Read MUKANDA WANZAMBI Likezo 11 Bible Online

Likezo 11 - MUKANDA WANZAMBI bible

Likezo 11

¹Apostolu niana kwawu amuYudeya, hiyakutiya nawu aJentili niwena nawa anatambuli dehi mazu aNzambi.

²Chanenziyi Petulu kuYerusalema, akwakwalama hiyakutadika nindi,

³nawu, Eyi wepilili mwawayidima, hiwukudya nawu.

⁴Petulu hakutachika kuyilumbulwila mwahitili nsaŋu yejima.

⁵Nindi, Chinadiŋi kumukala waYopa nakulomba, hinukwila neyi nukukeŋa kuya namutulu, hinukumona chimwenu, chuma kwiji chika, chidi neyi ihina deneni, hichikuzelumuka, hiyakuchizelumuna kwiwulu muchadiŋi kumawombu achu awana, chishi ka nikudami.

⁶Kushinshikamu hinukumona mudi anyama ahanu heseki, nianyama amumpata, niyuma yazalalaŋa, nitujila twahaluzwizu.

⁷Hinukutiya izu nawu, Eyi Petulu, nyamukaku, wujahi, wudyai.

⁸Ami hinukwila nami, Aha-a, Mwanta, kanda dehi nidyi chuma chatama hela chajilaku.

⁹Izu hidikwakula kwiwulu kamuchiyedi nawu, Chuma chanawahishiyi Nzambi, bayi wuchitena neyi chatamaku.

¹⁰Chanachiluwu kasatu ayikokela niyejima mwiwulu.

¹¹Hohenohu kutala amayala asatu, anatemeshuwu dehi kudami kufuma kuKesareya, anemani dehi kwitala kutwadiŋi.

¹²Spiritu hakunleja nindi yaloŋa nawu, nindi bayi mudambulaku. Nayili hamu nanawa ana kwetu atanu nawumu; twiŋila nimwitala dayenowu iyala.

¹³Hakutuleja chamweniyi kaŋelu nemanimwitala dindi, nichamulejeluwu kudi owu kaŋelu nindi, Temeshaku antu kuYopa, akaleti Shimona atumbiluwu ijina di kwawu daPetulu;

¹⁴akakuleji mazu akukuhandisha nachu nineyi niakwetala deyi ejima.

¹⁵Chinadiŋi nakutachika kuhosha, Spiritu Wajila hakuholokela hadi wena, mwomwaholokeleliyi hadetu hakusambila.

¹⁶Hinukwanuka mazu aMwanta eliliyi nindi, Chalala Yowanu wapapatishili mumeji, hakwila enu akayipapatisha mudi Spiritu Wajila.

¹⁷Dichi dinu, Nzambi ayinka chamukunkulu chochimu chatwinkeliyi etu hitwetiyili Mwanta Yesu Kristu, yaminyi mwaka nimoni kudikaŋa naNzambi?

¹⁸Chanatiyuwu yumiyi, amwena nizo-o; hiyakumulemesha Nzambi nawu, Komana Nzambi neteji aJentili kubalumuka munyichima amoni wumi.

¹⁹Owu apalaŋesheluwu nekabisha dasaŋumukili hansaŋu yaSetefwanu, hiyakwenda chakushika nikuFwenisiya, nikuKipirosi, nikuAntiyoki, nakushimuna mazu kudi aYudeya hohu, bayi kudi acheŋuku.

²⁰KuKipirosi nakuKireni kwadiŋi amayala amakwawu avwalikili kwenoku; wenawa chanashikuwu kuAntiyoki, hiyakuhoshahosha nawaYudeya awaHeleni nawa, nakushimuna nsaŋu yaMwanta Yesu.

²¹Chikasa chaMwanta hichikwikala nawena; amavulu nankashi hiyakwitiya, hiyakubalumuka nakutala kudi Mwanta.

²²Nsaŋu yayumiyi yitiyakana nikudi akwachipompelu chadiŋi muYerusalema, hiyakutemeshaku Baranaba akashiki nikuAntiyoki.

²³Yena chanashikiyi, chanamoniyi luwi lwaNzambi, hakutiya kuwaha; hakuyikonkomwena wejima wawu nindi akakakeli Mwanta chakutaku muchima.

²⁴Muloŋa wadiŋi iyala wamuwahi, wenzala Spiritu Wajila nikukuhwelela. Antu amavulu adibombeli naMwanta.

²⁵Baranaba hakuya nakukeŋa Sawulu kuTarusa. Chanamuwaniyi hakumuleta kuAntiyoki.

²⁶Hiyakupompaŋa hamu nachipompelu mwaka wejima, nakuleja antu amavulu nankashi. KuAntiyoki diku kwásambilili kutenawu atumbanji ijina dawakwaKristu.

²⁷Hamafuku owu, kuYerusalema hikukufuma atuprofwetu hiyakwinza kuAntiyoki.

²⁸Hikukwimana muntu wumu, ijina dindi Aŋabusi, hakushimuna ŋahu dehi naSpiritu nindi kwakenza nzala yeneni mwahita mpata yamunu mwishina mwejima. Nzaloyu yaholokeli hamafuku adiŋiyi Kaludusa mwanta.

²⁹Nochu atumbanji ejima hiyakwila nawu tukwashuku ana kwetu adi muYudeya. Hiyakuhanahana iwu mwanatwesheliyi, iwu mwanatwesheliyi.

³⁰Chaneluwu, hiyakutemesha kudi awakulumpi yuma yapompesheluwu, kumakasa aBaranaba naSawulu.