Read MUKANDA WANZAMBI Likezo 2 Bible Online

Likezo 2 - MUKANDA WANZAMBI bible

Likezo 2

¹Chelili ifuku dapentekosta dinashiki dehi chikupu, wejima wawu adiŋi hamu mwomumu.

²Kukasumuka mwiwulu himukufumalushindu ludi neyi lwampepela yikukunka naŋovu yasweja nankashi, hilukwinzesha itala dejima mwadiŋi nakushakamawu.

³Hikukuyimwekena madimi aambuka, adi neyi nyizuzu yakesi; hiyikuwilawila hadi wena ejima hamuntu hamuntu.

⁴Wejima wawu hiyakwinzala Spiritu Wajila, hiyakutachika kuhosha madimi acheŋi, mwomwayinkeleluwu kudi Spiritu kuhosha.

⁵Henohu kuYerusalema kunashakami aYudeya, amayala akweti kalemesha kakulemesha Nzambi, anafumafumi kwahita nyuza yamunu mwishina yejima.

⁶Chinatiyakani olu lushindu, izaza dawantu hidikupompa, hiyakuketwila dakuhayama nikutiya woma, nanichi chadiŋi nakuyitiyawu nakuhosha wejima wawu, iwu mwidimi dindi, iwu mwidimi dindi.

⁷Wejima wawu hiyakukasumuka nikuhayama chikupu nawu, Talenu, awa akuhosha, wejima wawu hiyaŊaliliyaku?

⁸Indi tudi nakutiya ŋahi, wejima wetu hamuntu hamuntu, iwu mwidimi dindi dachisemwa, iwu mwidimi dindi dachisemwa?

⁹AParatiya nawaMediya, niaElamiti nawantu ashakama muMesopotamiya, nimuYudeya, nimuKapadosiya, nimuPontu, nimuAsiya,

¹⁰nimuFwirŋiya, nimuPamfwiliya, nimuEjipitu, nikumutamba waLibiya kwakwihi naKireni; nawantu anafumi kuRoma, aYudeya nawanabalumuki kwikala aYudeya;

¹¹niaKereta niaArabiya; hitukuyitiya nakuhosha mumadimi etwetu aweni nakutena nyidimu yaNzambi yaŋovu.

¹²Hiyakukasumuka wejima wawu nikujinoka chikupu; hiyakudihula muntu namukwawu nawu, Ichi chaya mudihi?

¹³Ilaŋa makwawu hiyakuseha nawu, Anasheti dehi vinyu yayiha.

¹⁴Petulu hakwimana chimu nekumi nawumu, hakubidika nakuyileja nindi, Enu akwetu aYudeya, ninenu ejima mwashakama muYerusalema, leka niyileji chachiwahi mwiluki; ntiyililenu munukuyileja.

¹⁵Nami wenawa hiyanasheti neyi chimudi nakutoŋojokaku; kutoŋa ifuku dichidi ora yamuchisatu hohu.

¹⁶Chuma chimunamoni, chochuma chateneni kaprofwetu Yoweli,

¹⁷nindi, Nzambi nindi, Chakela hamafuku akukuminina, nakechila yaSpiritu yami hadi antu ejima; ni anyanenu amayala nawambanda akaprofweta, anyikwenzi enu akamona yimwenu, mapalenu amayala akalota malota.

¹⁸Mwamweni, nihadi anduŋu jami amayala nawambanda nakechila yaSpiritu yami hamafuku akalondelamu, akaprofweta.

¹⁹Nakamwekesha yuma yakuhayamisha mwiwulu haluzwizu, niyinjikijilu hamaseki mwishina; mashi ni kesi nikufwinda wishi.

²⁰Itaŋwa dakabalumuka mwidima, nikakweji kakabalumuka nge neyi mashi, hamba kakeŋa kwinza ifuku daYehova datiyakana deneni.

²¹Chakela, muntu wakatambika ijina daYehova wakapuluka.

²²Enu akwetu amayala aIsarela, tiyenu niyileji, nami Yesu wakuNazareta, iyala etejeluwu kudi Nzambi nanyidimu yaŋovu, niyihayamisha, niyinjikijilu yeliliyi Nzambi nayena mukachi kenu, neyi chimuneluki dehi enu aweni;

²³yena amuheni chakusambila dehi kushakama hampùŋa, chakwiluka ŋahu dehi kudi Nzambi, enu mwamupopeleli kukulusu namakasa awantu atama, himukumujaha.

²⁴Nzambi chanamusubuliyi mumakabi akufwa, hakumusaŋula; muloŋa kufwa hikwadiŋi naŋovu jakumukwataku.

²⁵Muloŋanamuteni dehi kudi Davidi nindi, Namweni Yehova kumesu ami mafuku ejima; wudi kuchikasa chami chachidiilu, kulonda jibuli kunkuma.

²⁶Dichi muchima wami hiwukutiya kuwaha, niidimi dami hidikutena nsaŋu yakuluŋa; Eŋa, mujimba wami hiwukushakama nakuchiŋeja.

²⁷Muloŋa hiwakanshiya mukaluŋaku, hela kumwiteja weyi wajila kumona kutoka nehi.

²⁸Wakanleja njila yawumi; hakushakama kumesu eyi kudi muzaŋalu waweni.

²⁹Enu ana kwami, leka niyileji nsaŋu yankakulula Davidi, nami wafwili dehi, amujiikili dehi, ŋamu dindi twekala nadu nilelu.

³⁰Dichi chadiŋiyi kaprofwetu, nichelukiliyi nindi Nzambi nasanyiki dehi nakudishiilamu, nindi kudi anyana akavwalayi wakashakamisha wumu hetanda dindi dawanta;

³¹dichi chamwenaŋahu dehi chumichi, hakutena nsaŋu yakusaŋuka kwaKristu kwamudi afu, nindi hiyamushiyili mukaluŋaku, hela mujimba windi hiwamweni kutokaku.

³²Yeniwu Yesu Nzambi wamusaŋwili mukufwa, wejima wetu tunachimoni namesu.

³³Dichi chanamutúumbakeshuwu dehi nakumusha kuchikasa chaNzambi chachidiilu, chanatambuliyi dehi kudi Tata Spiritu Wajila akaniniyi, anechili chumichi chimuneli nikumona nikutiya.

³⁴Muloŋa Davidi hakandamini mumawuluku; ilaŋa yomweni nahoshi nindi, Yehova wamwilili Mwanta wami,

³⁵nindi, Shakamaku kuchikasa chami chachidiilu nichinakayilisha akwankunyi neyi itanda dakunyendu yeyi.

³⁶Dichi enu akwamutaŋa waIsarela ejima, ilukenu kwenu chalala, iwu Yesu mwapopeleli kukulusu, Nzambi namubalumuni dehi kwikala niMwanta diyi, niKristu diyi.

³⁷Chanatiyuwu mwenimu, alemana nimunyichima yawu. Hiyakuyila aPetulu nawapostolu amakwawu nawu, Enu ana kw-etu, tukwila ŋahi?

³⁸Kuchinka Petulu nindi, Balumukenu munyichima yenu, ayipapatishi wejima wenu mwijina daYesu Kristu, kulonda kuyanakena nyiloŋa yenu; mutambuli chamukunkulu chaSpiritu Wajila.

³⁹Muloŋa diyi ayikanawu dehi ninenu ni anyanenu, niantu ejima ekala kwakulehi, ejima akatambikawu kudi Yehova Nzambi yetu enzi kudi yena.

⁴⁰Hakuyishimwina nakuyishinjila chikupu namazu amakwawu amavulu nindi, Pulukenu kudi antu achisakichi chaheŋa.

⁴¹Dichi wena atambwili mazu indi hiyakuyipapatisha; ifuku denodu hiyakubombelaku antu kafwampi neyi makombakaji asatu.

⁴²Hiyakukakela mbe mukuleja kwawapostolu, nimukukundaŋana, nimukuhumuna mankendi, nimukulomba.

⁴³Antu ejima atiya niwoma. Apostolu hiyakwila yihayamisha yayivulu niyinjikijilu.

⁴⁴Owu ejima etiyili hiyakwikala hohamu; yuma yiikala niyawu yebomba

⁴⁵Hiyakulandisha mahetawu niyuma yawu, hiyakupaŋila akwawu ejima mwabulililuwu.

⁴⁶Hiyakukakela mutembeli hefuku hefuku, namuchima wawu wumu, nakuhumuna mankendi mumatalawu;

⁴⁷hiyakutiya kuwaha nakudyaloŋana, nakuhameka Nzambi namuchima wawuwahi. Hiyakuyimona kuwaha kudi antu ejima. Mwanta hakubombelaku hefuku hefuku awa adiŋi nakuhanda.