Read MUKANDA WANZAMBI Likezo 6 Bible Online

Likezo 6 - MUKANDA WANZAMBI bible

Likezo 6

¹Hamafuku owu, chelili atumbanji hiyakuya nakuvula, hikukuvulumuka kutoba; aYudeya awaHeleni hiyakutobela aHeberu, muloŋabondeli anfwila jawu hanjaŋenaŋawu hefuku hefuku.

²Ikumi nayedi hiyakutambika izaza dawatumbanji, hiyakwila nawu, Hichachiwahi etu kushiya mazu aNzambi nakukalakela kujimesaku.

³Dichi enu ana kwetu, talatalenu mukachi kenu amayala atanu nayedi akweti mpuhu yayiwahi, enzala dehi Spiritu nama ana, tuyikunjiki kumudimu iwu.

⁴Ilaŋa etu kwetu tukukakela kulomba, nimudimu wakushimuna mazu.

⁵Omu mwahosheluwu mutiyisha niizaza dejima kuwaha. Hiyakutonda Setefwanu, iyala wasweja kukuhwelela, wenzala Spiritu Wajila; niFwilipu, niPorokorusi, niNikanori, niTimoni, niPamenasi, niNikola wakuAntiyoki, wabalumukili kwikala kaYudeya.

⁶Wenawa hiyakuyisha kumesu awapostolu. Chanalombuwu hiyakuyinaŋika makasawu.

⁷Mazu aNzambi hiyakuya nakudinuŋanuŋa; niatumbanji hiyakuya nakuvula nankashi muYerusalema; mukanka wawatupristu waweni hiyakwovwahila kwitiya kwakukuhwelela.

⁸Setefwanu, wenzala luwi naŋovu, hakwila yuma yakuhayamisha, niyinjikijilu yeneni mukachi kawantu.

⁹Ilaŋa hikukusaŋumuka antu amakwawu akushikola yachaaku chawaLibiritini, niakwaKireni, niakwaAlesanderiya, niakwaSilisiya, niakwaAsiya, hiyakutadika ntadi naSetefwanu.

¹⁰Hiyakukaŋanya kwimana nindi naŋovu yama anindi, naSpiritu ahosheliyi nachu.

¹¹Hiyakuhana maseleka kudi antu kulonda amusoŋeleli nawu, Tunamutiyi nakuhosha mazu akutuka Mosi niNzambi.

¹²Hiyakusaŋumona antu niakulumpi niansoneki; chanamuwanuwu hiyakumukwata naŋovu nakumutwala muchota.

¹³Hiyakwimika ayinsahu akutwamba elili nawu, Iwu iyala halekaŋa kutena munu mwajila ninshimbi chatamaku.

¹⁴Muloŋa tunamutiyi nakuhosha nindi, Iwu Yesu wakuNazareta wakakisaŋana tembeli iyi nakubalumuna yaaku yatulejeliyi Mosi.

¹⁵Antu ejima ashakamini muchota hiyakumushinshika namesu awu swi-i; hiyakumona kumesu indi kudi neyi kumesu akaŋelu.