Read MUKANDA WANZAMBI Likezo 17 Bible Online

Likezo 17 - MUKANDA WANZAMBI bible

Likezo 17

¹Chanaŋandakanuwu muAmfwipoIi nimuApoloniya, ashika nikuTesalonika kwadiŋi shikola yawaYudeya.

²Pawulu hakwijila muneyi chelilaŋayi dikalu, hakutadika nawu mwomwaya nyikanda yajila, sabata jisatu.

³Hakuyilumbulwila nakukolesha chikupu nindi, Chalala chateleleli Kristu kukaba nakusaŋuka mudi afu; nindi, Iwu Yesu inidi nakuyishimwina, diyi Kristu.

⁴Amakwawu hiyakwiteja, hiyakudibomba nawaPawulu naSilasi, niaHeleni akwakuhameka Nzambi izaza dadeni, niambanda alema amavulu.

⁵Ilaŋa Yudeya, anatiyi dehi ichima, hiyakufumba amayala atama amukunkulwayi, hiyakupompesha izaza dawantu, avwakula niipumba mwahita ŋanda yejima. Hiyakulotokela kwitala daYasoni, hiyakukeŋa nawu ayiidishi kudi antu.

⁶Chanakaŋanyuwu kuyiwana, hiyakukokela Yasoni niana kwetu amakwawu kumesu awanyuli jaŋanda, nakubideka naŋovu nawu, Wenawa hiyatuvuba anavunduli mpata yamunu mwishina yejima, anenzi nikunu nawa;

⁷anayitambuli kudi Yasoni. Wejima wawu hiyovwahilaŋa nshimbi jaKesaruku, elaŋa nawu kudi mwanta walukanu wacheŋi, yowu Yesu.

⁸Izaza dawantu nianyuli jaŋanda, chanatiyuwu yumiyi, atiya nimumuchima futu.

⁹Chanatambuluwu kapopu kudi Yasoni nawakwawu, hiyakuyumbaku nawu ayi.

¹⁰Hohenohu ana kwetu hiyakutemesha aPawulu naSilasi kuBereya nawufuku. Chanashikuwu, hiyakwijila mushikola yawaYudeya.

¹¹AYudeya akwenoku hiyakubadika amuTesalonika kalemesha, muloŋa wena anyakeli kutambula mazu; hiyakutalatala munyikanda yajila hefuku hefuku, amoni neyi yumiyi dimu yaya.

¹²Dichi amavulu hiyakwitiya; niambanda aHeleni alumbwa amavulu, hela amayala kukeha nehi.

¹³Ilaŋa Yudeya akuTesalonika, chanelukuwu nawu Pawulu nashimuni dehi mazu aNzambi muBereya nawa, hiyakuya kwenoku nakuyibobwesha, kulonda afutwishi munyichima yezaza dawantu.

¹⁴Ana kwetu atemesha niPawulu hohenohu, ayi akashikaŋahu dehi kukaluŋalwiji; aSilasi naTimotewu hiyakushala kwenoku.

¹⁵Antu amutweleluku Pawulu hiyakumushikŋa kuAtenisi. Chanayilejiyi nindi aSilasi naTimotewu akanyakali kwinza, hiyakufunta.

¹⁶Pawulu chadiŋi nakuyichiŋililayi kuAtenisi, spiritu yindi hiyikutiya chikela, chanamoniyi ŋanda yejima yinenzali akishi to.

¹⁷Dichi hakutadikaŋa mushikola nawaYudeya nawakwakufukula kudi Nzambi; nikuwulandilu nawantu akudimonayi nawu, hefuku hefuku.

¹⁸AEpikureya nawaSitoki amakwawu adiŋi akwakukeŋakeŋa maana, hiyakumubulakana. Amakwawu hiyakwila nawu, Iwu Sakubobola keŋa ahoshi nindidi? Amakwawu nawu, Kwiji hakushimuna akishi akwituŋa dacheŋi; nanochu chadiŋi nakushimunayi Yesu, nikusaŋuka mudi afu.

¹⁹Hiyakumukwata kuchikasa, hiyakuya nindi hampidi yaMarasa; hiyakumwila nawu, Iyi nsaŋu yayiha yiwudi nakushimuna, etu nawa tukutwesha kuyiluka, tahindi?

²⁰Wunaleti nsaŋu yacheŋi kumatu etu; dichi tunakeŋi twiluki nsaŋu iyi.

²¹Akwa Atenisi ejima, hela enyi, hiyelili chuma chacheŋuku, akuminini dakushimuna hela kutiya chuma chachiha hohu.

²²Dichi Pawulu hakwimana hakachi kampidi yaMarasa, hakwila nindi, Enu akwetu amayala akwaAtenisi, namoni mwasweja kukeŋa kupeshapesha.

²³Muloŋa chinadiŋi nakuhitahita hinukumona yuma yimwapeshaŋa; hinukuwana nawa kameŋa kakusoneka nawu, Kameŋa kaNzambi wakadi kwilukewa. Dichi yeniwu mwapeshaŋa chakuyamba, diyi nukuyishimwina.

²⁴Yowu Nzambi waleŋeli mpata yamunu mwishina niyuma yejima yidumu, diyi Mwanta wamwiwulu niweseki. Hashakamaŋa kwindi mumatembeli akutuŋa namakasa awantuku;

²⁵hela kumukalakela hiyamukala kelaŋa namakasa awantu, mwaka eli nindi nakeŋi chumaku. Mulona yena diyi wenkaŋa antu wumi nimuuya niyuma yejima.

²⁶Wafumishili kudi muntu wumu nyuza yawantu ejima, kulonda ashakami heseki dejima. Hakuyitoŋwela yilaaka yawu, niŋinza jawu mwakushakaminawu.

²⁷Nindi akakeŋakeŋi Nzambi, hamwaha akamupapata, akamuwana; kutoŋa yena hekala kwakulehi nanetu ejimaku.

²⁸Muloŋa mudi yena dimu mutwahandilaŋa, dimu mutwendelaŋa, dimu mutwekalilaŋa. Mwomwaneluwu akwakusoneka enwenu aweni amakwawu nawu, Twafuma kudi yena.

²⁹Ichi dinu chituneli twafuma kudi Nzambi, wuNzambi hitwadi kuwutoŋojoka netu wudi neyi wuru indi kwiji siliva, indi kwiji ilola dabazaŋawu nawukalawenu wamaana amuntuku.

³⁰Nzambi wadiwili oyu nyaka yakuyamba; hakwinza katataka naleji antu ejima kwejima kwejima, nindi abalumuki munyichima.

³¹Muloŋa nashumu dehi ifuku damba kasompeshayi matuŋa mwaloŋa, neyala anafuukuliyi dehi. Mwenomu nakoleshumu dehi kudi antu ejima, nanochu chanamusaŋuliyi mudi afu.

³²Dichi wena chanatiyuwu nsaŋu yakusaŋuka mukufwa, amakwawu hiyakuseha; hakwila amakwawu nawu, Tunakeŋi kutiya cheŋi nsaŋu iyi.

³³Dichi Pawulu hakufuma mukachi kawu.

³⁴Amayala amakwawu hiyakumukakela, hiyakwitiya; adiŋi iwu Diyonisi mukwampidi yaMarasa, nimumbanda wumu ijina dindi Damarisi, hamu nawamakwawu nawa.