Read MUKANDA WANZAMBI Likezo 7 Bible Online

Likezo 7 - MUKANDA WANZAMBI bible

Likezo 7

¹Kapristu muneni hakwila nindi, Yumiyi yalala, tahindi?

²Yena nindi, Enu ana kwami, ninenu atata, tiyililenu. Nzambi walubanji lwakulema wamwekeni kudi nkakulula yetu Abarahama, hadiŋiyi muMesopotamiya, wuchidi kanda ashakami muHarana.

³Hakumwila nindi, Fumaku mwituŋa denu, nikudi awusoku weyi, inzaŋa mwituŋa dinakakuleja.

⁴Hakufuma mwituŋa dawaKaladeya, hakushakama muHarana. Kwenoku, chafwiliyi tata yindi, Nzambi hakumufumishaku nakumuleta mwituŋa dinu dimwashakama lelu.

⁵Hamwinkeli mwoku wuswana, chalala hela hakudatila mwendu winduku. Wakanini kumwinka dindi nawanyanindi amba kalondelamu, hachidiŋiyi kanda avwali mwana.

⁶Nzambi wahosheli mwakwila nindi, Anyaneyi akashakama mwituŋa dawenyi. Nindi akayiheta wuduŋu, nakuyikoŋa chatama nyaka makulakaji awana.

⁷Nzambi nindi, Owu muza wakayiheta nakawusompesha; nkumininaku amba kafumamu, amba kankalakela mwenamunu.

⁸Hakumwinka chitiyaŋenu chakwalama. Abarahama wavweli Isaka, hakumwalamisha ifuku damu chitanu nachisatu, Isaka wavweli Yakoba, Yakoba wavweli ankakulula ikumi nayedi.

⁹Owu ankakulula amutiyili Yosefu ichima, hiyakumulandisha kudi antu, amutweli muEjipitu. Ilaŋa Nzambi wadiŋi nindi,

¹⁰hakumupulwisha kumakabi indi ejima. Hemeniyi kumesu amwanta waEjipitu Fwaro, Nzambi hakumutiyisha Fwaro kuwaha nayena namaanindi; yena hakumubalumuna kwikala nguvulu yaEjipitu, nimukwakuhemba itala dindi dejima.

¹¹Henohu mumpata yaEjipitu yejima nimuKenani, himukuholoka nzala; hiyakumona yihuŋu yayeni; ankakulula jetu hiyamweni yakudyaku.

¹²Yakoba, chanatiyiyi nawu kuEjipitu kudi tidiku, hakutemeshaku ankakulula jetu ipampa dakusambila.

¹³Chayiluwu kamuchiyedi hakudimwekesha kudi ana kwindi; nimuza waYosefu awiluka nikudi Fwaro.

¹⁴Yosefu hakutemesha nakutambika tata yindi Yakoba, niawusoku windi ejima, antu makumi atanu nayedi niatanu.

¹⁵Yakoba hakukunkumukila muEjipitu. Hakufwa niyena niankakulula jetu.

¹⁶Hiyakuyitwala kuShekemi nakuyikamika mwijamu ŋalandiliyi Abarahama nawuseya wasiliva kudi anyana kaHamori muShekemi.

¹⁷Chelili mwaka wamukaninuwu Abarahama kudi Nzambi hiwukuya nakushi ka, antu hiyakusweja kuvula nankashi muEjipitu.

¹⁸MuEjipitu muswana nimwanta wacheŋi wabulili kwiluka Yosefu.

¹⁹Mwantowu hakukwatila muza wetu maana, hakukoŋa ankakulula jetu chatama, hiyakunatisha anyikeki jawu, kulonda abuli kuhanda.

²⁰Wena mwakowu diwu wavwalikili Mosi, Nzambi hakumumona himwana wawutotombu; hiyakumulelela mwitala datata yindi tukweji tusatu.

²¹Chanamunatuwu, mwana kaFwaro wamumbanda hakumunona, hakumulela neyi mwanindi wakudivwela.

²²Hiyakumuleja Mosi mwaya maana amuEjipitu ejima; hakusweja Ŋovu nikumazu indi nikunyidimu yindi.

²³Chelili nyaka yindi yakukula yinakeŋi kushika munyaka makumi awana, mumuchima windi himukwinza jakuya nakuhempula ana kwindi aIsarela.

²⁴Chanamoniyi mwinawu wumu hiyakumukoŋa chatama, hakumwamwina, hakumutenda owu akabishiluwu, hakujaha owu kaEjipitu.

²⁵Watoŋojokeli nindi ana kwindi akwiluka chakuyamwinawu kudi Nzambi nachikasa chindi yena, aŋa wena kuchiluka nehi.

²⁶Chikunachi, hakuyiwana adi nakulwisha mulwawu, yena hakukeŋa kuyihumaŋesha cheŋi nindi, Enu akwetu, ivumu denu dimu, muloŋanyi mudi nakudikoŋela chatama chochichi?

²⁷Owu wamukoŋeli mukwawu chatama hakumushinjika Mosi nindi, Nakwinki mudimu wakutuyula hela kutusompesha, hinyi?

²⁸Keŋa wunjahi neyi chiwajaha ona kaEjipitu haloshi, tahindi?

²⁹Mosi chanatiyiyi izu odu hakutemuka, hakushakama mwituŋa dakuMidiyani, hakuvwelaku anyana amayala ayedi.

³⁰Chinamani nyaka makumi awana, kaŋelu hakumwekana kudi yena mwisaŋa dakumpidi yaSinayi, mumuzuzu wakesi muchiputa.

³¹Mosi chanachimoniyi, hakuhayama nakuchimona; hakwinza nakuswila kwakwihi, nindi atali.

³²Hikukutiyakana izu daYehova nindi, Yami Nzambi yawankakulula jeyi, Nzambi yaAbarahama, niyaIsaka, niyaYakoba. Mosi hakuzaala woma, nikutwesha kutalaku nehi.

³³Yehova hakumwila nindi, Subulaku nkwabilu jidi kunyendu yeyi, muloŋa hiwunemani hiiseki dajila.

³⁴Chalala namoni chadi nakukabishawu antu ami adi muEjipitu, natiyi chakwabawu; nasuluki dehi niyipulwishi. Dichi nakeŋi kukutemesha muEjipitu.

³⁵Yowu Mosi alekeluwu nawu, Nakwinki mudimu wakutuyula hela kutusompesha hinyi? diyi atemesheluwu kudi Nzambi ekali nyuli ninkúuli, nachikasa chayenowu kaŋelu wamwekeni kudi yena muchiputa.

³⁶Diyi muntu wayifumishili muEjipitu chanakoŋiyi yihayamisha nayinjikijilu, nimuEjipitu, nimuKaluŋalwiji Kachinana, nimwisaŋa, nyaka makumi awana.

³⁷Yeniwu diyi Mosi wayilili anyana kaIsarela nindi, Nzambi wakayimwekeshela kaprofwetu wahadi ana kwenu neyi ami.

³⁸Diyi wadiŋi muchipompelu omu mwisaŋa, hamu nanowu kaŋelu wahosheli nayena kumpidi yaSinayi, ninawankakulula jetu; diyi watambwili mazu amomi atuleji etu.

³⁹Yowu alekeluwu ankakulula jetu nawu etu kumwovwahila kwonti kwetu; hiyakumushinjika nawu tufumi; nyichima yawu hiyikufunta cheŋi kuEjipitu.

⁴⁰Hiyakumwila Aroni nawu, Wutwilili akishi kulonda atwaminini kutukuyetu; yeniwu Mosi, watufumishili mwituŋa daEjipitu, hituneluki kwanayiyuku.

⁴¹Wena mafuku owu hiyakwila mwana kaŋombi, hiyakuketwila yenowu mukishi chimuna, hiyakuzaŋalala nanyidimu yakumakasawu.

⁴²Nzambi hakubalumuka, hakuyileka kwindi, nindi apeshaŋa yileŋaleŋa yamwiwulu; neyi chasonekeluwu mumukanda wawatuprofwetu wajila nawu, Enu akwamutaŋa waIsarela, yami komana mwaketwililaŋa yimuna, mwaletelelaŋa nyilambu nyaka makumi awana muna mwisaŋa, tahindi?

⁴³Mwakwatili kutabanaka yaMoleki, nikukatumbwa kamukishi Refwana, diwu akishi mwalumbishili kulonda kudifukula kudi wena; ami nakayitwala kwakubadika Babiloni.

⁴⁴Ankakulula jetu adiŋi natabanaka yawunsahu omu mwisaŋa, yamukunjikiluwu Mosi kudi owu wahoshelaŋa nindi, hakumuleja nindi akatuŋi mwaya chifwikija chanamoniyi.

⁴⁵Tabanaka yaleteluwu kudi ankakulula jetu nawa, hepililuwu hamu naYoshuwa nakutambula ituŋa dawaJentili atemwiniyi Nzambi kukuya ankakulula jetu, ndo nikumafuku aDavidi, amwenuwu kuwaha kudi Nzambi.

⁴⁶Yowu walombcli kunamutuŋila Nzambi yaYakoba hakushakama.

⁴⁷Ilaŋa Solomoni diyi wanamutuŋilili itala.

⁴⁸Hela chochu, Mukwakubadika hashakamaŋa mwakutuŋa namakasa awantuku;

⁴⁹mwomwaneliyi kaprofwetu nindi, Iwulu hiitanda dami dawanta, iseki hiitanda dakunyendu yami. Yehova nindi, Indi itala mukuntuŋilami kulonda nimoni mwakunookela, dishika hadihi?

⁵⁰Yuma yejimiyi hiyayituŋali kudami nachikasa chamuku?

⁵¹Enu mwachinchika! Enu ayidima munyichima namatu! Yenu mwadikaŋaŋa naSpiritu Wajila mafuku ejima. Chelilaŋa ankakulula jenu, dichi chimwelaŋa ninenu.

⁵²Kaprofwetu wumwodihi anabuli kukabishawu kudi ankakulula jenu? Ajahili wena ayilejelaŋahu dehi chakenzayi Mukwakuloŋa; yenowu, yenu mwabalumukili kwikala akwakumufukeja, niambanji akumujaha.

⁵³Enu mwatambwili nshimbi jaloŋesheluwu mudi aŋelu, kujihemba nehi.

⁵⁴Wena chanatiyuwu mazu owu, chiyitapa nimunyichima, hiyakumusumaŋena kumaji.

⁵⁵Ilaŋa yena, wenzala dehi Spiritu Wajila, hakutala mwiwulu swi-i, hakumona lubanji lwakulema kwaNzambi, niYesu nemani kuchikasa chaNzambi chachidiilu.

⁵⁶Nindi, Talenu, namoni mumawulu munenzuluki, ni mwana kamuntu nemani kuchikasa chaNzambi chachidiilu.

⁵⁷Ilaŋa wena hiyakubidika naŋovu, hiyakusha nyinu mumatu awu, hiyakumulotokela namuchima wawu wumu hohu.

⁵⁸Amutemuna nimuŋanda, amwasa nimalola. Ayinsahu hiyakutenteka mahinawu kunyendu yamukwenzi weyala, ijina dindi Sawulu.

⁵⁹Hiyakumwasola Setefwanu malola, iku wudi nakutambika nindi, Mwanta Yesu, atambuli spiritu yami.

⁶⁰Hakufukama, hakubidika chakola nindi, Eyi Mwanta ayanakeni muloŋiwu. Chanahoshiyi mwenimu akama nitulu. Sawulu wadiŋi nakwiteja chanamujahuwu.