Read MUKANDA WANZAMBI Maroma 1 Bible Online

Maroma 1 - MUKANDA WANZAMBI bible

Maroma 1

¹Ami Pawulu nduŋu yambala yaYesu Kristu, antambikili niikalikapostolu, aŋambwilili nsaŋu yaNzambi yayiwahi,

²yakaniniyi dehi Nzambi nawatuprofwetu twindi munyikanda yajila;

³yakutena Mwanindi, wavwalikili kumutaŋa waDavidi chakumujimba;

⁴atenenuwu nawu diyi Mwana kaNzambi naŋovu, mwaya Spiritu wakujila nakusaŋuka kwawafu, yowu Mwanta wetu Yesu Kristu.

⁵Twatambwili luwi niwupostolu kudi yena, kulonda kwovwahila kukuhwelela mukachi kanyuza yawantu ejima, hansaŋu yejina dindi;

⁶mumwekala ninenu nawa, enu atambikawu dehi mwikali ambala aYesu Kristu.

⁷Nidi nakuyisonekela mukanda, enu ejima mudi muRoma akeŋawu kudi Nzambi, atambikawu kwikala akwakujila. Luwi lwikali nanenu nikuwunda kwakufuma kudi Nzambi, Tata yetu, nikudi Mwanta Yesu Kristu.

⁸Nukusambila kuyileja chinayisakililaŋa wejima wenu kudi Nzambi yami mudi Yesu Kristu, nanochu chikunatiyakani kukuhwelela kwenu mumatuŋa ampata yamunu mwishina ejima.

⁹Nzambi, inakalakelaŋa naspiritu yami munyidimu yansaŋu yaMwanindi yayiwahi, hichinsahuchami chinabulaŋa kukaŋanya kuyitena mukulomba kwami kwejima.

¹⁰Hinukulomba nami, neyi Nzambi neteji akaŋendeshi chachiwahi nakashiki kudenu mafuku anu.

¹¹Muloŋa nakeŋaŋa nankashi kuyimona, kulonda nakayinki chamukunkulu chakudi Spiritu kulonda kuyikolesha.

¹²Kulonda twakakwashaŋani nakukuhwelela kwetu, nikwenwenu nikwa mami.

¹³Nochu enu ana kwetu, nakeŋi nami mwiluki chinakeŋaŋa kakavulu kwinza kudenu, kulonda nakamoni nyikabu kudenu, neyi chinamonaŋa mudi ajentili amakwawu acheŋi, ilaŋa ananfuntishumu nihanu.

¹⁴Ami nidi namukudi wakushimwina aHeleni, niantu ampata jacheŋi, niakwamaana, niabula maana.

¹⁵Dichi ami nakeŋi nankashi, mwashikila Ŋovu jami jejima, kushimwinenu mwashakama muRoma nsaŋu yayiwahi nawa.

¹⁶Muloŋa hinatiyaloŋa nsonyi yansaŋu yayiwahuku; diyi Ŋovu yaNzambi yakwamwina nachu antu ejima akukuhwelela, kusambila aYudeya, niaHeleni nawa;

¹⁷muloŋa dimu munamwekeni kuloŋa kwaNzambi nakukuhwelela kwakutwala kukukuhwelela; mwomwanasonekuwu nawu, Mukwakuloŋa wakahandila kukwitiya kwakukuhwelela.

¹⁸Muloŋa kuzuwa kwaNzambi kunamwekani kwiwulu, kwakuzuwila kasekesha kakusekesha Nzambi kejima, nikuheŋa kwawantu awa alabishaŋa nsaŋu yalala nakuheŋa kwawu.

¹⁹Muloŋa yuma yaNzambi yinatwesheki kwilukewa, yamwekana dehi mukachi kawu, muloŋa yomweni Nzambi nayimwekeshi kudi wena.

²⁰Kufumisha haleŋeluwu mpata yamunu mwishina, yuma yindi yakadi kumonewa yalumbulukila, muloŋa ayilukaŋa nayuma yaleŋeliyi, joju Ŋovu jindi jahaya nyaka niwuNzambi windi; kulonda abuli mwakuleyela.

²¹Muloŋa chamwilukiluwu Nzambi, hiyamulemesheli nawu diyi Nzambuku, hela kumusakilila hiya musakilililuku, ilaŋa abalumukili kwikala antu akuhemesha muyitoŋojoka yawu; munyichima yawu mwadiŋi mwakadi maana himukwikala mwidima.

²²Hiyakudishimuna nawu tukweti maana, komana anabalumuki dehi ayisupi.

²³Kulema kwaNzambi wakatokaŋa hiyakukubalu muna nakulumbisha mukishi wamuntu watokaŋa, hela wakajila, hela wakanyama, hela wachuma chakayilaŋa.

²⁴Dichi Nzambi wayilekeli kwindi, akoŋaŋa mwafwilaŋa nyichima yawu yazonda, nakudisawula nyijimba yawu awenawu wumu namukwawu.

²⁵Muloŋa himpili nsaŋu yaNzambi yalala nansaŋu yakutwamba, hiyakudifukula kuyuma yaleŋeluwu kudi Nzambi nakuyikalakela, hiyakuleka Nleŋi wakisulewa haya nyaka.

²⁶Dihu hafumini kuyileka kudi Nzambi akoŋaŋa mwafwilaŋawu mwatama; muloŋamba ndawu aweni hiyakushiya mwayileŋeleluwu nakwila yuma yabulili kuyileŋelawu.

²⁷Amayala nawa hiyakushiya mwamuleŋeleluwu mumbanda, hiyakusweja lwisu lwakuditamisha nawakwawu amayala, hiyakuta mbwilamu wufwetu watelela kuluwa kwawu.

²⁸Chalekeluwu kwikala nama ana akwiluka Nzambi, Nzambi hakuyileka ekali kwawu nayitoŋojoka yatama, akoŋaŋa yuma yakadi kutela.

²⁹Hiyakusweja kukoŋa yuma yaheŋa yejima, nikutama, nilwisu, ninkunyi. Hiyakusweja ichima, niwubanji, nikuzuŋa, nimakasu, nimuchima wakujinda akwawu.

³⁰Hiyakwakushawula, akwakutuŋula akwawu; ahelewa kudi Nzambi. Hiyakwachibeŋu, akwakudinka wanta, akwakuha mukanwa, akwakubuza yaaku yayiha yatama yeŋi nayeŋi, akwákubula kwovwahila anvwali jawu.

³¹Abula kashinshi, hiyakakelaŋa muyatiyaloŋana nawakwawuku, hiyakeŋaŋanaŋa mwasemwakenawuku, akadi luwi.

³²Wenawa, hela eluka dehi nawu Nzambi nahoshi nindi antu ejima akoŋaŋa yumiyi anateli kufwa, hiyakuminaŋa dakuyila hohuku, atiyaloŋa kuwaha nanawa ayikoŋaŋa nawa.