Read MUKANDA WANZAMBI Likezo 8 Bible Online

Likezo 8 - MUKANDA WANZAMBI bible

Likezo 8

¹Dena ifuku odu ikabisha dakukabisha chipompelu chadiŋi muYerusalema divulumuka nikuvulumuka. Hiyakupalaŋena wejima wawumwahita matuŋa aYudeya naSamariya, kwasheli wowu apostolu hohu.

²Setefwanu hiyakumujiika kudi amayala akweti kalemesha kakulemesha Nzambi, hiyakumudila makumbu aweni.

³Ilaŋa Sawulu hakukisaŋana chipompelu, hakwijila mumatala ejima nakukokakoka ni amayala niambanda, hakuyisha mukaleya.

⁴Dichi wena apalaŋeni hiyakukimbuka nakushimuna mazu.

⁵Fwilipu hakukunkumukila kuŋanda yaSamariya, hakuyishimwina nsaŋu yaKristu.

⁶Mazaza awantu chanatiyuwu mwahosheliyi Fwilipu, nikumona yinjikijilu yeliliyi, hiyakumutiyilila namuchima wawu wumu hohu.

⁷Muloŋademoni azonda, adiŋi nakuzakuka antu amavulu, hiyakuyifuma nakukaloka naŋovu. Antu amavulu adiŋi namusoŋu wakalepa, niadiŋi nakubalakata, hiyakukola.

⁸Muŋandoyu mwadiŋi muzaŋalu wasweja.

⁹Ilaŋa muŋandoyu mwadiŋi iyala wumu, ijina dindi Shimona, yenowu wahoŋelaŋa nakuhayamisha akwaSamariya, nakudisamba nindi nalema.

¹⁰Yenowu antu ejima, kufumisha kudi akadi kulema kushika nikudi alema, hiyakumusha kumuchima nawu, Yeniwu diyi Ŋovu oyu yaNzambi yatenaŋawu nawu Muneni.

¹¹Amusha kumuchima, muloŋa nayihayamishi naŋombu yindi hanalehi dehi.

¹²Ilaŋa chanetiyuwu mwakushimunayi Fwilipu nsaŋu yayiwahi yakutena wanta waNzambi niijina daYesu Kristu, hiyakuyipapatisha, ni amayala niambanda.

¹³Shimona yomweni niyena nawa hakwitiya; chanamupapatishuwu hakwenda hamu naFwilipu. Chanamoniyi yinjikijilu ninyidimu yaŋovu yakoŋeliyi, hakuhayama.

¹⁴Nochu dinu apostolu adiŋi kuYerusalema, chanatiyuwu nawu aSamariya anatambuli mazu aNzambi, hiyakutemeshaku aPetulu naYowanu.

¹⁵Wena chanashikuwu, hiyakuyilombela kulonda atambuli Spiritu Wajila.

¹⁶Muloŋa henohu Spiritu wuchidi kanda aholokeli hela hadi muntu niwumu wakwenokuku; anakumini dakuyipapatisha mwijina daMwanta Yesu hohu.

¹⁷Hiyakuyinaŋika makasa, atambula niSpiritu Wajila.

¹⁸Shimona, chanamoniyi Spiritu Wajila ayinkaŋa hakunaŋika apostolu makasawu, hakwila nindi ayinki mali;

¹⁹nindi, Nyinkenu ninami Ŋovu iyi, kulonda yowu nakanaŋika makasami akatambuli Spiritu Wajila.

²⁰Ilaŋa Petulu hakumwila nindi, Mali eyi akisikili kumu naneyi, muloŋa wunatoŋojoki neyi wutambuli namali chamukunkulu chaNzambi.

²¹Hiwukweti mwakutukwashila hela mudimu kunsaŋu iyuku; muloŋa muchimaweyi hiwaloŋa kumesu aNzambuku.

²²Dichi balumukaku mumuchima wuleki ichichuma chatama, wumulombi Mwanta, wamba kela muwunatoŋojoki muchima weyi akakwanakeni.

²³Muloŋa nakumoni wumuntu wunaluli dehi nandulu mumuchima, anakukasi dehi nakuluwa kweyi.

²⁴Shimona hakwakula nindi, Nlombelenuku kudi Mwanta, kulonda yumoyu yimunateni yibuli kunwana.

²⁵Dichi wena, chanashimunuwu wunsahu wawu nakuhosha mazu aMwanta, hiyakufunta kuYerusalema nakushimuna nsaŋu yayiwahi munyikala yawaSamariya yayivulu.

²⁶Ilaŋa kaŋelu kaYehova hakumwila Fwilipu nindi, Nyamukaku, wuyi kukabeta kakuchidiilu, kunjila yafuma kuYerusalema yakunkumukila kuGaza mwisaŋa.

²⁷Hakunyamuka, hakuya. Kutala iyala wakuEtiyopiya, kalama kamwanta wamumbanda wawaEtiyopiya Kandesi, kalema nankashi, diyi wahembelaŋa yuma yaKandesi yalema yejima. Yenowu wenza dehi kuYerusalema kulonda kudifukula kudi Nzambi;

²⁸wadiŋi munjila yakufunta, washakama mwikalu dindi nakutaŋa mukanda wakaprofwetu Isaya.

²⁹Spiritu hakumwila Fwilipu nindi, Yaku kwakwihi, wukundami kwikalu diŋa.

³⁰Fwilipu hakuyaku lufuchi, hakumutiya wudi nakutaŋa mukanda wakaprofwetu Isaya. Nindi, Chiwudi nakutaŋa chinakulumbulukili, tahindi?

³¹Kuchinka yena kalama nindi, Chikunlumbulukila ŋahi chakadi muntu kunleja? Hakumwila Fwilipu nindi akandami ashakami hamu.

³²Komana wadiŋi nakutaŋa mwasonekawu nawu, Neyi mwana kamukoku akutwalawu nakujaha, neyi chamwenaŋayi mukoku hadi akwakumutewula zo-o, dichi niyena haasamini mukanwa kinduku.

³³Chadizozeliyi, hiyakumutambula wuŋaji wakeŋa eli kumonayi. Muyachi windi akawushimuna kudinyi? Muloŋa wumi windi anawufumishi hanu hamaseki.

³⁴Owu kalama hakumwihula Fwilipu nindi, Kaprofwetu nateninyi, mwani? Naditeni yomweni, tahindi nateni muntu wacheŋi?

³⁵Fwilipu hakuhosha mazu akutachikila kumukandiwu, hakumushimwina nsaŋu yaYesu.

³⁶Chayilaŋawu munjila hiyakushika kumeji. Owu kalama nindi, Tala meji; chumanyi chikunlekesha kumpapatisha?

³⁷Fwilipu hakwakula nindi, neyi wunetiyi namuchima weyi wejima wukutwesha. Yena hakwakula nindi, Netiyi nami Yesu Kristu diyi Mwana kaNzambi.

³⁸Hakuleja antu kwimika ikalu. Hiyakukunkumukila mumeji mwayedi wawu, niFwilipu nikalama; hakumupapatisha.

³⁹Chanakandukuwu mumeji, Spiritu yaYehova hakumuhukula Fwilipu; owu kalama hamumweni nawa cheŋuku, hakuyaloŋa kwindi munjila yindi nakuzaŋalala.

⁴⁰Hakwinza Fwilipu hiyakumuwana kuAzotu; chahitiliyi, hakushimuna nsaŋu yayiwahi munyikala yeneni yejima, nichashikiliyi kuKesareya.