Read MUKANDA WANZAMBI Likezo 12 Bible Online

Likezo 12 - MUKANDA WANZAMBI bible

Likezo 12

¹Kafwampi wowena mafuku owu Mwanta Herodi hakwolola makasindi akabishi antu amakwawu amuchipompelu.

²Hakujaha Yakoba mana kwaYowanu nampoku yakabali.

³Chamweniyi chinatiyishi aYudeya kuwaha, hakubombelaku chuma chikwawu chakukwata niPetulu nawa. Wenowu mafuku adiŋi akudya mankendi akadi iluŋi.

⁴Chanamukwatiyi, hakumusha mukaleya, hakumuhana kudi mashidika ikumi natanu nawumu, amuhembaŋa awana awana, nindi paseka yisambili kuhita nimwidishi kudi antu.

⁵Dichi Petulu hiyakumuhembaŋa mukaleya; ilaŋa akwachipompelu hiyakumulombelaŋa naŋovu kudi Nzambi.

⁶Wowena wufuku watoŋojokelaŋayi Herodi nindi nakamwidisha kuma diki, Petulu wadiŋi wakama swataka namutulu, saŋa amukasilawu mukachi kamashidika ayedi namaleŋi ayedi, atulama adi kuchenzelu ahembeli kaleya.

⁷Kukasumuka kaŋelu kaYehova nemani dehi kwadiŋiyi; chejeji chitoŋeka nimukatala kamukachi kakaleya. Hakumweta Petulu hakabavu, hakumuhindwisha namutulu nindi, Nyamukaku swayi. Maleŋi indi aholoka nikumakasindi bambala.

⁸Kaŋelu hakumwila nindi, Vwalaku, wukasi ninkwabilu jeyi. Hakwila mwenomu. Hakumwila nindi, Dikumbakeshi ihina deyi, wunlondi.

⁹Edika nikwidika, hakumulondela. Chadiŋi nakumwilawu kudi kaŋelu, yena kwiluka nehi; hakutoŋojoka nindi namoni chimwenu.

¹⁰Chanaŋandakanuwu atulama akusambila niamuchiyedi, hiyakushika kuchenzelu chachikuŋu chakuma kuŋanda; hichikudenzulukila chacheni. Hiyakwidika, hiyakuya mumukwakwa wumu; hohenohu kaŋelu hakudiyila kwindi.

¹¹Petulu chanabazumukiyi nindi, Komanayami! Hakuhosha nindi, Ichi dinu neluki chalala, komana Mwanta nate meshi kaŋelu kindi, nampulwishi dehi kuchikasa chaHerodi, nimwejima mwadiŋi nakuchiŋejawu aYudeya.

¹²Chanatoŋojokiyi, hakuya kwitala daMariya, mama yaYowanu atumbi luwu ijina di kwawu daMaku, mwapompelawu dehi antu amavulu naku lomba.

¹³Chanadondomweniyi kuchenzelu chakuchipaŋu, hikukwinza chaŋadima chamumbanda, ijina dindi Roda, kulonda atiyilili.

¹⁴Chanelu kiyi izu daPetulu, hamweni jakumwenzulwilaku nakuzaŋalala kwanatiyiyi. Hakufunta lufuchi nakuleja akwawu nindi, Petulu nemani kuchisu iwu.

¹⁵Wena hiyakumwila nawu, Eyi wunaanŋali! Yena hakukolesha chikupu nindi mwomwenomu. Wena nawu, Kwiji hikaŋelu kindi.

¹⁶Ilaŋa Petulu saŋa adondomwenayi. Chanenzululuwu, hiyakumumona hiyakuhayama.

¹⁷Ilaŋa yena hakuyimwenesha nachikasa; hakuyilumbulwila mwanamwidishiluwu mukaleya kudi Mwanta. Hakuyila nindi, Mumulejaŋamu Yakoba niana kwetu. Hakufumaku, hakuya kwacheŋi.

¹⁸Chikunachi, kudi mashidika hikukuvwakuka ipumba, nawu Petulu nayi kudihi?

¹⁹Herodi chanamwiliyi keŋe-e, kumumona nehi, hakuyihujola atulama; hakuhosha nindi yŋahenu. Herodi hakufuma kuYudeya, hakukunkumuka kuKesareya, ashakama nikwenoku.

²⁰Herodi hakutiya kutama nankashi nawakwaTira naZidoni, wena hiyakuya kudi yena mukanka, asambila dehi kukwata wubwambu naBalasatu, yowu wahembaŋa itala dawanta, hiyakulemba nawu ashakami chachiwahi chakadi kumona njita; muloŋa ituŋa dawu datambwilaŋa kudya kwituŋa damwanta.

²¹Hashikili ifuku dakutoŋola dehi, Herodi hakuvwalavwala yuma yindi yawanta, hakushakama hetanda dindi dawanta, hakuhosha hoshe-e.

²²Antu hiyakubidika naŋovu nawu, Hiizu daNzambi, hidamuntuku.

²³Hohenohu amweta nikudi kaŋelu kaYehova, nanochu chabulililiyi kulemesha Nzambi; hiyakumudya kudi mavunu, afwa ni kufwa.

²⁴Ilaŋa mazu aNzambi hiyakuyaloŋa nakukula, asemwaŋana nikuse-mwaŋana.

²⁵ABaranaba naSawulu chanamanishuwu mudimu wawu, hiyakufuma kuYerusalema kwayiluwu, hiyakumuhitula Yowanu atumbiluwu ijina di kwawu daMaku.