Read MUKANDA WANZAMBI Likezo 24 Bible Online

Likezo 24 - MUKANDA WANZAMBI bible

Likezo 24

¹Chimunahiti mafuku atanu, kapristu muneni Ananiya hakushika nawawakulumpi amu, niihaku dawu ijina dindi Teritulu. Hiyakumuleja nguvulu muloŋa waPawulu.

²Chana mutambi kuwu Teritulu, yena hakutachika kushimuna muloŋa waPawulu. Nindi, Chiwuna tushakamishi chachiwahi chamwena, niyuma yatama yayivulu yamwenaŋa muza wetu wunayololi dehi namaaneyi,

³twachitambulaŋa mafuku ejima mwejima, eyi Felisi wasweja kulema nankashi, twasakililaŋa nankoshi jajivulu.

⁴Ilaŋa hinakeŋi mwani kukulabishaku, nakenda kakuzeyesha. Niketuli dakukulembelela wututiyi tumazu twanti naluwi lwambala wekala nalu.

⁵Iyaliwu tunamumoni hikavuba, wasaŋumunaŋa majita mwahita aYudeya mumpata yamunu mwishina yejima. Himukulumpi wawakwachaaku chawaNazareta.

⁶Yeniwu wadiŋi nakweseka nindi ajiloli tembeli; tumukwata nikumukwata netu tuniusompeshi mwaya nshimbi jetu.

⁷Ilaŋa mukulumpi muneni Lisiya hakwinza nandombu yayeni, hakutwamukayi.

⁸Hakuleja etu tunamuholokeli, nindi twinzi kudeyi. Mwihuli tuhu eyi aweni, wiluki chachiwahi mwejima namutunamwinkeli nyiloŋa.

⁹AYudeya niwena hiyakukoleshamu nawu chalala kwaamu.

¹⁰Nŋuvulu chanamulejiyi nachikasa nindi ahoshi, Pawulu hakwakula nindi, Chineluki nami eyi wunasompeshi dehi muza wetu nyaka yayivulu, dichi natiyi kuwaha kudi hakwila.

¹¹Eyi aweni wukushinshika tuhu chinayili kuYerusalema nakudifukula kudi Nzambi, kanda muhiti nimafuku ikumi nayedi.

¹²Hiyanweni mutembeli nakutadika namuntu niwumuku; hela kuvulumuna ipumba mumashikola aweni, hela tuhu muŋanda nehi.

¹³Hiyakutwesha kunhisha nayuma yananholokeluwuku.

¹⁴Hela chochu, nukwiteja tuhu kudeyi nami nakalakelaŋa Nzambi yawankakulula jetu mwaya chaaku chatenaŋawu nawu Njila; netiyaloŋa yuma yejima mwaya nshimbi, niyanasonekuwu atuprofwetu.

¹⁵Namukuhwelelaŋa Nzambi mwomwakuhwelelaŋawu niwena nawa, nami kwamba kekala kusaŋuka kwawaloŋa nikwawabula kuloŋa.

¹⁶Chinachiŋejaŋa mwenimu nadikwatishaŋa nankashi, kulonda nidimoni nawa, nami kudi Nzambi nikudi antu nabuli muloŋa mafuku ejima.

¹⁷Dichi dinu chiyahitili nyaka yayivulu, chinadiŋi nakuletela akwetu akwamuza wami yamukunkulu, nikulambula Nzambi,

¹⁸aYudeya akuAsiya hiyakunwana nadijilika dehi mutembeli, chakadi izaza hela tuhu ipumba.

¹⁹Wenowu diwu ateji kwinza kunu nakunholokela kudeyi, neyi akweti nsaŋu nanami.

²⁰Hela wenowu ashimuni tuhu chuma chatama chamwenuwu chinemani muchota;

²¹kwiji dodizu dinemeni nakubidika naŋovu mukachi kawu nami, Mudi nakunsompesha lelu nsaŋu yakusaŋuka kwawafu.

²²Felisi, nanochu chelukayi dehi nsaŋu yaNjila chakashinshi, hakuhachika nsaŋu nindi, Chakenzayi mukulumpi muneni Lisiya, nakasompa nsaŋu yenu.

²³Hakumuleja senturinu kumuhemba chachiwahi mukaleya chakadi kumukabisha; nindi bayi alekesha amabwambu jindi kwinza nakumukalakelaku.

²⁴Chimunahiti mafuku amakwawu, Felisi hakwinza naŋodindi Durisila, yena nawa hikaYudeya; hakutumesha Pawulu, hakumutiya chakushimunayi nsaŋu yindi yakukuhwelela Kristu Yesu.

²⁵Chashimwiniyi jakuloŋa, nŋakudihemba, nŋakusompa kwamba kenza, Felisi hakuza ala woma; hakwakula nindi, Lelu yaloŋa kweyi; neyi namoni hahawahi nakakutambika.

²⁶Hakukuhwelela nindi akumwinka mali kudi Pawulu; dihu hafuminaŋa kumutambika nakuhanjika nindi hanti nahanti.

²⁷Chimunahiti nyaka yiyedi, Felisi hiyakumuswana kudi Porokiwu Fesitusi. Chakeŋeliyi Felisi kutiyisha aYudeya kuwaha, hakumulekela Pawulu mukaleya.