Read MUKANDA WANZAMBI Likezo 19 Bible Online

Likezo 19 - MUKANDA WANZAMBI bible

Likezo 19

¹Helili Apolosi wudi kuKorinda, Pawulu hakuhita mwituŋa dakundundamu, hakushika kuEfwesesa, hakuwana atumbanji amu.

²Hakuyihula nindi, Enu chimwetiyili, mwatambwili Spiritu Wajila? Hiyakumwila nawu, Nehi, hela tuhu kutiya nawu Spiritu Wajila anamuhani dehi, hitunatiyuku.

³Yena nindi, Indi ayipapatishili nachipapatishu chanyi? Nawu, Nachipapatishu chaYowanu.

⁴Pawulu hakwila nindi, Yowanu wapapatishilaŋa nachipapatishu chakubalumuka mumuchima; walejelaŋa antu nindi amwitiyi yowu wukumulondela munyima, yowu Yesu.

⁵Chanatiyuwu mwenimu, hiyakuyipapatisha mwijina daMwanta Yesu.

⁶Pawulu chanayinaŋikiyi makasindi, Spiritu Wajila hakwinza hadi wena; hiyakuhosha madimi cheŋi nakuprofweta.

⁷Kuyichinda wejima wawu, adiŋi amayala kwiji ikumi nayedi.

⁸Hakwijila mushikola, hakuhoshaŋa chakadi woma mwahita tukweji tusatu, nakutadika nakushinjila mwaya nsaŋu yawanta waNzambi.

⁹Chanadikaŋuwu amakwawu, kwonti kwawu kwovwahila, hiyakutena Njila chatama, iku izaza dawantu ditiyaloŋa, Pawulu hakufuma kudi wena, hakufumishaku atumbanji, hakutadikaŋa mushikola yaTiranusa hefuku hefuku.

¹⁰Welilaŋa mwenomu nyaka yiyedi, chakwila aYudeya nawaHeleni ejima ashakama muAsiya hiyakutiya mazu aMwanta.

¹¹Nzambi wakoŋelaŋa nyidimu yaŋovu yacheŋi hohu kumakasa aPawulu.

¹²Akata ayitwelelaŋa hela malesu hela mahina akufuma kumujimba windi, nyisoŋu yawu hiyikuyifuma, niademoni azakukilaŋawu hiyakuyifuma.

¹³Hakwila aYudeya amakwawu, akwakutambatamba, akwakufumisha ademoni, hiyakukwata Ŋovu jakutenena antu azakukilaŋa ademoni ijina daMwanta Yesu, nawu, Tunayisanyikishi mwijina daYesu ashimunaŋayi Pawulu, netu fumaku.

¹⁴Mukulumpi wawatupristu wumu ijina dindi Seva, kaYudeya, wadiŋi nawanyanindi amayala atanu nayedi elilaŋa mwenomu.

¹⁵Demoni hakuyakula nindi, Yesu namwiluki, Pawulu nawa namwiluki, ilaŋa enu yenu anyi?

¹⁶Owu iyala wazakukili demoni hakuyimotokela, hakujama nawu; ayimika nimushindu wejima wawu, hiyakutemoka mwitalodu nzekesi, ayikatisha dehi.

¹⁷Chumichi hichikutiyakana kudi aYudeya nawaHeleni ashakama kuEfwesesa ejima; wejima wawu hiyakutiya woma, ijina daMwanta Yesu ditoha nikutoha.

¹⁸Chanetiyuwu antu amavulu, hiyakwiteja mwatamishiluwu, nikushimuna mweliluwu.

¹⁹Amakwawu amavulu elilaŋa tufuta twacheŋi nitwacheŋi, hiyakupompesha nyikanda yawu nakuyochela hatooka; kweseka wuseya wanyikandoyu kumona wunashiki mumakombakaji asiliva makumi atanu.

²⁰Dichi mazu aMwanta hiyakukula nikwimika mushindu.

²¹Kulondela hayumiyi, Pawulu hakutoŋojoka mudi Spiritu nindi, Neyi nahiti dehi muAkaya nimuMasidoniya, nakaya nikuYerusalema; chinakela nayi dehi kwenoku, chiŋa nimona kuRoma nawa.

²²Chanatemeshiyi muMasidoniya ankwashi jindi ayedi, iwu Timotewu, iwu Erasitusi, yomweni hakulabila muAsiya mafuku amakwawu.

²³Hamafuku wowenawa hikukuvulumuka ipumba dadeni nansaŋu yaNjila.

²⁴Muloŋa iyala wumu, ijina dindi Demeterusa, muchi wasiliva, wachililaŋa mukishi waDiyana wasiliva, hakuheteshaŋa ankoŋi maheta amavulu;

²⁵hakupompesha ankoŋi owu, hamu nawakwawu akoŋelaŋa mudimu wowumu, hakuyila nindi, Enu akwetu, mweluka nenu kumudimu iwu diku kutwahetelaŋa.

²⁶Munamoni, munatiyi, hikuEfwesesa hohuku, ilaŋa kunashali kwanti nakwila mwahita Asiya mwejima, iwu Pawulu wakanjikŋa dehi antu amavulu, nakuyibalumuna munyichima yawu, nindi akishi akutuŋa namakasa hidiwu Nzambuku.

²⁷Chuma chitukukeŋa kumona kukala, chakwila mudimu wetu iwu keŋa wuseki; himwenomu hohuku, tembeli yambala yamukishi wamumbanda walema Diyana, keŋa eli chimwaŋaji. Kudi chuma chikwawu nawa, wanta windi waweni walemeshaŋawu muAsiya mwejima, chalala hela mumpata yamunu mwishina yejima keŋa wusawuki.

²⁸Chanatiyuwu mwenimu, nyichima yawu hiyikukuma mbe nakuzuwa; hiyakuvwakuka nawu, Diyana wawaEfwesesa muneni!

²⁹ŋanda yejima yiluwaŋana nikuluwaŋana; hiyakulotokela mwibulu dawu deneni namuchima wawu wumu, anakwati dehi aGayusi naArisitaka, amayala akuMasidoniya akwakwenda naPawulu.

³⁰Cheliliyi Pawulu nindi epili mwibulu mwanapompeluwu antu, atumbanji kumwiteja nehi.

³¹Atulamba amakwawu akuAsiya, adiŋi amabwambu jindi, hiyakumutemeshela izu dakumulembelela nawu, Bayi weseka kwijila mwibuluku.

³²Amakwawu hiyakubideka chuma chimu, amakwawu chuma chikwawu; muloŋa chipompelu chejima chaluwaŋana dehi, amavulu nikwiluka nsaŋu yanapompeluwu nehi.

³³Hiyakufumisha Alesanderi mwizaza dawantu, aYudeya hiyakumusha kumbidi. Alesanderi hakweseka kuyimwenesha nachikasa chindi, nindi akwati kukulumbulwila antu nsaŋu oyu.

³⁴Ilaŋa chanelukuwu nawu hikaYudeya, hiyakuvwakuka wejima wawu izu dawu dimu hohu, mwahita ora jiyedi, vwakuke-e, nawu, Diyana wawaEfwesesa muneni!

³⁵Kalala kaŋandoyu chanamweneshiyi izaza hakwila nindi, Enu akwetu amayala aEfwesesa, hadi muntu wayamba ŋanda yawaEfwesesa chiyahembaŋa tembeli yaDiyana muneni, nimukishi waholokeli kwiwulu kudi Zewusi, tahindi?

³⁶Chineli yumiyi, kwosi muntu natweshi kutadika mwokuku, komana enu mwadi kumwena, himwadi kunyakala kwila chumaku.

³⁷Munaleti kunu awa amayala anabuli hela kwiya yuma yamumatembeli, hela kutena chatama mukishi wetu wamumbanda.

³⁸Dichi Demeterusa nawantu akoŋelaŋa mudimu wowumu, neyi akweti nsaŋu yakudiholokela, yota yidi kwoku, nianyanta aboma adi kwoku, adiholokeli kwawu.

³⁹Ilaŋa neyi munakeŋi kuhosha nsaŋu yacheŋi, akuyisompeshela muchota chawawakulumpi awantu ejima chalumbuluka.

⁴⁰Muloŋa keŋa tumoni muloŋa nansaŋu yandombu yalelu; neyi twakamona mwenomu, hitwakatwesha kulumbulula chachiwahi nsaŋu yitunapompeluku.

⁴¹Chanahoshiyi mwenomu hakumwaŋa antu.