Read MUKANDA WANZAMBI Likezo 16 Bible Online

Likezo 16 - MUKANDA WANZAMBI bible

Likezo 16

¹Hakushika kuDeribi nikuLisitira. Kutala kudi kambanji wumu kwenoku, ijina dindi Timotewu, mwana kamumbanda wakaYudeya wetiya; hakwila tata yindi wadiŋi kaHeleni.

²Himuntu ahamekawu kudi ana kwindi adiŋi kuLisitira nakuIkoniyumu.

³Hiyakumukeŋa kudi Pawulu nindi ayaloŋa nindi. Chanamutambuliyi hakumwalamisha, kuchina aYudeya adiŋi munyikala yakwenoku, muloŋa antu ejima eluka dehi nawu tata yindi kaHeleni.

⁴Chayilaŋawu nakuhitahita munyikala, hiyakuyilejaleja yijila yayilejeluwu kudi apostolu nawawakulumpi kuYerusalema, nawu ayovwahili.

⁵Yipompelu hiyikudikolesha mukwitiya kwakukuhwelela, akwakwitiya hiyakuya nakusemwaŋana hefuku hefuku.

⁶Hiyakupandakana kuFwilipa nakuFwilipa, muloŋa Spiritu Wajila wayilekesha dehi kushimuna mazu muAsiya.

⁷Chanashikuwu kwatalaŋana naMisiya, nawu eseki kuya kuBitiniya, Spiritu yaYesu kuyiteja nehi.

⁸Hiyakupandakana haMisiya, akunkumukila nikuTirowasi.

⁹Pawulu hakumona chimwenu nawufuku; hakumona iyala wakuMasidoniya, nemani nakumulembelela nindi, Zambukilaku kunu kuMasidoniya, wutukwashuku.

¹⁰Chanamoniyi chimwenu ochu, hohenohu tukeŋa nikuya kuMasidoniya, tuneluki dehi netu Nzambi natutambiki, kulonda twakashimuni nsaŋu yayiwahi kudi antu akwenoku.

¹¹Dichi hitukufuma kuTirowasi muwatu, twimakana zwa nikuSamotirasi; chikunachi tushika nikuNeyapoli.

¹²Tufuma nikwenoku tuya nikuFwilipi, yoŋanda yamuMasidoniya yalema, mwatuŋishawu dehi aRoma mashidikawu. Hitukulabila muŋandoyu mafuku amakwawu.

¹³Hitukwidika kuchisu chamuŋanda hasabata, hitukuya kuchi kumu chakaloŋa, kutwatoŋojokeli netu kwiji diku kwapompelaŋawu nakulomba. Hitukushakama nakuhoshahosha nawambanda apompeli kwenoku.

¹⁴Mumbanda wumu, ijina dindi Lidiya, wakumukala waTiyatira, mukwakulandisha mahina awusombu, mukwakuhameka Nzambi, hakututiya. Mwanta hakwenzulula mumuchima windi, kulonda atiyi nsaŋu yakuhoshayi Pawulu.

¹⁵Chanamupapatishuwu niyena niakwetala dindi, hakutulembelela nindi, Neyi munanmoni nenu netiyi Mwanta, iŋilenu mwitala dami tushakami nenu. Hakutushinjila chakutushinjila.

¹⁶Chelili hitukuya kwalombelaŋawu, hiyakutubulakana kudi chaŋadima chamumbanda, wazakukaŋa demoni wakuhoŋa; ŋombu yindi diyi yaheteshaŋayi nachu anyanta jindi.

¹⁷Yenowu hakulondaŋa Pawulu nanetu nakubidika nindi, Awa amayala hiyaloŋamba jaNzambi Mukwakubadika, hiyakuyishimwina njila yakuhandila.

¹⁸Hakwilaŋa mwenimu mwahita mafuku amavulu. Ilaŋa Pawulu hakutiya kumuchima bwi; hakushetumuka nakumwila owu demoni nindi, Nakuleji mwijina daYesu Kristu, nami mufumi. Amufuma nihohenohu.

¹⁹Anyanta jindi, chanamonuwu mwakuhwelelaŋawu leuheta munafumi dehi, hiyakukwata aPawulu naSilasi, hiyakuyikokela kuwulandilu, kumesu awanyuli.

²⁰Chanayitwaluwu kudi ansompeshi, hiyakwila nawu, AYudeya awa hiyatuvuba adi nakukabisha nankashi ŋanda yetu.

²¹Hiyakutuleja yaaku, kuyitambula hela kuyovwahila kudetu aRoma chinjila.

²²Izaza hidikuyilu ndumukila nandombu, ansompeshi hiyakutabula mahinawu, hiyakuleja mashidika nawu yetenu natubama.

²³Chanayetuwu tubama twatuvulu hiyakuyinatila mukaleya; hiyakuleja mukwakuhemba kaleya, nawu ayihembi chachiwahi.

²⁴Yena chanamulejuwu ochu, hakuyishinjikila mukatala kamukachi kakaleya, hakupata nyendu yawu mumpompa.

²⁵Ilaŋa mukachi kawufuku, aPawulu naSilasi adiŋi nakulomba nakwimbila Nzambi tumina, iku antu amukaleya enda ayitiya.

²⁶Kukasumuka himutentanshi waweni; chikuku chetala dakaleya hichikutenta nte-nte, yenzelu yejima yenzuluka nihohenohu, nyonji yawantu ejima amukaleya yisubuka nikusubuka.

²⁷Mukwakuhemba kaleya hakubazumuka namutulu, hakumona kuyenzelu yakaleya kwachashi; hakuhola mpoku yindi yakabali, nindi adŋahi, muloŋa natoŋojoki nindi antu amukaleya anatemuki dehi.

²⁸Ilaŋa Pawulu hakubidika nezu daŊovu nindi, Bayi wudikatishaku, yetu awa wejima wetu.

²⁹Hakutambika antu aleti yimunyi, hakukilukilamu, iku wudi nikuzaala woma, hakudinata heseki kunyendu yaPawulu naSilasi.

³⁰Hakuyiidishamu nindi, Enu anyanta, nukwila ŋahi nihandi?

³¹Wena nawu, Mukuhwelelenu Mwanta Yesu, wuhandi nineyi niakwetala deyi.

³²Hiyakushimwina yena, niantu ejima amwitala dindi, mazu aMwanta.

³³Yena hakuyitwala yoyena mpinji yawufuku oyu, hakukosakosa nyinkakambu yawu; amupapatisha niyena niayindi ejima hohenohu.

³⁴Hakuyiŋa mwitala dindi, hakuyitulila yakudya. Hakuzaŋalala nankashi chanakuhweleliyi Nzambi niayindi ejima.

³⁵Chelili kunachi dehi, ansompeshi hiyakutemesha atulama, nawu, Yilekenu amayala ayi tuhu.

³⁶Mukwakuhemba kaleya hakulejamu Pawulu, nindi, Ansompeshi anatemeshi izu dakwila nawu, Yenu. Dichi dinu fumenumu muyi chachiwahi.

³⁷Ilaŋa Pawulu hakuyila nindi, Kutweta anatweteli hatooka chakadi kutuhisha, kutoŋa etu tuyaRoma; hiyakutunatila mukaleya, atufumishumu kumbadi? Chinjila! Enzaŋa kwawu awenawu atufumishumu.

³⁸Atulama hiyakuleja ansompeshi mazu awa. Chanatiyuwu nawu hiyaRoma, atiya niwoma.

³⁹Hiyakwinza nakuyilembelela. Chanayifumishuwu hiyakulomba nawu, Fumenu mwani kuŋanda yetu.

⁴⁰Hiyakufuma mukaleya hiyakuya kwaLidiya. Chanamonuwu ana kwetu nakuyikundeja, hiyakufuma kwenoku.