Read MUKANDA WANZAMBI Likezo 26 Bible Online

Likezo 26 - MUKANDA WANZAMBI bible

Likezo 26

¹Agripa hakumwila Pawulu nindi, Anakwiteji kudi hakwila eyi aweni. Pawulu hakwolola chikasa hakudihakwila;

²nindi, Eyi mwanta Agripa, natiyi mwani kuwaha kudi hakwila kumesu eyi ifuku ŋalelu, nihiti mwejima mwananholokeluwu kudi aYudeya.

³Muloŋa eyi aweni weluka dehi nankashi yaaku yawaYudeya yejima, nimwehu jola ŋawu; dichi nalembi mwani, diwunjiki wuntiyilili chachiwahi.

⁴AYudeya ejima aneluki munekalilaŋa mwejima kufumisha kuwukwenzi wami, mukachi kamuza wetu nimuYerusalema.

⁵Awenawu aneluki kufumisha kutachi, chinadiŋi kaFwarisi, chochaaku chakwitiya kwetu kwasweja kujila. Neyi eteja kushimunamu, adi kushimuna tuhu.

⁶Nsaŋu yinemeni nakunsompesha yoyakuchiŋeja chuma chakaniniyi Nzambi ankakulula jetu.

⁷Chochakalakelaŋa nyichidi yetu ikumi nayiyedi naŋovu, niwufuku nimwaana, nawu amba kachimona. Kuchiŋejoku diku kunanholokeluwu aYudeya, eyi mwanta.

⁸Muloŋanyi mwamonaŋa kukala kwitiya chasaŋulaŋayi Nzambi afu?

⁹Chalala ami aweni natoŋojokelaŋa nami chachiwahi kwila yuma yayivulu nakudikaŋa nejina daYesu wakuNazareta.

¹⁰Eŋaŋi, nelilaŋa muYerusalema mwenimu nawa. Chinatambwili Ŋovu kudi awakulumpi jawatupristu, hinukukasakasa akwakujila amavulu, hinukuyisha namutuleya. Chadiŋi nakuyijahawu, ami nadiŋi nakwitejamu.

¹¹Nayibabeshelaŋa kakavulu mwahita mashikola ejima; nesekelaŋa kuyikanjikŋi kulonda atuki Nzambi. Chinaswejelaŋa kuyizuwila neyi kuzaluka hohu, hinukuyikabishaŋa hela kunyikala yakumatuŋa acheŋi.

¹²Eyi mwanta, chinadiŋi munjila yami yakuya kuDamakasa namukanda waŋovu wakunyinka kudi awakulumpi jawatupristu,

¹³iku nidi munjila, itaŋwa dinashiki dehi mukachi kewulu, hinukumona chejeji chidi nakufuma mwiwulu, chakubadika kutoŋeka kwamwaana wetaŋwa, hichikutoŋekela hinadiŋi ami nawakwetu nendelaŋa nawu kwi-ndo.

¹⁴Chitunadimbuki wejima wetu hamaseki hinukutiya izu dakuŋila mwidimi daHeberu nawu, Eyi Sawulu, Sawulu, wankabishilaŋadi? Ochu chiwudi nakusobola kunyumba, yidi nakukulemeka.

¹⁵Nami, Yeyinyi Mwanta? Mwanta nindi, Yami Yesu wankabishaŋa.

¹⁶Nyamukaku dinu wimani; chinamwekani kudeyi nalondi nikukunjiki kumudimu wakwikala mukwakukalakala nichinsahu, nanochu chiwunanmonami, nichiwamba kanmona.

¹⁷Nakakupulwisha kudi aYudeya nikudi aJentili kunukukutemesha,

¹⁸kulonda wutoneshi mesu awu, abalumuki afumi kumwidima epili muchejeji; afumi kuŊovu yaSatana ayi kudi Nzambi; kulonda amoni kuyanakena nyiloŋa, atambuli wuswana hamu nanawa aneli ajila nakunkuhwelelami.

¹⁹Eyi mwanta Agripa, chimwenu chamwiwulu chinamweni hinachidiwiluku.

²⁰Hinukutachika kushimuna kuDamakasa, nimuYerusalema, nimwahita ituŋa daYudeya dejima, nikudi aJentili nawa, nami abalumuki munyichima atali kudi Nzambi, akoŋi nyidimu yatelela kubalumuka mumuchima.

²¹Diyi nsaŋu yankwatililuwu aYudeya mutembeli, hiyakweseka nikunjaha.

²²Chanankwashuwu kudi Nzambi, dichi chinamoni kukakela kushika nikwifuku ŋalelu, nakushimwina nianyanya niamaneni. Hinashimunaŋa yacheŋuku, chiŋa yoyashimwinuwu dehi atuprofwetu naMosi nawu yakenza;

²³yoyu nsaŋu yakwila nawu Kristu chiŋa akakabi, akekali wakusambila kusaŋuka mudi afu, kulonda kumwekesha nachu chejeji kudi aYudeya nikudi aJentili.

²⁴Chadiŋi nakudihakwilayi Pawulu mwenomu, Fesitusi hakuhosha nezu daŊovu nindi, Eyi Pawulu, wazaluka! Maaneyi asweja diwu anakuzalukishi.

²⁵Kuchinka Pawulu nindi, Eyi Fesitusi wasweja kulema, hinazalukuku; ilaŋa hinukuhosha mazu alala, amumesu mwawunda.

²⁶Muloŋa mwanta wambala nidi nakuhosha nindi chakadi chibeŋu, yena nayiluki yumiyi, ninami nawa neluki chikupu nami yumiyi hiyakuyamba yenaku, muloŋa yumiyi hiyayilili kumbaduku.

²⁷Eyi mwanta Agripa, atuprofwetu wayiitiyaloŋa? Neluki nami wayiitiyaloŋa.

²⁸Agripa hakumwila Pawulu nindi, Nakunshinjila chenochu chantesha hohu, keŋa wumbalumuni niikali mukwaKristu!

²⁹Pawulu nindi, Hela chantesha hohu, hela chasweja kuvula, nalombi kudi Nzambi nami, akubalumuni nineyi, niantu ejima adi nakuntiya lelu, mwikali neyi chinekalami; kubula kwanawa maleŋi hohu.

³⁰Mwanta hakunyamuka, ninguvulu, niBerenisi, ni akwawu adiŋi nakushakama nawu.

³¹Chanayuwu kumbadi, hiyakuhanjika nsaŋu oyu mukachi kawu. Hiya kuti ya ŋana nawu, Iwu muntu haneli yuma yakutela kufwa hela yakumukasa munyonjuku.

³²Agripa hakumwila Fesitusi nindi, Iwu muntu, neyi wabula kwila nindi niyi kudi Kesari, mutenowu adi kumuumbaku tuhu kwindi.