Read MUKANDA WANZAMBI Likezo 5 Bible Online

Likezo 5 - MUKANDA WANZAMBI bible

Likezo 5

¹Ilaŋa kwadiŋi iyala wumu, ijina dindi Ananiya, naŋodindi Safwira, hakulandisha kapata kindi.

²Hakunonahu chibalu chawuseya, Iŋodindi nawa niyena nachiluki, hakuleta chibalu chimu, hakuchitulila kunyendu yawapostolu.

³Petulu hakwila nindi, Eyi Ananiya, Satana nenzehdi mumuchima weyi, mwaka wutwambi kudi Spiritu Wajila, wusweki chibalu chawuseya wakapata keyi?

⁴Hadiŋi kapata kanda wukilandishi, hikadiŋi keyeyi awenuku? Hela mali wunakilandishi dehi, hiyadiŋi eyeyi aweni akwila nachu mwejima muwunakeŋuku? Muchima weyi wunatoŋojokelidi mwenimu? Hiwunatwambi kudi antuku, wunatwambi kudi Nzambi.

⁵Ananiya hakutiya mazu awa, adimbuka niheseki, yofwa ni kufwa. Woma waweni wukwata niantu ejima anachitiyi.

⁶Anyikwenzi hiyakunyamuka, hiyakumujiŋajiŋa, hiyakumutwala hanzi, hiyakumutembeka nakumujiika.

⁷Chikuneli munahiti dehi kwiji ora jisatu, Iŋodindi niyena hakwijila mu, chakadi kwiluka chuma chinasoŋi.

⁸Petulu hakumwihula nindi, Nleji, wuseya wumwalandisha kapata wowenowu, tahindi? Yena nindi, Eŋa, wowenowu.

⁹Petulu hakumwila nindi, Munatiya ŋenidi kweseka Spiritu yaYehova? Tiya nshindu janyendu yawantu anajiiki nfumweyi oju jikwinza kuchisu oju, nineyi nawa akukutwala hanzi.

¹⁰Hohenohu hakudimbukila kunyendu yindi, hakufwa. Anyikwenzi hiyakwijila mu, kumuwana wafwa dehi, hiyakumutwala hanzi nakumujiikila hamu nanfumwindi.

¹¹Chipompelu chejima chitiya niwoma waweni, niantu ejima atiyili yumiyi.

¹²Apostolu hiyakukoŋa namakasawu niyinjikijilu niyihayamisha mukachi kawantu. Hiyakupompaŋa wejima wawu namuchima wumu hohu mwikeki daSolomoni.

¹³Anashali hiyakutiya woma wakudibomba nawu; ilaŋa hiyakuyilemesha kudi antu.

¹⁴Akwakwitiya asweja nikusweja kuvula, adibombeli kudi Mwanta, mazaza aweni amayala nawambanda;

¹⁵chakwila hiyakweleka akata hanzi nakuyisha munyikwakwa, nakuyikamika hela hatudidi hela hayikaŋa, kulonda chakuhitayi Petulu, hela kwamwevulu windi hohu wuyilewukili.

¹⁶Hikukupompa izaza dafumini munyikala yadiŋi kwakwihi naYerusalema niniku niniku kwi-ndo; hiyakuleta antu awu akata, niejima azakukilaŋa ademoni azonda, hiyakukola wejima wawu.

¹⁷Henohu kapristu muneni niejima adiŋiyi nawu, wowu achaaku chawaSadusi, hiyakusaŋumoka, anatiyi dehi ichima mbe.

¹⁸Hiyakukwata apostolu, hiyakuyisha mukaleya mwashilaŋawu antu onsu.

¹⁹Ilaŋa kaŋelu kaYehova wumu hakwinza nawufuku nakwenzulula yenzelu yakaleya, hakuyiidisha hanzi,

²⁰nindi, Yenu mwimani mutembeli, muleji antu mazu ejima awumi wunu.

²¹Chanachitiyuwu, hiyakwijila mutembeli hankunku yakucha, hiyakuleja antu. Ilaŋa kapristu muneni hakuya, ninawa ekalayi nawu; hakupompesha chota, nichota chawaIsarela chikwawu chalema chejima; hiyakuyitumesha kukaleya ayileti.

²²Ilaŋa chayiluwu atulama, hiyakuwana mukaleya mwosi, hiyakufunta nakushimuna,

²³nawu, Kaleya chalala twawana kakupata chakola, niatulama saŋa emenawu kuyenzelu; ilaŋa chitwela netu twenzululuku, tuwana mukachi nimuntu mwosi.

²⁴Mukulumpi wamashidika akutembeli, niakulumpi jawatupristu, chatiyiluwu mazu awa, hiyakujinoka nankashi mukuya yumiyi.

²⁵Hikukwinza muntu nakuyileja nindi, Tiyenu, awa amayala mwasha mukaleya adi mutembeli, hiyakwimana nakuleja antu.

²⁶Mukulumpi wamashidika naawatulama hiyakuya nakuyileta chakadi ndombu. Muloŋa hiyakutiya woma wawantu, nawu akenda katwasa malola.

²⁷Chanayiletuwu, hiyakuyimika muchota.

²⁸Kapristu muneni hakuyila nindi, Twayilejeli chakola, netu bayi muleja antu mwŋiniduku. Tiyenu ntahi, muYerusalema mwejima mwawanina dehi kuleja kwenu hohu; munatoŋojoki nenu mutwinki muloŋa wamashi aniwu muntu.

²⁹Ilaŋa Petulu nawapostolu hiyakwakula nawu, Chiŋa twovwahila Nzambi, bayi antuku.

³⁰Nzambi yawankakulula jetu wamusaŋwili Yesu mudi afu, mwajahilenu nakumukudika kumutondu.

³¹Yenowu anamutuumbakeshi dehi kudi Nzambi nachikasa chindi chachidiilu, ekali Mwanta niChamwinu, kulonda aleti kudi Isarela jakubalumuka munyichima, nikuyanakena nyiloŋa.

³²Etu yetu ayinsahu yayumiyi; niSpiritu Wajila nawa anenkiyi Nzambi akwakumwovwahila.

³³Wena chanachitiyuwu, chiyitapa nikunyichima, hiyakutoŋojoka nawu ayijahi.

³⁴Muchota himukwimana kaFwarisi wumu, ijina dindi Gamaleli, nkuluŋaŋa wanshimbi, amuhameka kudi antu ejima; hakuyileja nindi ayiidishi awa amayala kapinji kanti.

³⁵Hakuyila nindi, Enu amayala aIsarela, babalenu chimukukeŋa kuyila awa amayala.

³⁶Muloŋa mafuku adiŋuku, Teyudasa wanyamukili nakudisamba nindi nalema; yena hakudibomba nawamayala amakwawu, kwiji makulakaji awana. Amujaha dehi, niantu ejima amwovwahilili ayipalaŋesha dehi; akaŋanya nipukwa.

³⁷Kulondela hadi yeniwu, hasonekeluwu antu, Yudasi wakuŊaliliya niyena nawa, hakwambula antu amakwawu, nindi adikumi nayena. Yena nawa wanoŋa dehi, niamakwawu ejima amwovwahilili ayipalaŋesha dehi ndu-ndu.

³⁸Ichi dinu nukuyileja nami yambulukenu amayalawa, yilekenu kwawu. Muloŋa neyi mpùŋaiyi hela mudimu iwu wawantu, wukwi kala wamukunkulwayi.

³⁹Ilaŋa neyi himudimu waNzambi, himwakatwesha kuyifwomonaku, mwakenda kela mudi nakulwisha naNzambi yomweni.

⁴⁰Hiyakwiteja mwanahoshiyi. Chanatambikuwu apostolu, hiyakuyeta, hiyakuyileja naŋovu nawu, Bayi muhosha mwijina daYesuku. Ayumbaku nikuyumbaku.

⁴¹Dichi hiyakufuma muchota nakuzaŋalala, nanochu chanayifuukwiluwu kutela kusawuka nakukoola ijina.

⁴²Hiyalekeli kuleja antu hefuku hefuku, nimutembeli, nikumatalawuku, nakushimuna Yesu nawu diyi Kristu.