Read MUKANDA WANZAMBI Likezo 13 Bible Online

Likezo 13 - MUKANDA WANZAMBI bible

Likezo 13

¹Muchipompelu chadiŋi kuAntiyoki mwadiŋi atuprofwetu niankuluŋaŋa, iwu Baranaba, iwu Simeyona atumbiluwu ijina di kwawu daNiŋeri, iwu Lusiyu wakuKireni, iwu Manena aleleleluwu hamu nanowu mwanta Herodi, niSawulu.

²Chadiŋi nakudifukulawu munyichima yawu kudi Mwanta, nakujiŋa nakuleka kudya, Spiritu Wajila hakwila nindi, ŋambwilenuku Baranaba naSawulu akeli mudimu wunayitambikili.

³Chanajiŋuwu cheŋi nakuleka kuoya, hiyakulomba, hiyakuyinaŋika makasawu, hiyakuyileka nawu ayi.

⁴Wena cheliluwu anayitemeshi dehi kudi Spiritu Wajila, hiyakuya kuSelusiya; kufuma kwenoku hiyakuya muwatu kuKipirosi.

⁵Chanashikuwu kuSalamisa, hiyakushimuna mazu aNzambi mumashikola awaYudeya. Adiŋi naYowanu Maku kulonda ekali kansi kawu.

⁶Chanahituwu muchitutu chejima nikuPafwosi, hiyakuwana kateŋa wumu hikaprofwetu wakutwamba, kaYudeya, ijina dindi Barayesu.

⁷Yenowu wadiŋi hamu namwanta waboma Serŋi Pawulu, iyala wukweti kashinshi. Yena hakutambika aBaranaba naSawulu, hakukeŋa nindi atiyi mazu aNzambi.

⁸Ilaŋa owu katepa Elimasi, dimu mwalumbulukila ijina dindi, hiyakudikaŋa nawu, nindi aluwaŋeshi owu mwanta waboma abuli kwitiya.

⁹Ilaŋa Sawulu, atenaŋawu nawu Pawulu, wenzala Spiritu Wajila, hakumushinshika swi-i,

¹⁰nindi, Eyi mwana kadiyabolu, eyi wasweja kudimbana nikutama, eyi mukwankunyi nakuloŋa kwejima, wamba kaleka kuheŋesha njila jaMwanta jaloŋa mwakanyi?

¹¹Dichi dinu tiya, chikasa chaMwanta chikukukunka, wakekala mputamesu; mukuhita chilaaka hiwakamona mwaanaku. Hohenohu kumuholokela nimbundu nimwidima bwi; hakukimbuka nakukeŋakeŋa muntu wakumukwata kuchikasa.

¹²Owu mwanta waboma, chanamoniyi chaneluwu, hakwitiya, nahayami dehi kuleja kwaMwanta.

¹³Pawulu nawakwawu hiyakufuma kuPafwosi muwatu, ashika nikuPereŋa muPamfwiliya; kwenoku Yowanu Maku hakuyishiya, hakufunta kuYerusalema.

¹⁴Ilaŋa wena hiyakuhita muPereŋa, hiyakushika kuAntiyoki wamuPisidiya. Hiyakwijila mushikola hasabata, hiyakushakama.

¹⁵Cheliluwu enimbu anakumishi dehi kutaŋa nyikanda yajila yanshimbi niyawatuprofwetu, anyuli jashikola hiyakuyitemeshela izu nawu, Enu ana kwetu, neyi mukwetuhu kadizu kakukundeja naehu antu, taŋenu.

¹⁶Pawulu hakwimana, hakwolola chikasa nindi, Enu akwetu aIsarela, ninenu mwaakamaŋa Nzambi, tiyililenu.

¹⁷Nzambi yaniwu muza waIsarela, watondeli ankakulula jetu, watúumbakesheli iwu muza hashakaminuwu mwituŋa daEjipitu, hakuyiidishamu nachikasa chakutwala kwiwulu.

¹⁸Hakukaba nawu omu mwisaŋa nyaka makumi awana.

¹⁹Chanajilumuniyi nyuza yitanu nayiyedi mwituŋa daKenani, hakuyinka ituŋa dawu diikali wuswana wawu, mwahitili nyaka kafwampi neyi makulakaji awana nanyaka makumi atanu.

²⁰Mwejimomu hakuyinkaŋa ansompeshi nichashikiluwu hadi kaprofwetu Samweli.

²¹Nkumininaku hiyakulomba mwanta walukanu. Nzambi hakuyinka mwana kaKishi, Sawulu, iyala wakumuza waBenjamini, himukuhita nyaka makumi awana.

²²Chanamufumishuwu yena, hakudiishamu Davidi ekali mwanta wawu; niyena nawa wamushimwini wunsahu nindi, Namoni dehi mwana kaJesi, Davidi, iyala damwaya muchima wami, diyi wakela munakeŋa mwejima.

²³Kwokudi anyana kayeniwu, mwomwakaniniyi dehi Nzambi, naleteli dehi Isarela Chamwinu, Yesu.

²⁴Hadiŋiyi Yesu kanda amwekani, Yowanu wasambilaŋahu dehi kushimwina muza waIsarela wejima chipapatishu chakubalumuka munyichima.

²⁵Helili Yowanu hakuya nakumanisha mafuku indi, hakuyila antu nindi, Enu munatoŋojoki nenu yaminyi? Ami hiniKristuku. Tiyenu, munyima yami imu mudi nakwinza muntu, ami hinatelela hela tuhu kusubula nkwabilu jakunyendu yinduku.

²⁶Enu ana kwetu, enu anyana akumuchidi waAbarahama, ninenu mwaakamaŋa Nzambi, tiyenu, anatutemesheli dehi mazu akutuhandisha nachu.

²⁷Chamuyambiluwu Yesu kudi antu ekala muYerusalema, hamu nawanyuli jawu, chabuliluwu kwiluka nimazu awatuprofwetu ataŋaŋawu hasabata jejima, mazu awa analumbulukili dehi nanochu chamuhishiluwu.

²⁸Cheliluwu wena kumumona nachitela chakumujahila nehi, hiyakumulomba Pilatu nawu chiŋa amujahi tuhu.

²⁹Chanamanishuwu yuma yamusonekeleluwu yejima, hiyakumukulula kumutondu, nakumukamika mwijamu.

³⁰Ilaŋa Nzambi hakumusaŋula mudi afu.

³¹Hiyakumumona mafuku amavulu kudi antu afuminiyi nawu muŊaliliya nakushi ka kuYerusalema. Ichi dinu, wena hiyayinsahu jindi akushimuna kudi antu mwamwenuwu.

³²Diyi nsaŋu yayiwahi yitunayileteli, yakaninuwu ankakulula jetu.

³³Chamusaŋwiluwu dehi Yesu mudi afu kudi Nzambi, chinalumbulukili dehi anyanetu, mwomwasonekeluwu mwisamu damu chiyedi nawu, Yeyi Mwanami, nakuvwali lelu.

³⁴Nikweniku kusaŋula kwamusaŋwiluwu kudi Nzambi mudi afu, kwákubula kufunta cheŋi mukutoka, wahoshelumu dehi mwenimu nindi, Nakakukiswila nkisu yaDavidi, yajila yalala.

³⁵Nahoshi nawa mwisamu di kwawu nindi, Hiwaketeja weyi Wajila kumona kutokaku.

³⁶Muloŋa Davidi, chamanishiliyi kukalakela akwawu ahanyaka yindi mwaya mpùŋa yaNzambi, wayili namutulu; hiyakumukamika kwakama ankakulula jindi, yotoka nikutoka.

³⁷Hakwila iwu asaŋulawu dehi kudi Nzambi hamweni kutokaku.

³⁸Dichi enu ana kwetu, leka niyileji mwiluki chachiwahi, nami mwijina dayeniwu muntu itukuyishimwina, dimu mwekala kuyanakena antu nyiloŋa.

³⁹Antu ejima akwitiya chakukuhwelela, akuyiyiŋisha kuyuma yejima mwakaŋenyuwu kuyiyiŋisha nanshimbi jaMosi.

⁴⁰Dichi babalenu, mubuli kumona mwanahoshuwu munyikanda yawatuprofwetu, nawu, Tiyenu dinu, enu akwakadiwu, muhayami, munoŋi.

⁴¹Ami nukukoŋa mudimu mumafuku enu, mudimu owu hela akayilejawu kudi muntu himwakawitiya nihantuku.

⁴²Chanedikuwu, hiyakuyilembelela nawu akayilejuhu cheŋi nsaŋu iyi hasabata yikulondelamu.

⁴³Chanamwaŋaluwu mwenomu mushikola, aYudeya amavulu ninawa abalumukili kwikala aYudeya, akwakulemesha Nzambi, hiyakulonda aPawulu naBaranaba; wena hiyakuhosha nawu nakuyishinjila kukakela muluwi lwaNzambi.

⁴⁴Sabata yalondelumu, kwasheli hanti nakupompa ŋanda yejima kulonda atiyi mazu aNzambi.

⁴⁵Ilaŋa Yudeya chamwenuwu antu amavulu, hiyakutiya ichima dasweja; hiyakutadika yuma yadiŋi nakuhoshayi Pawulu, hiyakuhosha mazu atama.

⁴⁶APawulu naBaranaba hiyakuhosha chakadi woma nawu, Chinawahi chitunasambili kushimuna mazu aNzambi kudenu aYudeya; hakwinzichi chimunayishinjikili dehi kwakulehi nanenu, munadifuukuli enu aweni nenu himunateli kwenu wumi wahaya nyakaku. Talenu, hitukubalumukila kwetu kudi aJentili.

⁴⁷Muloŋa dichi chanatulejiyi Mwanta, nindi, Nakushili kwikala chejeji chawaJentili, kulonda wakeli wakwamwina antu kushika nikwakumina maseki.

⁴⁸Chanachitiyuwu aJentili, hiyakutiya kuwaha, hiyakulemesha mazu aNzambi. Wejima wawu afuukwilawu dehi kumona wumi wahaya nyaka hiyakwitiya.

⁴⁹Mazu aMwanta atiyakana nimwahita mutambowu mwejima, ti-li-li

⁵⁰Ilaŋa Yudeya hiyakusaŋumuna ambanda alumbwa, akwakuhameka Nzambi, niakulumpi amayala amuŋandoyu, hiyakuvulumuna ikabisha dakukabisha aPawulu naBaranaba, hiyakuyihaŋa muŋinza jawu.

⁵¹Ilaŋa wena hiyakutotomwena lunkuŋu lwakunyendu yawu, hiyakuya kuIkoniyumu.

⁵²Atumbanji aswejeli muzaŋalu nikwinzala Spiritu Wajila.