Read MUKANDA WANZAMBI Likezo 22 Bible Online

Likezo 22 - MUKANDA WANZAMBI bible

Likezo 22

¹Nindi, Enu ana kwetu, ninenu atata, tiyenu munukudihakwila kudenu.

²Chanatiyuwu wudi nakuhosha nawu mwidimi daHeberu, asweja nikumwena.

³Hakuhosha nindi, Ami nikaYudeya, navwalikilili kuTarusa muSilisiya, ilaga nadizili muŋanda yinu kunyendu yaGamaleli; anfumbilaga mwalogelanshimbi jawankakulula jetu chikupu; nadipi nakumukalakela Nzambinapovu neyena kumuchima, neyi chimudi nakwila wejima wenu lelu.

⁴Nakabishilaŋa akwaNjila yinu hela kuyijaha; nadiŋi nakukasakasa amayala nawambanda nakuyisha mutuleya.

⁵Hela kapristu muneni hichinsahuwukushimuna tuhu, niakulumpi ejima. Wowu anyinkeli nyikanda yakudi akwetu aYudeya, kulonda nakayi mulwendu lwakuDamakasa, nakaleti akwakwitiya munyonji ku Yerusalema, kulonda akayibabeshi.

⁶Chinadiŋi nakuya munjila yami, hinukushika kwakwihi naDamakasa, itaŋwa mwiwulu; kukasumuka chejeji cheneni chakufuma mwiwulu hichikutoŋekelami kwi-ndo.

⁷Hinukudimbuka hamaseki, nitiya niizu hidikuŋila nindi, Eyi Sawulu, Sawulu, wankabishila ŋadi?

⁸Hinukwakula nami, Yeyinyi Mwanta? Yena hakuŋila nindi, Yami Yesu wakuNazareta, yami wankabishaŋa.

⁹Akwetu twadiŋi nawu, chalala chejeji achimweni, hakwila izu danowu wadiŋi nakuhosha nanami hiyaditiyiluku.

¹⁰Hinukwila nami, Nukwila ŋahi, Mwanta? Mwanta hakuŋila nindi, Nyamukaku, wuyi muDamakasa, diku kwakakulejelawu mudimu wejima wanakukunji kuwu.

¹¹Chinakaŋenyi kumona nalubanji lwakulema lwachejeji ochu, akwetu nadiŋi nawu hiyakunkwata kuchikasa, hinukwijila muDamakasa.

¹²Muntu wumu ijina dindi Ananiya, iyala wukweti kalemesha kakulemesha nshimbi, amuhamekelaŋa kudi aYudeya ejima ashakamini kuDamakasa;

¹³hakwinza kudami, hakwimana kwakwihi, hakuŋila nindi, Eyi mana kwami Sawulu, tonaku. Hohenohu hinukutona, hinukumumona.

¹⁴Yena hakwila nindi, Nzambi yawankakulula jetu nakukunjiki kwiluka muchima windi, wumoni Mukwakuloŋa, wutiyi izu dakukanwa kindi.

¹⁵Muloŋa wakekala chinsahu chindi chakushimuna kudi antu ejima yuma yiwunamoni nikutiya.

¹⁶Wukulabiladi dinu? Nyamukaku, akupapatishi, wutooki kutooka kwakukufuma nyiloŋa yeyi chiwukutambika ijina dindi.

¹⁷Chineli nafunti dehi kuYerusalema, hinadiŋi nakulomba mutembeli, hinukwila neyi nayi namutulu.

¹⁸Hinukumumona Yesu, hakuŋila nindi, Nyakalaku, wufumi swayi muYerusalema, Muloŋa hiyakwiteja wunsahu weyi wakunshimunaku.

¹⁹Hinukwila nami, Mwanta, awenawu aneluki nashili akwakwitiya amumashikola ejima mukaleya, nikuyeta chikupu.

²⁰Chamwaŋiluwu mashi achinsahu cheyi Setefwanu, ami kwoku nemeni, hinukwitejamu, hinukuhemba mahina anawa adiŋi nakumujaha.

²¹Hakuŋila nindi, Yaku tuhu, muloŋa ami nakakutemesha kudi aJentili kwakulehi.

²²Hiya kumutiya kushika nihezu odu; henohu hiyakuvwakuka nawu, Muntu wudi ichi hadi kwikala hamasekuku. Hanateli kuhandaku.

²³Iku adi nakubideka naŋovu, nakutabola mahinawu, nakunata lunkuŋu kwiwulu,

²⁴mukulumpi muneni hakuyila mashidika nindi mwŋi ŋenu mwitala denu, nindi mwesekenu nachikoti kulonda niluki nsaŋu yaku mubi dekawu.

²⁵Chanamukasuwu nanyisúulu, Pawulu hakumwila senturinu wadiŋi nakwimana kwakwihi, nindi, Kweta kaRoma chakadi kumuhisha, hichinjilaku?

²⁶Chana chitiyiyi, senturinu hakuya kudi mukulumpi muneni, hakumuleja nindi, keŋa wili chumanyi? Yeniwu muntu hikaRoma.

²⁷Mukulumpi muneni hakwinza, hakumwila nindi, Nleji, eyi wukaRoma? Yena nindi, Eŋa.

²⁸Mukulumpi muneni hakwakula nindi, WuRomiwu ami nawulandili namali amavulu nankashi. Pawulu nindi, Hakwila ami kwami dimu munavwalikila.

²⁹Henohu wena akeŋeli kumweseka amufuma niku mufuma. Mukulumpi muneni niyena, chanelukiyi nindi Pawulu hikaRoma hakutiya woma, nanochu chanamukasiyi.

³⁰Chikunachi, hakukeŋa kwiluka chakashinshi nsaŋu jana mumo nuwu naju kudi aYudeya; hakumusubula, hakuleja awakulumpi jawa tupristu nichota chejima nindi akapompi hamu; hakumutwala nakumwimika Pawulu kumesu awu.