Read MUKANDA WANZAMBI Likezo 4 Bible Online

Likezo 4 - MUKANDA WANZAMBI bible

Likezo 4

¹Heliluwu achidi kuhosha nawantu, atupristu nimukulumpi wamashidika amutembeli, niaSadusi, hiyakuyishintakesha;

²anatiyi dehi kutama chadi nakulejawu antu nawu mudi Yesu afu amba kasaŋuka.

³Hiyakuyikwata, hiyakuyisha mwakuyihembela, kulonda achiŋilili kucha, muloŋa henohu kuneli dehi melela.

⁴Ilaŋa mavulu anatiyi dehi mazu hiyakwitiya, kuchinda amayala ashikili kafwampi neyi makombakaji atanu.

⁵Chikunachi, anyuli jawu niakulumpi niansoneki, hiyakupompa muYerusalema,

⁶nikapristu muneni Anasi, niKayafwasi, niYowanu, niAlesanderi, nichisaka chakapristu muneni chejima.

⁷Hiyakuyimika mukachi, hiyakuyihula nawu, Ichichuma chimuneli munachili naŋovwinyi? nejina danyi?

⁸Petulu, nenzali dehi Spiritu Wajila, hakuyila nindi, Enu mwayulaŋa antu, ninenu awakulumpi,

⁹chimudi nakutwihula lelu iwu mudimu wawuwahi wutunakoleshi nachu muntu wadiŋi chifwayi;

¹⁰tiyenu chachiwahi mwiluki, wejima wenu mwahita aIsarela ejima nenu, ijina daYesu Kristu wakuNazareta, mwapopelenu kukulusu, asaŋulawu dehi kudi Nzambi mudi afu, mudi yena dimu munakoleli iwu muntu nemani kunu kumesu enu.

¹¹Yesu diyi ilola dimwadiwili enu akwakutuŋa, delishiluwu namutu wewombu.

¹²Hikwekala kuhanda mudi wacheŋuku, muloŋa munu mwishina mukachi kawantu hiyanenkumu ijina dacheŋi dakuhanda nachuku.

¹³Chamwenuwu kuumika kwawaPetulu naYowanu, kuyitala komana hiyantu akadi kwiluka nyikanda, hela kwijila mumashikola amaana, hiyakuhayama. Chanayishinshikuwu ayiluka nikuyiluka, nawu wowu adiŋi laŋa naYesu.

¹⁴Chanamonuwu iyala akolesheluwu nemani nawu, hiyamweni mwakutadikilaku.

¹⁵Ilaŋa chanayilejuwu kufuma muchota ayi kumbadi, hiyakushakama hampùŋa.

¹⁶Nawu, Awa amayalawa tukuyila ŋahili Muloŋa chinjikijilu chanakoŋuwu hichakuyambaku, chinamwekani kudi antu ejima ashakama muYerusalema; hitukutwesha kudikala mwokuku.

¹⁷Tukuminenu dakuyikonkomwena chakuyizuwila, kulonda kufumisha hanu aleki kuhosha nawantu mwijina daYesu, kulonda nsaŋu iyi yibuli kutiyakana kwacheŋi mukachi kawantu.

¹⁸Hiyakuyitambika, hiyakuyileja naŋovu nawu, Bayi muhosha cheŋi hela kuleja antu mwijina daYesu, hela hantuku.

¹⁹Ilaŋa Petulu naYowanu hiyakuyakula nawu, Chachiwahi kumesu aNzambi kutiyilila enu, tahindi chachiwahi kutiyilila Nzambi? Sompenu ntahi enu aweni.

²⁰Muloŋa kuleka kutena yuma yitwelili nikumona nikutiya, etu kwetu kutwesha nehi.

²¹Chanayikonkomwenuwu cheŋi chakuzuwa, hiyakuyumbaku, anakaŋanyi dehi kumona chuma chakuyibabeshela; anatiyi dehi woma wawantu, muloŋa antu ejima hiyakulemesha Nzambi hachuma chaneluwu.

²²Ona muntu eliluwu chinjikijilu chakumukolesha wadiŋi wanyaka yakubadika makumi awana.

²³Chanayilekuwu, hiyakuya kudi akwawu, hiyakushimuna mwejima mwanayihoshuwu kudi awakulumpi jawatupristu nikudi awakulumpi.

²⁴Chanatiyuwu mwenomu, hiyakubidika kudi Nzambi namuchima wawu wumu hohu nawu; Eyi Mwanta, yeyi waleŋeli niiwulu niiseki nikaluŋalwiji, niyuma yejima yidumu;

²⁵mwomu wahosheleli kukanwa kankakulula yetu kambuŋeyi Davidi neyi, AJentili anazuwilidi? Antu atoŋojokelidi chuma chamukunkulwayi?

²⁶Anyanta ahamaseki anatandami, anyuli jawu hiyakushakama hampùŋa lwi naYehova nawindi awayishayi dehi manji.

²⁷Chalala kwaamu, nikambuŋeyi wajila Yesu, iwawayishili manji, amupompeleli kudi aHerodi naPontusi Pilatu, hamu nawaJentili, ninyuza yawaIsarela, muŋanda yinu;

²⁸eli mwakeŋa eli kwila chikasa cheyi, muwatoŋwelaŋahu dehi hampùŋa yeyi.

²⁹Ichi dinu Mwanta, talaku chanatukonkomwenuwu chakuzuwa, atwiteji etu anduŋu jeyi tushimuni mazu eyi chakadi woma,

³⁰iku wudi nakwolola chikasa cheyi nakukolesha antu, nakwila yinjikijilu niyihayamisha yakwila nejina dakambuŋeyi wajila Yesu.

³¹Chanalombuwu, omu mwapompeleluwu himukukanka; wejima wawu hiyakwinzala Spiritu Wajila, hiyakuhosha mazu aNzambi chakadi woma.

³²Izaza dawantu etiyili, hiyakwikala namuchima wawu wumu, nayitoŋojoka yawu yimu, hikwadiŋi niwumu wehli nindi yuma yahetayi yindi kanka winduku; ilaŋa yuma yawu yejima hiyikwikala yebomba.

³³Apostolu hiyakushimuna naŋovu yayeni wunsahu wawu wakusaŋuka kwasaŋukiliyi Mwanta Yesu mudi afu. Luwi lwalweni hilukuwanina wejima wawu; lwakwila kwosi muntu niwumu wabulili chumaku;

³⁴muloŋa antu adiŋi namaha, hela matala, hiyakuyilandisha, hiyakuleta mali ayuma yanalandishuwu,

³⁵hiyakutulila kunyendu yawapostolu, hiyakupaŋila hamuntu hamuntu mwanabuliluwu.

³⁶Yosefu, atumbiluwu kudi apostolu ijina di kwawu daBaranaba, daya mukwila nawu Sakukundeja, kaLevi wavwalikili kuKipirosi;

³⁷wadiŋi nakapata, hakukilandisha, hakuleta owu mali, hakuyitulila kunyendu yawapostolu.