Read MUKANDA WANZAMBI Likezo 28 Bible Online

Likezo 28 - MUKANDA WANZAMBI bible

Likezo 28

¹Chitunapuluki dehi, hitukwiluka ijina dachitutu ochu netu Melita.

²Enimbu hiyakututambula wejima wetu naluwi nankashi, hiyakubutula kesi muloŋa kwadiŋi nakunoka nvula, nichishika hamu,

³Pawulu chanakuŋuliyi chita chansonsu, nachishi dehi hakesi, kabandayula chanatiyiyi iyena, hakufuma hakesi halamata nikuchikasa chindi.

⁴Enimbu chanamonuwu inoka nalamati dehi kuchikasa chindi, hiyakudileja muntu namukwawu, nawu, Chalala iyaliwu himbanji, hela wapuluka dehi mukaluŋalwiji, Chiyuli hanamwiteji kuhandaku.

⁵Ilaŋa yena hakudikumuna inoka mukesi, kutiya kukata nehi.

⁶Wena enimbu atoŋojokeli nawu keŋa anani, indi kwiji tukukasumuka nadimbuki nafwi dehi. Chaneluwu talile-e, kumumona yena hanatiyi chuma chatamaku, hiyakubalumuka munyichima yawu, nawu komana himukishi.

⁷Kwenoku kwadiŋi mpata yamwanta wachitutu ochu ijina dindi Pubilusi. Yena hakututambula hakutudiisha chachiwahi mafuku asatu.

⁸Chelili tata yaPubilusi nakami dehi nayikatu yamusoŋu wamashika nikapokota, Pawulu hakwijila mudi yena, hakulomba, chanamunaŋikiyi makasa, hakumukolesha.

⁹Chaneliyi mwenimu, antu amakwawu hachitutu ochu adiŋi nanyisoŋu, hiyakwinza, hiyakuyikolesha nawa.

¹⁰Hiyakutulemeshaŋa nakutwinka yuma yayivulu; chitwakeŋa eli kuya muwatu hiyakushamu yuma yayivulu yakudiila munjila.

¹¹Chimunahiti tukweji tusatu, hitukuya muwatu wakufuma kuAlesanderiya, wukweti chinjikijilu chaAnyana Mpamba, wachelukilaku dehi noŋa kuchitutu ochu;

¹²tudata nikuSirakusa, hitukujiŋilaku mafuku asatu.

¹³Kufuma kwenoku hitukuya niniku niniku, tunyeŋumuka nakushi ka nikuReŋumi. Chikunahiti ifuku dimu, mpepela yakukabeta kakuchidiilu hiyikutachika kukunka, tushika nikuPuteyoli mumafuku ayedi hohu.

¹⁴Kwenoku hitukuwana ana kwetu, hiyakulembelela tushakami nawu mulungu wumu. Nkumininaku tushika nikuRoma.

¹⁵Chanatutiyuwu kuRoma, ana kwetu hiyakwinza nakutukinkilila kuwulandilu waApiyusi, nikuYisolu Yisatu. Pawulu chanayimoniyi, hakusakilila Nzambi, akwata niŋovu.

¹⁶Chitunepili muRoma, hiyakumwiteja Pawulu kushakama kanka windi neshidika wamuhembelaŋa.

¹⁷Chimunahiti mafuku asam, Pawulu hakutambika awakulumpi jawaYudeya. Chanapompuwu hamu, hakuyileja nindi, Enu akwetu amayala, ami hinakoŋi chuma chakutamisha akwetu aYudeya, hela yaaku yawankakulula jetuku. Hela chochu, ankwatili kuYerusalema nakunhana kudi aRoma; wena hiyakuŋusha mukaleya.

¹⁸Wena chanaŋihujoluwu, hiyakukeŋa nawu aŋumbuku, muloŋa hiyanmona nachitela chakufwaku.

¹⁹Chanatiyuwu aYudeya kutama mwenomu, ami hinukumona nami kunashali jakulomba kuya kudi Kesari hohu; ochu ni kweti muloŋa wakuholokela akwamuza wetu wanyi.

²⁰Dihu hanafumi kuyitambika, nami niyimoni nihoshi nenu. Anankasili ileŋi idi nsaŋu yakuchiŋeja kwachiŋe jaŋawu aIsarela.

²¹Wena hiyakumwila nawu, Hitunatambuli nyikanda yakufuma kuYudeya yakukuteneyuku. Hela ana kwetu enjili kunu, kukushimuna hela kukutena chatama nehi.

²²Ilaŋa tunakeŋi tukutiyi muwatoŋojokaŋa eyi aweni; hakwila chaaku ichi tweluka dehi netu achitenaŋa chatama kwejima kwejima.

²³Chanamushi ikuwu ifuku, aYudeya amavulu nankashi hiyakwinza kwitala kwashakaminiyi. Yena hakuhita munsaŋu oyu, hakushimuna wanta waNzambi, hakuyilumbulwila nsaŋu yaYesu, chakufumisha munyi kanda yanshimbi jaMosi, niya watuprofwetu, kufumisha kubudidi ndo nikumelela.

²⁴Amakwawu hiyakwiteja mwahosheliyi, amakwawu hiyakuleka.

²⁵Chanabuluwu kutiyaloŋana mulwawu, hiya kudi fumi namu. Henohu Pawulu nahoshi dehi izu dimu nindi, Mwalala mwahosheli Spiritu Wajila nawankakulula jenu mudi kaprofwetu Isaya,

²⁶cheliliyi nindi, Yaku wakaleji antu awa neyi, Kutiya mukutiya, himwakashinshika nihantuku; kumona mukumona, himwakeluka nihantuku.

²⁷Muloŋa nyichima yawantu awa yinasupi dehi, kumatu awu anajiki, ni kumesu awu anajimi; akenda kamona namesu awu, akenda katiya namatu awu, akenda kashinshika munyichima yawu, akenda kabalumuka cheŋi nakenda kayuka.

²⁸Dichi ilukenu nenu iwu wamwinu waNzambi anawutemeshi kudi ajentili; komana wena akatiya.

²⁹Chanahoshiyi mazu awa, aYudeya hiyakufumaku hiyakutadika nankashi mukachi kawu.

³⁰Pawulu washakamini nyaka yiyedi yamana chikupu mwitala dindi dakudifwetela; hakutambula antu ejima ayilaŋa mwadiŋiy.

³¹Hakushimunaŋa wanta waNzambi, nakutena nsaŋu yaMwanta Yesu Kristu chakadi woma; kwosi nawa wamulekesheluku.