Read MUKANDA WANZAMBI Likezo 23 Bible Online

Likezo 23 - MUKANDA WANZAMBI bible

Likezo 23

¹Pawulu hakushinshika akwachota swi-i nindi, Enu ana kwami, ami nendi kumesu aNzambi nachinleji chamuchima chachiwahi hohu, kushika nikwifuku ŋalelu.

²Kapristu muneni Ananiya hakuyila antu emeni kwadiŋi yi, nindi amweti kukanwa.

³Pawulu hakumwila nindi, Nzambi wakakweteyi, mbaŋu yakupembesha! Eyi wushakami nakunsompesha mwaya nshimbi, wuleji antu neyi mwetenu, chakumotoka nshimbi?

⁴Antu emenuku hiyakumwila nawu, Wutuki kapristu muneni wambala waNzambi?

⁵Pawulu nindi, Enu ana kwetu, hinamwiluki nami diyi kapristu munenuku. Muloŋa nasoneki nawu, Kutena nyuli yawantu enu chatama, chinjila.

⁶Pawulu chanelukiyi nindi komana aneli awa aSadusi, awa aFwarisi, hakubidika mwenomu muchota nindi, Enu ana kwetu, ami nikaFwarisi, ni mwana kawaFwarisi! Nsaŋu yadi nakunsompeshelawu yoyakuchiŋeja kusaŋuka kwamba kasaŋuka afu.

⁷Chanahoshiyi chochochu, aFwarisi nawaSadusi hiyakuvwakuka ntadi, nichota chambuka nihakachi.

⁸Muloŋa aSadusi elaŋa nawu hikwekala kusaŋukaku; nawu hikwekala hela kaŋelu, hela spirituku. Hakwinza aFwarisi etiyaloŋa mwonsu.

⁹Henohu avwakuka niipumba vwi-i. Ansoneki jawaFwarisi hiyakwimana, hiyakuzuwa nawu, Iwu muntu hitunamumoni nachuma chatamaku. Kwiji kaŋelu diyi nahoshi nayena, indi kwiji spiritu.

¹⁰Chihanamwekani ndombu yasweja, mukulumpi muneni hakwakama nindi keŋa amusansoli Pawulu. Hakuleja mashidika nindi, Kunkumukenu mumwamuki naŋovu mukachi kawu, mumuleti mwitala denu.

¹¹Wufuku walondeluku, Mwanta Yesu hakwimana kwadiŋi Pawulu, hakumwila nindi, Tiyaku kuwaha; muloŋa chiwunanshimuni wunsahu muYerusalema, dichi wamba kashimuna nikuRoma nawa.

¹²Chikunachi, aYudeya hiyakudipompesha, hiyakusanyika naŋovu nawu, Etu kudya nakunwa chiŋa tunajahi Pawulu.

¹³Wenawa ashakamini hampùŋaoyu adiŋi abadika makumi awana.

¹⁴Hiyakuya kudi awakulumpi jawatupristu nikudi awakulumpi, hiyakuyila nawu, Tunasanyiki dehi kusanyika kwakudishiŋa netu, Etu kutompa kudya chiŋa tunasambili dehi kujaha Pawulu.

¹⁵Dichi dinu enu niakwachota, mumulejaŋa mukulumpi muneni nenu akenzi naPawulu kudenu kumadiki; chidi neyi munakeŋi kwihulansaŋu yindi chakashinshi. Etu twakela kanda tuhu aswili nikwakwihi, mwaka twamujaha dehi.

¹⁶Komana mwiha kaPawulu chanatiyiyi chakukeŋa kumubelaminawu, hakwijila mwitala damashidika nakumuleja Pawulu.

¹⁷Pawulu hakutambika senturinu wumu nindi, Mutwali iwu mukwenzi kudi mukulumpi muneni; wukweti kalusaŋu kakukeŋa kumulejayi.

¹⁸Dichi hakumutwala nakumushikŋa kudi mukulumpi muneni. Hakumwila nindi, Pawulu, muntu wamukaleya, nantambiki, naŋili nindi nikuleteli iwu mukwenzi, wukweti kalusaŋu kakukeŋa kukulejayi.

¹⁹Mukulumpi muneni hakumukwata kuchikasa, hakuya nindi hambadi. Hakumwihula kwakanka wawu nindi, Wudi nakalusaŋwinyi kuwukukeŋa kunleja?

²⁰Hakumuleja nindi, AYudeya anatiyaloŋani kukulomba nawu wakakunkumuki naPawulu kuchota kumadiki, chidi neyi anakeŋi kwihula nsaŋu yindi chakashinshi.

²¹Hakwila eyi bayi wuyitejaku, muloŋa kunamubelamini dehi amayala akubadika makumi awana; anadishiŋi nawu, kudya hela kunwa chiŋa tunamujahi dehi. Chitudi nakuhosha ichi anabatami dehi, adi nakutalila muwukukeŋa kudishiika nawu.

²²Mukulumpi muneni hakufuntisha yenowu mukwenzi, hakumwila nindi, Yaŋa kweyi; ichi chiwunanleji, bayi wulejamu muntu niwumuku.

²³Hakutambika asenturinu ayedi nindi, Loŋeshenu mashidika makulakaji ayedi, niakwatuwalu makumi atanu nayedi, niakwamayoŋa makulakaji ayedi, akayi kuKesareya; akanyamuki ora yawufuku yamu chisatu.

²⁴Nindi, Mukeŋa nianyama akwendela, mushuhu Pawulu, akamutwali chachiwahi kudi nguvulu Felisi.

²⁵Hakusoneka mukanda wakwila nindi,

²⁶Ami Kaludusa Lisiya, nidi nakusoneka mukanda weyi eyi nguvulu Felisi walema nankashi. Tunayimwishi mwani.

²⁷Yeniwu iyala amukwatili kudi aYudeya, akeŋeli kumujaha; hinukuyikasumwisha namashidika, hinukumupulwisha, muloŋa namudyi nawu hikaRoma.

²⁸Chinakeŋeli kwiluka muloŋa wanamwinkuwu, hinu kumu kunkumwisha kuchota chawu.

²⁹Kutiya komana anamwinki muloŋa wansaŋu janshimbi jawu, himuloŋa wakutela kufwa hela nyonjuku.

³⁰Chananlejuwu nawu anamushakamini muntu iwu hampùŋa, hinukunyakala kumutemesha kudeyi, hinukuleja anamuholokeli nami akenzi nakumuholokela kudeyi. Shalenu chachiwahi.

³¹Dichi mashidika hiyakwila mwayilejeluwu, hiyakumutambula Pawulu nakumutwala kuAntipatira nawufuku.

³²Chikunachi, hiyakumushiya nawakwatuwalu; wena hiyakufunta kwitala damashidika.

³³Chanashikuwu kuKesareya, hiyakumwinka nguvulu mukanda, ashikŋi niPawulu kudi yena.

³⁴Chanawutaŋiyi hakwihula nindi, Himuntu wakuwuloŋi winyi?

³⁵Chanelukiyi nindi himuntu wakuSilisiya, hakwila nindi, Nakatiya nsaŋu yeyi chachiwahi chakenzawu anakuholokeli. Hakuleja mashidika nindi muhembenu mwitala daHerodi dawanta.