Read MUKANDA WANZAMBI Likezo 9 Bible Online

Likezo 9 - MUKANDA WANZAMBI bible

Likezo 9

¹Ilaŋa Sawulu hakwonashanina nikufunyina atumbanji twaMwanta jawubanji; hakuya kudi kapristu muneni,

²hakulomba nyikandayakuya nachu kumashikola akuDamakasa, kulonda neyi wakawana akwaNjila amakwawu, hela amayala hela ambanda, akayileti kuYerusalema munyonji.

³Chadiŋi nakwendayi hakuya nakushi ka kuDamakasa, kukasumuka hikukumutoŋekela chejeji chakufuma mwiwulu kwi-ndo.

⁴Hakudimbuka heseki, hakutiya izu dikumwila nindi, Eyi Sawulu, Sawulu, wankabishilaŋadi?

⁵Sawulu nindi, Yeyinyi Mwanta? Mwanta nindi, Yami Yesu wakabishaŋa.

⁶Nyamukaku, wiŋili muŋanda, akakuleji muwukwila.

⁷Amayala endeliyi nawu hiyakwimana, jinayikaŋi dehi jakuhosha, anatiyi kwezu hohu, kumona muntu nehi.

⁸Sawulu hakunyamuka hamaseki; nindi atoni, kumona chuma nehi. Hiyakumukwata kuchikasa, hiyakumutwala muDamakasa.

⁹Hakwikala mafuku asatu chakadi kumona; kudya hela kunwa nehi.

¹⁰MuDamakasa mwadiŋi kambanji wumu, ijina dindi Ananiya. Mwanta hakumwila muchimwenu nindi, Eyi Ananiya. Yena nindi, Yamonu Mwanta.

¹¹Mwanta hakumwila nindi, Nyamukaku, wuyi kumukwakwa wukweti ijina daWoloka, mwihuli muntu mwitala daYuda, ijina dindi Sawulu wakuTarusa; muloŋa wudi nakulomba.

¹²Niyena namoni muchimwenu iyala, ijina dindi Ananiya, hakwijila mwadiyi yena, hakumunaŋika makasa kulonda amoni.

¹³Ilaŋa Ananiya hakwakula nindi, Eyi Mwanta, iwu iyala namutiyi kudi antu amavulu, mwanakoŋiyi antu eyi ajila kuYerusalema chatama;

¹⁴nikunu wukweti Ŋovu jatambulayi kudi awakulumpi jawatupristu, kulonda kukasa antu ejima akatambika ijina deyi.

¹⁵Ilaŋa Mwanta hakumwila nindi, Yaŋa kweyi; yena hinsaba yinatondi ami aweni, kulonda atwali ijina dami kudi aJentili, nikudi anyanta ankanu, nikudi aIsarela.

¹⁶Muloŋa ami nukumuleja yuma yayivulu yakakabayi, yakukoola ijina dami.

¹⁷Ananiya hakuya, hakwijila mwitalodu. Hakumunaŋika makasa nindi, Eyi mana kwami Sawulu, Mwanta Yesu, wamwekana kudeyi munjila yiwenzaŋa, nantemeshi kulonda wumoni, winzali Spiritu Wajila.

¹⁸Hohenohu kumesu indi kuholoka niyuma yidi neyi makálu, amona nikumona. Hakunyamuka, hiyakumupapatisha.

¹⁹Hakutambula yakudya, akwata niŋovu. Hakushakama mafuku nawatumbanji adiŋi kuDamakasa.

²⁰Hohenohu hakushimuna nsaŋu yaYesu mumashikola, nindi hiMwana kaNzambi.

²¹Ejima amutiyili hiyakuhayama nawu, Hidiyi wakabishilaŋa muYerusalema antu atambikaŋa ŋiniduku? Nsaŋu yanenjiliyi kunu yoyu yakuyitwala munyonji kudi awakulumpi jawatupristu.

²²Ilaŋa Sawulu hakusweja Ŋovu, hakuyibayisha aYudeya ashakamini kuDamakasa, nakushimuna chakashinshi nindi chalala iwu diyi Kristu.

²³Chimunahiti dehi mafuku amavulu, aYudeya hiyakushakama hampùŋa yakumujaha.

²⁴Mpuŋoyu hiyakuyiluka kudi Sawulu. Hiyakuhemba kuyisu nimwaana niwufuku kulonda amujahi.

²⁵Ilaŋa tumbanji hiyakumutwala nawufuku, hiyakumuhanwisha mumpwembu nakumuzelumuna muchimpaya.

²⁶Chanashikiyi kuYerusalema hakweseka kudibomba nawatumbanji. Wejima wawu hiyakumutiya woma, hiyakutadika nawu hikambanjuku.

²⁷Ilaŋa Baranaba hakumutambula, hakumutwala kudi apostolu, hakuyileja chanamoniyi Mwanta munjila, nichanahoshiyi Mwanta nayena, nichanashimuniyi ijina daYesu kuDamakasa chakadi woma.

²⁸Hakwikala nawu kuYerusalema; hakukimbukaŋa nawu, hakwijila ŋa nakwidikaŋa hamu nawu.

²⁹Hakushimuna ijina daMwanta chakadi woma; hakuhosha nakutadika nawaYudeya awaHeleni, wena hiyakweseka kumujaha.

³⁰Chanachilukuwu ana kwindi hiyakumu kunkumwisha kuKesareya, hiyakumutemesha kuTarusa.

³¹Mwahita Yudeya mwejima nimuŊaliliya nimuSamariya, chipompelu hichikumona kuwunda, hichikudituŋa, hichikwenda nawoma waMwanta, nikuyikundeja kudi Spiritu Wajila, hichikusemwaŋana.

³²Chadiŋi nakukimbukayi Petulu kwejima, hakushika nikudi akwakujila ashakama kuLida.

³³Kwenoku hakumona muntu wumu, ijina dindi Eneya, wakama dehi hakadidi kindi nyaka yitanu nayisatu; muloŋa wadiŋi wakata kaleŋa.

³⁴Petulu hakumwila nindi, Eyi Eneya, Yesu Kristu hakukukolesha; hindukaku, alaku kadidi keyi. Ahinduka nihohenohu.

³⁵Ejima ashakama kuLida nimuSharoni hiyakumumona, hiyakubalumukila kudi Mwanta.

³⁶Woho, kuYopa kwadiŋi kambanji wumu, ijina dindi Tabita, daya mukwila nawu Dokasi; yenowu mumbanda waswejeli nyidimu yayiwahi, niyuma yaluwi yeliliyi.

³⁷Hamafuku awa hakukata hakufwa. Chanamuweleshuwu, hiyakumukamika mwitala dahewulu.

³⁸KuLida kwadiŋi kwakwihi naYopa; dichi atumbanji, chanatiyuwu nawu Petulu wudi kuLida, hiyakutemeshaku amayala ayedi nakumulembelela nawu, Bayi wulaba kwinzaku.

³⁹Petulu hakunyamuka hakuya nawu. Chanashikiyi, hiyakumutwala mwitalodu dahewulu. Ambanda anfwila ejimahiyakwimana kwakwihi nayena nakudila, nakumulejaleja yi kovwelu niyuma yakuvwala yachiminiyi Dokasi hachidiŋiyi nawu.

⁴⁰Petulu hakuyiidishamu wejima wawu, hakufukama nakulomba. Hakubalumuka nakutala kudi mufu nindi, Eyi Tabita, hindukaku. Atona nikutona. Chanamoniyi Petulu, Tabita hakushakama.

⁴¹Petulu hakumwinka chikasa chindi, hakumuhindwisha. Hakutambika akwakujila nawambanda anfwila, hakuyinkayi wamumi.

⁴²Hichikutiyakana muYopa mwejima; amavulu hiyakumwitiya Mwanta.

⁴³Petulu hakushakama muYopa mafuku amavulu kwamuntu ijina dindi Shimona, mukwakuloomba yitembi.