Read MUKANDA WANZAMBI Likezo 14 Bible Online

Likezo 14 - MUKANDA WANZAMBI bible

Likezo 14

¹MuIkoniyumu hiyakwijila mwayedi wawu mushikola yawaYudeya, hiyakuhosha chakwila niizaza dawaYudeya nidawaHeleni dadeni hiyakwitiya.

²Hakwila aYudeya, abulili kwovwahilamu, hiyakusaŋumuna aJentili kulonda atiyi ana kwetu kutama.

³Dichi hiyakulabila kwenoku mafuku amavulu nakuhosha mudi Mwanta chakadi woma; Mwanta hakukolesha wunsahu wamazu aluwi lwindi; hakwiteja kukoŋa yinjikijilu niyihayamisha namakasawu.

⁴Izaza damuŋandoyu hidikwambuka; awa nakukundamena aYudeya, awa nakukundamena apostolu,

⁵Chanayilotokeluwu kudi aJentili nawaYudeya, hamu nawanyuli jawu, nawu ayikoŋi apostolu chatama, ayasoli malola,

⁶hiyakuchiluka, hiyakutemukila kuŋanda jamuLikoniya, jojaLisitira naDeribi, nikwituŋa danyeŋumukaku;

⁷hiyakushimuna nsaŋu yayiwahi kwenoku.

⁸KuLisitira kwadiŋi iyala wabula Ŋovu kunyendu, kanda endaŋahu dehi kufumisha havwalikiliyi.

⁹Yenowu hakutiya mwadiŋi nakuhoshayi Pawulu. Pawulu hakumushinshika swi-i, hakumumona nindi wukweti kukuhwelela kwakukola;

¹⁰hakuhosha nezu daŊovu nindi, Imanaku zululu. Yotakumuka nikutakumuka, enda nikwenda.

¹¹Mazaza awantu, chanamonuwu chuma chaneliyi Pawulu, hiyakubidika mwidimi ŋalikoniya nawu, Akishi anatusulukili nanyijimba yafwana neyi antu.

¹²Hiyakutumba Baranaba nawu Zewusi; Pawulu nawu Heremi, Muloŋa diyi waswejelaŋa kuhosha.

¹³Chikombeji chaZewusi wukweti tembeli yindi kwakwihi naŋandoyu, hakuleta aŋombi niyibaaba yamafu kuchisu chaŋanda, nindi aketuli yimuna hamu namazaza.

¹⁴Ilaŋa postolu, aBaranaba naPawulu, chanachitiyuwu, hiyakutabola mahinawu, hiyakulundumukila mwizaza dawantu;

¹⁵hiyakubidika nawu, Enu akwetu, iyi yuma yimukwila yanka? Etu nawa tuyantu twatiyaloŋa mumwatiyaŋenu; tunayileteli nsaŋu yayiwahi, yakwila netu muleki yumiyi yamukunkulwayi, mubalumuki munyichima, mutali kudi Nzambi wamumi waleŋeli iwulu niiseki, nikaluŋalwiji niyejima yekalamu.

¹⁶Nyaka yinahiti dehi munyima wetejeli nyuza yejima nindi yendi tuhu munjila jawu awenawu.

¹⁷Hela chochu, hayilekeli tuhu chakadi kuyishiyila wunsahu windi wakwila chachiwahuku. Wayinkelaŋa nvula yakufuma kwiwulu, niyilaaka yakudya, nakuyitiyisha kuwaha nayakudya, nikuluŋa mwaya nyichima yenu mwejima.

¹⁸Chahoshelaŋawu mazu awa, hasheli hanti nakukaŋanya kulekesha mazaza awantu kuyiketwila yimuna.

¹⁹Kwenoku hikukwinza aYudeya anafumi dehi kuAntiyoki nakuIkoniyumu, wena chanakanjikijuwu mazaza awantu, hiyakumwasola Pawulu malola. Chanatoŋojokuwu nawu wafwa dehi, hiyakumukokela kunsa yaloŋanda.

²⁰Chadiŋi nakwimanawu atumbanji kwakwihi nayena kwi-ndo, hakunyamuka, hakwijila cheŋi muŋandoyu. Chikunachi hakufumamu naBaranaba, hiyakuya kuDeribi.

²¹Chanashimunuwu nsaŋu yayiwahi muŋandoyu nakwilisha atumbanji amavulu, hiyakufunta cheŋi kuLisitira, nakuIkoniyumu, nikuAntiyoki.

²²Hiyakukolesha nyichima yawatumbanji, nakuyikonkomwena nawu akakeli mukwitiya kwakukuhwelela, nawu kwijila muwanta waNzambi chiŋa tusambila kumona lukadi lwaluvulu nankashi.

²³Chanayitondeluwu awakulumpi mwahita yipompelu yejima nakulomba nakuleka kudya, hiyakuyikunjika kudi Mwanta anakuhweleluwu.

²⁴Hiyakupandakana muPisidiya, ashika nikuPamfwiliya.

²⁵Chanashimunuwu mazu muPereŋa, hiyakukunkumuka kuAtaliya.

²⁶Kufuma kwenoku hiyakuya muwatu kuAntiyoki, kwayikunjikiluwu kuluwi lwaNzambi akayi nakwila mudimu waneluwu dehi.

²⁷Chanashikuwu, hiyakupompesha chipompelu, hiyakushimuna yuma yejima yaneliyi Nzambi nawena, ninichi chanayenzulwiluwu aJentili chenzelu chakukuhwelela.

²⁸Hiyakushakama nawatumbanji mafuku amavulu.