Read MUKANDA WANZAMBI Likezo 3 Bible Online

Likezo 3 - MUKANDA WANZAMBI bible

Likezo 3

¹Petulu naYowanu hiyakukanduka nawu epili mutembeli haora yakulomba, yoyamuchitanu nachiwana.

²Kwadiŋi iyala wachifwayi chanyendu, wufwayi wakuvwalika nawu; adiŋi nakumukamika hefuku hefuku kuchisu chatembeli chatenaŋawu nawu chaLubanji, kulonda alombaŋa tuyamukunkulu kudi antu adiŋi nakwijila mutembeli.

³Yenowu chanamoniyi aPetulu naYowanu hiyakukeŋa kwijila mutembeli, hakuyilomba kachamukunkulu.

⁴Petulu hakumushinshika swi-i, niYowanu hamu, nindi, Tutali.

⁵Hakuyitala, nindi keŋa atambuli kachuma kudi wena.

⁶Ilaŋa Petulu nindi, Ami kwami hinikweti hela siliva hela wuruku; chuma chinidi nachu dichi nukukwinka. Nakwili mwijina daYesu Kristu wakuNazareta, nami endaku.

⁷Hakumukwata kuchikasa chachidiilu, hakumuhindwisha; hohenohu ninyendu yindi nimafwahindi akutupokosu akwata niŋovu.

⁸Hakutumbuka, hakwimana, hakutachika kwenda; hakwijila nawu mutembeli nakwenda nakukiluka nakuhameka Nzambi.

⁹Antu ejima chanamumonuwu nakwenda nakuhameka Nzambi,

¹⁰hiyakumwiluka nawu, diyi wadiŋi nakushakamina tuyamukunkulu kuchisu chatembeli chaLubanji, hiyakukumina dakudihayamina nikujinoka nankashichuma chanamoniyi.

¹¹Chaneliyi wuchidi wakwata aPetulu naYowanu, antu ejima hiyakupompa kudi wena lufuchi mwikeki datenaŋawu nawu daSolomoni, nakuhayama nankashi.

¹²Petulu chanachimoniyi, hakwakula antu nindi, Enu akwetu amayala aIsarela, chuma chanamoniyi iwu iyala munachihayaminidi? Mukutushinshikiladi, munatoŋojoki nenu yetu tunamwendeshi naŋovu jetwetu, indi nakujila kwetu, tahindi?

¹³Nzambi yaAbarahama naIsaka naYakoba, Nzambi yawankakulula jetu, nalemeshi kambuŋindi Yesu mwahaninenu, mwalekelenu chemeniyi kumesu aPilatu, chakeŋeliyi kumuumbaku.

¹⁴Ilaŋa enu mwalekeli Wajila, Waloŋa; mwalombeli kuyinka mbanji.

¹⁵Himukujaha Mwiniwumi asaŋulawu dehi kudi Nzambi mudi afu; chumochu twachimweni namesu.

¹⁶Nakukuhwelela ijina dindi, dimu munakoleli iwu iyala munamoni, mweluka dehi. Eŋa, kukuhwelela kwakukuhwelela yena, diku kunamwinki kukola kwalala kumunamoni namesu enu wejima wenu.

¹⁷Nochu dinu, enu ana kwetu, neluki nami enu mwachilili chakuyamba, dichi chelili nianyuli jenu nawa.

¹⁸Yuma yalejelaŋahu dehi Nzambi kutunwa twawatuprofwetu ejima, yakwila nindi Kristu windi akakabi, yinalumbulukili dehi mwenimu.

¹⁹Dichi dinu, balumukenu munyichima yenu, mufunti, kulonda akajimaŋeshi nyiloŋa yenu, kulonda kwinzi yilaaka yakuhizumwisha yakuleta Ŋovu jakufuma kwekala Yehova.

²⁰Kulonda akatemeshi Kristu afuukwililuwu, diyi Yesu.

²¹Yenona chiŋa ekala mwiwulu nichamba kafuntishawu yuma yejima muyadiŋi, yoyatenena ŋahu dehi Nzambi kutunwa twawatuprofwetu twindi ajila akufumisha kushankulu.

²²Mosi wahosheli chalala nindi, Yehova Nzambi wakayimwekeshela kaprofwetu wamudi ana kwenu wakekala neyi ami; wakamutiyililaŋa mwejima mwakayilejaŋayi.

²³Muntu wakabula kutiyilila mazu akaprofwetu owu; akamunoŋesha chikupu mumuzowu.

²⁴Eŋa, atuprofwetu ojima, kufumisha hadi Samweli ninawa alondelelumu, ahoshelumu wejima wawu, nakushimuna yuma yawena mafuku anu.

²⁵Enu yenu anyana kawatuprofwetu, nikachitiyaŋenu chatiyaŋeniyi Nzambi nawankakulula jenu, chamwililuwu Abarahama kudi Nzambi nindi, Mudi anyaneyi dimu mwakakoolekela yisaka yahamaseki yejima.

²⁶Nzambi chasaŋwiliyi kambuŋindi mudi afu, wásambilili kumutemesha kudenu, akayikiswili nkisu, nakuyibalumuna munyichima yenu wejima wenu, mufumi mukuluwa kwenu.