Read MUKANDA WANZAMBI Likezo 15 Bible Online

Likezo 15 - MUKANDA WANZAMBI bible

Likezo 15

¹KuYudeya hikukufuma antu amakwawu hiyakuleja akwakwitiya nawu, Chiŋa akayalamisha mwaya chila chaMosi kulonda mwakahandi.

²Chanatadikuwu nawaPawulu naBaranaba tadike-e, nikudihujola nawu, hiyakukunjika aPawulu naBaranaba ni akwawu, akayi nansaŋu iyi kuYerusalema kudi apostolu nawawakulumpi.

³Dichi chipompelu hichikuyishinjikŋaku munjila yawu; hiyakuhita muFwenisiya nimuSamariya nakushimuna chanabalumukuwu aJentili; hiyakuyiluŋisha nankashi ana kwawu ejima.

⁴Chanashikuwu kuYerusalema, hiyakuyitambula kudi chipompelu nikudi apostolu nawawakulumpi, hiyakuyishimwina mwejima mwaneliyi Nzambi nawena.

⁵Hikukunyamuka akwachaaku chawaFwarisi amakwawu etiyili dehi, hiyakwila nawu, Chiŋa ayalamishi, ayileji nawa kuhemba nshimbi jaMosi.

⁶Apostolu nawawakulumpi hiyakupompa nakutoŋojoka nsaŋu iyi hamu.

⁷Chanadihujoluwu ihujole-e, Petulu hakwimana nakuyila nindi, Enu ana kwetu, enu aweni mweluka dehi chantondeluwu kudi Nzambi mukachi kenu hamafuku akusambila, kulonda aJentili atiyi mazu ansaŋu yayiwahi kukanwa kami, amoni kwitiya.

⁸Dichi Nzambi, weluka nyichima yawantu, washimuna dehi wunsahu wakuyinka Spiritu Wajila mwomwatwinkeleliyi etu.

⁹Kwambula mukachi kawena nanetu nehi, natookeshi dehi nyichima yawu nakukuhwelela.

¹⁰Enu munakeŋelidi kumweseka Nzambi, chakwiŋija nshiŋu jawatumbanji mumpanda yakaŋenyuwu kusenda hela ankakulula jetu hela etu aweni?

¹¹Etu tunakuhweleli netu akatu handisha naluwi lwaMwanta Yesu, mwomwakayi handishilawu niwena nawa.

¹²Izaza dawantu dejima dimwena nizo. Hiyakutiyilila nsaŋu yadiŋi nakushimunawu aBaranaba naPawulu, jayinjikijilu nayihayamisha yanakoŋiyi Nzambi nawena mwawaJentili.

¹³Chanamwenuwu zo, Yakoba hakwakula nindi, Enu ana kwetu, ntiyililenu.

¹⁴Shimona nashimuni dehi chásambililiyi Nzambi kuhempula aJentili, kulonda kutambwilamu antu ambala ejina dindi;

¹⁵mwomwaya mazu awatuprofwetu asonekeluwu dehi,

¹⁶nawu, Hakulondela hayumiyi nakafunta, nakatuŋiulula cheŋi tabanaka yaDavidi yinashiwuki; nakajikajika munahumoki, nakayimika cheŋi;

¹⁷kulonda antu anashali akakeŋakeŋi Yehova, niaJentili ejima anatumbuwu ijina dami.

¹⁸Dichi chanahoshiyi Yehova welukishaŋa yuma yejimiyi kufumisha kushankulu.

¹⁹Dichi ami naketuli dehi nsaŋu, nami bayi tukabisha aJentili akubalumukila kudi Nzambuku;

²⁰ilaŋa tukuminenu dakuyisonekela netu aleki yuma yakupesha nachu akishi, niwuvumbi, nianyama akushotomona, nimashi.

²¹Muloŋa kufumisha kushankulu Mosi wukweti akwakumushi muna munyikala yejima, enda ataŋa nyikanda yindi yajila mumashikola sabata jejima.

²²Dichi apostolu nawawakulumpi, hamu nachipompelu chejima, hiyakutoŋojoka nawu, chachiwahi kutonda mukachi ketu amayala, tuyitemeshi kuAntiyoki naPawulu naBaranaba. Hiyakutonda Yuda atumbiluwu ijina di kwawu daBarasaba, niSilasi; adiŋi amayala alema mukachi kawana kwawu.

²³Hiyakuyinka mukanda wakwila nawu, Etu apostolu nawana kwenu awakulumpi, tunayimwishi enu ana kwetu amudi aJentili mudi nikuAntiyoki, nimuSiriya, nimuSilisiya.

²⁴Tunatiyi nawu kunu kudetu kunafumi antu amakwawu, anenzi nakuyikabisha namazu akuluwaŋesha nyichima yenu; etu kwetu hitwayilejeli mwoku.

²⁵Tunatiyaloŋani namuchima wumu netu chachiwahi tutondi amayala, tuyitemeshi oku kudenu, hamu nawakwetu aBaranaba naPawulu twakeŋa a,

²⁶amayala akeŋeli kufwa kukoola ijina daMwanta wetu Yesu Kristu.

²⁷Dichi tunatemeshi Yuda naSilasi, awenawu akayileja mukanwa mwomumu.

²⁸Muloŋa Spiritu Wajila ninetu tunatoŋojoki netu bayi tuyitwika chiteli chakubadika yumiyi yalemaku.

²⁹Netu, chiŋa muleki yuma yakupesha nachu akishi, nimashi, nianyama akushotomona, niwuvumbi. Neyi mukudihemba kuyumiyi chikuwaha. Shalenu chachiwahi.

³⁰Dichi wena chanayitambukishuwu, hiyakukunkumukila kuAntiyoki; hiyakupompesha chipompelu, ahana ninowu mukanda.

³¹Chanawutaŋuwu, hiyakuzaŋalala nakukundeja kwanayikunde juwu.

³²Yuda naSilasi awenawu adiŋi atuprofwetu nawa, hiyakukundeja ana kwawu namazu amavulu, ayikolesha nikuyikolesha.

³³Chanashakamuwu mpinji kwenoku, hiyakuyitambukisha chachiwahi kudi ana kwawu,

³⁴afunti kudi akwawu ayitemesheli.

³⁵APawulu naBaranaba hiyakulabila kuAntiyoki, nakuleja antu nakushimuna mazu aMwanta, hamu nawakwawu amavulu nawa.

³⁶Chimunahiti mafuku, Pawulu hakumwila Baranaba nindi, Tufuntenu nakuhempula hempula ana kwetu amunyikala yejima mutwashimwini mazu aMwanta, twakatali chanashakamuwu.

³⁷Baranaba hakwila nindi ayi naYowanu atenawu ijina di kwawu daMaku.

³⁸Ilaŋa Pawulu hakutoŋojoka nindi chatama kuya nayenowu wayishiyili kuPamfwiliya, wabulili kuya nawu kumudimu.

³⁹Kuvulumuka ntadi yayeni, hiyakwambuka; Baranaba hakusenda Maku hakuya kuKipirosi muwatu.

⁴⁰Hakwila Pawulu hakutonda Silasi; chanamukunjikuwu kuluwi lwaMwanta kudi ana kwindi, hakuya munjila yindi.

⁴¹Hakuhita muSiriya nimuSilisiya, nakukolesha yipompelu.