Read MUKANDA WANZAMBI Likezo 27 Bible Online

Likezo 27 - MUKANDA WANZAMBI bible

Likezo 27

¹Chaneluwu nawu twakayi kuItaliya muwatu, hiyakumuhana Pawulu nawakwakaleya amakwawu kudi senturinu wumu, ijina dindi Yuliyusi, wamuchendu chaAgusitusi.

²Hitukwijila muwatu wakufuma kuAdamitumi, wukukeŋa kunyamuka henohu nakuya munjila yakukulisha Asiya, nakukunkakunka kunyikala yakwenoku. Hitukuya hakaluŋalwiji muwatu owu, tudi naArisitaka, kaMasidoniya wakuTesalonika.

³Chikunachi tudata nikuZidoni. Yuliyusi wamwilili Pawulu chachiwahi, hakumwiteja kuya nakudya nawamabwambu jindi.

⁴Hitukufuma kwenoku muwatu nakukulisha Kipirosi, muloŋa mpepela jadiŋi nakukeŋa kutufuntisha munyima ho-o.

⁵Hitukuketula muhoŋi wamukaluŋalwiji, wela Silisiya iku, Pamfwiliya iku; tushika nikuMira wamuLisiya.

⁶Kwenoku senturinu hakumona watu wakuAlesanderiya wudi nakuya kuItaliya; hakutwiŋijamu.

⁷Watu wetu hiwukwenda chovu chakukabakana hohu mafuku amavulu, tushika nikwatalaŋana naKinidusi. Chaneliyi mpepela yichidi kukeŋa kutufuntisha munyima, hitukuya nakukulisha Kereta kwatalaŋana naSalimoni.

⁸Kwenoku twakulishili chakukabakana hohu, tushika nikwatenaŋawu nawu kuMeji Awunda, kwakwihi namukala waLaseya.

⁹Chimunahiti mafuku amavulu, nikwenda kwela dehi kwafwana, muloŋa mafuku akuleka kudya anahiti dehi,

¹⁰Pawulu hakuyikonkomwena nindi, Kuch Enu akwetu, natoŋojoki nami lwendu lwetu lwakekala lwakala, lwakukisaŋana yuma nankashi, hiyikumba yidi muwatu hohuku, hela ninetu aweni kwiji twakafwa tuhu.

¹¹Senturinu wabaŋili chalala mukwakwendesha watu nimwiniwatu, hakwila chahosheliyi Pawulu yena kubaŋamu nehi.

¹²Muloŋa mwenomu mwawoŋakana mwabulili kuwaha kuchelukilamu noŋa, dichi amavulu hiyakwila nawu tufumi kwenakunu muwatu, tuyi tukabili kushika kuFwenisi, tuchelukili kwenoku. Fwenisi himukala wakuchikumu chakuKereta, kwatala iku kukabeta, iku kumusela, iku nawa kukabeta kakwawu, kwekala kwawoŋakana.

¹³Chitunamoni mpepela yakukabeta kakuchidiilu hiyikukunka chovu chovu, atoŋojoka nawu anamoni mwakeŋa awu; hiyakufumisha mumeji chikuŋu chakwimikisha nachu watu, hiyakukulisha Kereta kwakwilii nachikumu.

¹⁴Ilaŋa chakadi nikuleha, hikukwinza hadi watu mpepela yasweja Ŋovu yakufuma kumusela.

¹⁵Chiyinakwati hawatu wetu, hiwukukaŋanya kutala kukwinza mpepela, hitukukumina dakuyovwahila, tuhuŋumuka nikuhuŋumuka tuhu.

¹⁶Chitunahiti mumukulishu wakachitutu kanyanya ijina daku Kaluda, hitukukasa kawatu chakukabakana hohu;

¹⁷chanakikokuwu kwiwulu hiyakujiŋa watu weneni nanyonji yamaneni nankashi nawu awukoleshi. Chanatiyuwu woma nawu keŋa atunati kuwusekulula kudi machiŋi chiŋi, hiyakulemuna mahina akuwatu, hituleuketula dakuhuŋumuka.

¹⁸Chikunachi, tuchidi kukabakana nankashi nanoyu mpepela yasweja, hiyakutachika kunata yuma yamuwatu mumeji.

¹⁹Hefuku damu chisatu hiyakunata yuma yakwendesha nachu watu namakasawu aweni.

²⁰Chineli nimutena nitutumbwa kututoŋekela mafuku amavulu nehi, oyu mpepela yeneni yichidi kukunka, chikuhwelela chejima chakwila netu tukuhanda hichikutufuma.

²¹Chanashakamuwu nanzala mafuku amavulu, Pawulu hakwimana mukachi kawu nindi, Enu akwetu, neyi mwantiyililili, mutenowu mwabulili kufuma kuKereta, mubuli kumona kukabakana kwejimiku, nikujimbesha yuma.

²²Ichi dinu nukuyikundeja nami tiyenu kuwaha, hikukufwa mwinenu hela wumuku, chiŋa yowu watu hohu.

²³Muloŋa wufuku wowenawunu kaŋelu kaNzambi yami, wanheta nakalakelaŋa nawa, wemana kunidami.

²⁴Hakuŋila nindi, Eyi Pawulu, bayi wutiya womaku; chiŋa wakemani kumesu aKesari hohu. Tiya, Nzambi nakwinki dehi akwenu ejima wudi nakwenda nawu muwatu.

²⁵Dichi dinu enu akwetu, tiyenu kuwaha Muloŋa namukuhweleli Nzambi, neluki chikupu nami mwanahoshiyi mwakamwekana mwejima.

²⁶Hela chochu, akatunatila hachitutu chimu.

²⁷Chikunashiki wufuku wekumi nachiwana, hitukuhuŋumuka niniku niniku mukaluŋalwiji kaAdiriya. Kwiji kwela dehi mukachi kawufuku, akwakwendesha watu hiyakutoŋojoka nawu hiyakuya nakuswila kwakwihi nampata yimu.

²⁸Hiyakweseka mwakunamina meji, hiyakuwana kudi nyonji makumi ayedi. Chihanahiti mpinji yanti hiyakweseka cheŋi, hiyakuwana kudi nyonji ikumi nayitanu.

²⁹Hiyakutiya woma, nawu keŋa atunati hamalola akuchikumu; hiyakuzelumuna yikuŋu yakwimikisha nachu watu yiwana kuntoŋi yakunyima; hiyakulomba nawu kuchi.

³⁰Akwakwendesha watu hiyakukeŋa kutemuka muwatu, anazelumuni dehi kawatu kanyanya mumeji, kulonda adimbani nawu tukukeŋa kuzelumwina yikuŋu yakwimikisha nachu kuntoŋi yakumbidi.

³¹Dichi Pawulu hakumwila senturinu namashidika nindi, Neyi wenawa ákubula kushala muwatu himukutwesha kuhandaku.

³²Mashidika aketula ninyonji yakawatu oku, hikakuholoka.

³³Chikwakeŋa eli kucha, Pawulu hakuyilembelela wejima wawu, nindi dyenu. Nindi, Lelu ifuku dekumi nakawana dimunashakami nanzala, kudyahu chuma nehi.

³⁴Dichi nalembi mwani, dyenu muhandi; hikwakajimbala hela lusuki lwamuntu nilumuku.

³⁵Chanahoshiyi ochu, hakutambula dinkendi, hakumusakilila Nzambi, iku wejima wawu amutiyaloŋa; hakudihumuna nakutachika kudya.

³⁶Wejima wawu hiyakutiya kuwaha, hiyakudya niwena nawa.

³⁷Kubomba etu antu ejima twadiŋi muwatu owu, twashika mumakulakaji ayedi namakumi atanu nayedi niantu atanu nawumu.

³⁸Chanekutuwu, hiyakunata tidiku mumeji kulonda kupepesha watu.

³⁹Chikunachi dehi, hiyelukili mpatoyuku. Nawu atali, hiyakushinshika kumu kwawoŋakana, kudi wusekulula kuchi kumu; hiyakutiyaloŋana nawu tukuŋikiluku watu, neyi tunatweshi.

⁴⁰Chanaketuluwu nyonji yayikuŋu yakwimikisha nachu watu, hiyakuyilekela mumeji; hiyakusubula mapitu adiŋi akwolola nachu watu, hiyakulema ihina dakumbidi kulonda dikwati mpepela, hiyakweseka kuya kuchi kumu.

⁴¹Ilaŋa chanashikuwu halunduka wusekulula, watu hiwukukakela hawusekulula; ntoŋi yakumbidi hiyikukakela mbe, ilaŋa ntoŋi yakunyima hiyikutachika kubaluka naŋovu jamankanda.

⁴²Mashidika atiyaloŋana dehi nawu akajahi akwakaleya, nawu akenda kela amakwawu akasala, hiyakapuluka.

⁴³Ilaŋa senturinu wakeŋa eli kumuhandisha Pawulu, dichi hakuyilekesha kwila mwenomu. Hakuyileja nindi, antu ejima anatweshi kusala adumbi mumeji akashikaŋahu dehi kumpata.

⁴⁴Anabuli kutwesha kusala akwati kumapalanga, hela kuyuma yakuwatu, chaneluwu mwenomu hiyakupuluka chachiwahi, ashika nikuchikumu.