSilowami; chaya mukwila nawu, Atemesheli. Dichi hakuya, hakuwela, hakufunta namoni dehi.

⁸Dichi akwawu atuŋayi nindi kwakwihi ni akwawu amumweni hakusambila hadiŋiyi mukwakulomba, hiyakwila nawu, Hidiyi washakaminaŋa nakulombaku?

⁹Amakwawu nawu, Diyi. Amakwawu nawu, Nehi, wamufwana tuhu. Yena nindi, Yami.

¹⁰Dichi wena hiyakumwihula nawu, Indi mesu eyi anayitoneshi pahi?

¹¹Hakwakula nindi, iyala ijina dindi Yesu, waputa maseki, hakulamba hamesu ami, hakunila nindi, Yaku kuSilowami wuweli. Hinukuya, chinaweli hinukumona.

¹²Hiyakumwihula nawu, Wudi kudihi? Nindi, Kwiji.

¹³Hiyakutwala muntu owu wadiŋi mputamesu kudi aFwarisi.

¹⁴Denodu ifuku daputiliyi Yesu maseki, damutonesheliyi muntu mesu, dadiŋi dasabata.

¹⁵Dichi aFwarisi niwena hiyakumwihula cheŋi nawu, Watona ŋahi? Yena hakuyila nindi, Washa maseki akuputa hamesu ami, chinaweli hinukumona.

¹⁶Dichi aFwarisi amakwawu hiyakwila nawu, Iwu muntu hafuma kudi Nzambuku, Muloŋa hajilikaŋa sabataku. Ilaŋa makwawu nawu, Mukwanshidi wukutwesha ŋahi kwila yinjikijilu yidi neyi iyi? Henohu adambula nikudambula.

¹⁷Dichi hiyakumwihula cheŋi owu mputamesu, nawu, Atuleji, ichi chanakutoneshiyi mesu, wunatoŋojoki ŋahi? Wukumutena neyinyi? Yena nindi, Hikaprofwetu.

¹⁸Dichi aYudeya kwitiya nawu diyi mputamesu anatoneshuwu nehi, chiŋa anatambiki anvwali jamuntu anatoneshuwu.

¹⁹Hiyakuyihula nawu, Yeniwu diyi mwanenu, mwelaŋa nenu wavwalikili mputamesu, tahindi? Ichi dinu namoni pahi?

²⁰Anvwali jindi hiyakwakula nawu, Tuneluki netu diyi mwanetu, wavwalikili mputamesu;

²¹ilaŋa ichi chanamoniyi hitunachilukuku; hela wamutonesha mesu indi hitunelukuku. Mwihulenu yomweni, wakula dehi, yomweni wukushimuna kwindi.

²²Anvwali jindi ahosheli ochu nawoma watiyiluwu aYudeya, muloŋa aYudeya atiyaloŋana dehi nawu, neyi muntu wukwiteja nindi yeniwu diyi Kristu, akamuhaŋa mushikola yawu.

²³Dihu hafumini anvwali jindi kuhosha nawu, Wakula dehi, mwihulenu yomweni.

²⁴Dichi hiyakutambika owu iyala wadiŋi mputamesu kamuchiyedi, hiyakumwila nawu, Mulemeshi Nzambi, etu tuneluki netu iwu iyala himukwanshidi.

²⁵Hakuyakulanindi, Neyi himukwanshidi ami kwiluka nehi; neluki chuma chimu hohu nami, ami nadiŋi mputamesu, katataka namoni dehi.

²⁶Dichi hiyakumwihula cheŋi nawu, Wakwila ŋahi? Mesu eyi wayitonesha ŋahi?

²⁷Hakuyakula nindi, Ami nayileji katataka, enu kutiya nehi. Munakeŋi mutiyumu cheŋi, tahindi? Enu aweni munakeŋi mubalumuki kwikala atumbanji twindi nawa, tahindi?

²⁸Hiyakunamutuka nawu, Eyi yeyi kambanji kindi, etu kwetu tuyatumbanji twaMosi.

²⁹Tuneluki netu Nzambi wahosheli naMosi, hakwinza iwu iyala hituneluki kwafumayuku.

³⁰Owu iyala hakuyakula nindi, Aka! Munanhayamishi chimunabuli kwiluka kwafumayi, kutoŋa diyi natoneshi dehi mesu ami.

³¹Etu tuneluki netu Nzambi hatiyililaŋa akwanshiduku; ilaŋa neyi kudi muntu mukwakulemesha Nzambi, welaŋa nimuchima windi, Nzambi wukumutiyilila.

³²Kufumisha kushankulu kanda achitiyaloŋahu dehi nawu, kudi muntu watoneshahu dehi mesu amukwawu wavwalikili mputamesu.

³³Neyi iwu iyala hafumini kudi Nzambuku, hadi kutwesha kwila chumaku.

³⁴Wena hiyakumwakula nawu, Eyi wavwalikili munsnidi chikupu, wutulejaŋetu? Hiyakumuhaŋa mukachi kawu.

³⁵Yesu hakutiya nawu anamuhaŋi dehi mukachi kawu. Chanamuwaniyi, hakumwihula nindi, Eyi wunamwitiyi Mwana kaNzambi, tahindi?

³⁶Yena hakwakula nindi, Hinyi Mwanta, kulonda nimwitiyi?

³⁷Yesu hakumwila nindi, Wunamumoni dehi, diyi iwu wudi nakuhosha naneyi.

³⁸Yena hakwila nindi, Mwantanetiyi. Hakudifukula kudi yena.

³⁹Yesu hakwila nindi, Chinenjili mumpata yamunu mwishina nalondeli kusompesha, kulonda abulaŋa kumona amoni, niamonaŋa abalumuki amputamesu.

⁴⁰AFwarisi amakwawu adiŋiyi nawu chanatiyuwu mazu owu, hiyakumwila nawu, Ninetu nawa tuyamputamesu, tahindi?

⁴¹Yesu hakuyila nindi, Neyi mwadiŋi amputamesu, himwadi kwikala nanshiduku; ichi dinu chimudi nakwila nenu, Twamonaŋa; komana nshidi yenu yayiwenyi.