Read MUKANDA WANZAMBI Likezo 10 Bible Online

Likezo 10 - MUKANDA WANZAMBI bible

Likezo 10

¹MuKesareya mwadiŋi iyala wumu, ijina dindi Konelisu, senturinu yamashidika atenaŋawu nawu aItaliya;

²muntu wukweti kale-mesha kakulemesha Nzambi, waakamaŋa Nzambi hamu nawakwetala dindi ejima, wenkelaŋa antu yamukunkulu yayivulu, walombelaŋa kudi Nzambi hefuku hefuku.

³Hakumona muchimwenu chalumbuluka, kaŋelu kaNzambi hakwinza kudi yena haora kwiji yamuchitanu nachiwanayefuku; hakumwila nindi, Eyi Konelisu.

⁴Niyena chanamushinshikiyi kaŋelu swi-i, hakutiya woma nindi, Chika Mwanta? Yena hakumwila nindi, Kulomba kweyi kwakuvulu niyamukunkulu yeyi yinashi ki kudi Nzambi, anakwanuki nachu.

⁵Dichi dinu, temeshaku amayala kuYopa, akaleti Shimona atumbiluwu ijina di kwawu daPetulu;

⁶washakamakwamuntu wumu ijina dindi Shimona, mukwakuloomba yitembi, wukweti itala dindi kwakwihi nakaluŋalwiji.

⁷Chanayiyi kaŋelu wadiŋi nakuhosha nindi, Konelisu hakutambika aŋamba jindi ayedi, niishidika wumu wukweti kalemesha kakulemesha Nzambi, wowu akwakumwimena hefuku hefuku.

⁸Hakuyihitila mwejima mwanamulejuwu kudi kaŋelu, hakuyitemesha kuYopa.

⁹Chikunachi, achidi kuya munjila yawu, hiyakuya nakuswila kwakwihi namukalowu, Petulu hakukanduka hewulu detala alombi, kwiji neyi ora yamuchitanu nayimu.

¹⁰Hakutachika kutiya nzala, hakukeŋa kudya. Hachidi kuloŋeshawu kudya, hakwila neyi wukukeŋa kuya namutulu.

¹¹Hakumona iwulu hiyakudijikula, nichuma kwiji chika, chidi neyi ihina deneni, hichikuzelumuka, hiyakuchizelumwina kumawombu achu awana, chishi ka niheseki.

¹²Mwenomu mudi anyama anyitundu yejima, niyuma yazalalaŋa hamaseki, nitujila twahaluzwizu.

¹³Kudi yena hikukwinza izu nawu, Eyi Petulu, nyamukaku, wujahi, wudyai.

¹⁴Ilaŋa Petulu nindi, Aha-a, Mwanta! Kanda dehi nidyi chuma chatama hela chajilaku.

¹⁵Izu hidikwinza kudi yena ipampa damu chiyedi nawu, Chuma chanatookeshiyi Nzambi, bayi wuchitena neyi chatamaku.

¹⁶Chenichi achilili kasatu; chumochu atambula nikwiwulu hohenohu.

¹⁷Hachidiŋivi Petulu kujinoka nankashi, nindi chimwenu ichi chinamoni chinayi mudihi? kukasumuka owu amayala atemesheluwu kudi Konelisu, aneliuli dehi kwitala daShimona, anemani dehi kuchisu chachipaŋu.

¹⁸Hiyakutambika nakwihula nawu, Shimona atumbiluwu ijina di kwawu daPetulu, washakama kunu?

¹⁹Hachidiŋiyi Petulu kutoŋojoka nsaŋu yachimwenu ochu, Spiritu hakumwila nindi, Tala, amayala asatu anakukeŋi.

²⁰Dichi nyamukaku wusuluki, wuyi nawu chakadi ntadi; yami nayitemeshi.

²¹Petulu hakusulukila kudi owu amayala nindi, Yami muntu mudi nakukeŋa; munenjilidi?

²²Nawu, Senturinu Konelisu, muntu waloŋa waakamaŋa Nzambi, amuhamekaŋa kudi muza wejima wawaYudeya, anamuleji kudi kaŋelu wajila nawu akakutumeshi wuyi mwitala dindi, kulonda atiyi mazu kudeyi.

²³Hakuyitambika mwitala hakuyileja kwakukama. Chikunachi hakunyamuka hakuya nawu, niana kwindi amakwawu akuYopa hiyakumutwalaku.

²⁴Chikunachi ifuku di kwawu hiyakwijila muKesareya, kuwana Konelisu wudi nakuyichiŋilila, wapompesha dehi awusoku windi niamabwambu jindi akundayi.

²⁵Chanepiliyi Petulu, Konelisu hakumubulakana, hakudinata kunyendu yindi nakudifukula kudi yena.

²⁶Ilaŋa Petulu hakumuhindwisha nindi, Imanaku; ninami aweni nimuntu kwami.

²⁷Iku wudi nakuhosha nindi hakwijila, hakuwana antu amavulu anapompi dehi.

²⁸Hakuyila nindi, Enu aweni muneluki kaYudeya kushakama namuntu wakumuza wacheŋi hela kwinza kwakwihi nindi, chinjila. Hela chochu, Nzambi nanleji nindi, kutena muntu neyi watama hela wajila, chinjila.

²⁹Dichi chimwantumesha, hinukwinza chakadi ntadi. Dichi neliuli nami mwantumesheladi?

³⁰Kuchinka Konelisu nindi, Munahiti mafuku awana nakushi ka hampinji yinu, nadiŋi nakulomba mwitala dami haora yamuchitanu nachiwana; kukasumuka iyala nemani kunidi, navwali mahina atoŋeka chejeji.

³¹Nindi, Eyi Konelisu, kulomba kweyi anakutiyi, niyamukunkulu yeyi anayanuki kudi Nzambi.

³²Dichi dinu, temesha antu kuYopa wakatambiki Shimona atumbiluwu ijina di kwawu daPetulu, akenzi kudeyi; yena wekala kwaShimona mukwakuloomba yitembi kuchi kumu chakaluŋalwiji.

³³Dichi hinukukutemeshela antu hohenohu. Chinawahi mwani chiwunenzi. Dichi dinu, yetu awa tudi kunu kumesu aNzambi wejima wetu, kulonda tutiyi yejima yanakulejuwu kudi Mwanta.

³⁴Petulu hakuhosha nindi, Mwalala, namoni komana Nzambi haakaminaŋa antu kumesuku;

³⁵hakwila munyuza yejima, muntu wamwakamaŋa yena, welaŋa mwaloŋa, amutiyaloŋa kudi Nzambi kuwaha.

³⁶Enu aweni mweluka mazu atemesheliyi Nzambi kudi aIsarela, nakushimuna nsaŋu yayiwahi yakuwunda naYesu Kristu, diyi Mwanta wawantu ejima.

³⁷Nsaŋu iyi enu aweni mwayiluka, yatiyakeni mwahita Yudeya mwejima; yatachikilili kuŊaliliya hakumishiluwu chipapatishu chashimwiniyi Yowanu.

³⁸Mwatiya dehi nsaŋu yakutena Yesu wakuNazareta, chamuwayishiluwu kudi Nzambi naSpiritu Wajila naŋovu; yena wakimbukilaŋa nakwila yayiwahi, nakukolesha antu ejima akabishilaŋawu kudi diyabolu, muloŋa Nzambi wadiŋi nayena.

³⁹Yetu ayinsahu twamweni namesu mwejima mweliliyi mwituŋa dawaYudeya nimuYerusalema; yena nawa amujahili, nakumukudika hamutondu.

⁴⁰Yena amusaŋwili kudi Nzambi mudi afu ifuku damu chisatu;

⁴¹hakumumwekesha hatooka, bayi kudi antu ejimaku, ilaŋa kudetu ayinsahu akutondaŋahu dehi kudi Nzambi, yetu twelili nikudya nikunwa nindi helililiyi nasaŋuki dehi mudi afu.

⁴²Yena hakutuleja nindi tushimwini antu, tushimuni wunsahu wakutena netu yenowu diyi anafuukuluwu kudi Nzambi kwikala mukwakusompesha niamomi niafu.

⁴³Amushimunaŋa wunsahu kudi atuprofwetu ejima, nawu mwijina dindi antu ejima akumukuhwelela akamona kuyanakena nyiloŋa.

⁴⁴Iku Petulu wuchidi kuhosha mazu awa, Spiritu Wajila hakuholokela hadi antu ejima adiŋi nakutiya.

⁴⁵Niakwakwalama enjili naPetulu adiŋi etiya, chanachimonuwu, hiyakuhayama wejima wawu nawu, Komana hadi aJentili nihena nawa anechiluhu chamukunkulu chaSpiritu Wajila.

⁴⁶Muloŋatiyili hiyakuhosha madimi acheŋi nakumutohesha Nzambi.

⁴⁷Petulu hakwila nindi, Muntwinyi natweshi kulekesha meji, abuli kuyipapatisha awa anatambuli Spiritu Wajila mwomutwatambwili ninetu?

⁴⁸Hakuyila nindi ayipapatishi mwijina daYesu Kristu. Hiyakumulembelela nawu ashakamuku mafuku amakwawu.