Read MUKANDA WANZAMBI Maroma 10 Bible Online

Maroma 10 - MUKANDA WANZAMBI bible

Maroma 10

¹Enu ana kwetu, mumuchima wami nakeŋa nankashi, nalembelelaŋa kudi Nzambi nami aIsarela ahandi.

²Ami nichinsahu chawu nami asweja iyena hansaŋu yaNzambi, Ilaŋa bulaŋa kushinshikamu.

³Muloŋa wena chayambaŋa kuloŋa kwaNzambi, hiyakukeŋa nawu akoleshi kuloŋa kwawu aweni, kwovwahila kuloŋa kwaNzambi nehi.

⁴Muloŋa mudi Kristu dimu mwawanina nshimbi, nakuleta kuloŋa kudi antu akumukuhwelela ejima.

⁵Mosi nasoneki nindi, Muntu welaŋa kuloŋa kwamunshimbi, wakahandilamu.

⁶Hakwila kuloŋa kwafuma kukukuhwelela kwelaŋa nawu, Chinjila kwila mumuchima weyi neyi, Wukukandama mwiwulu hinyi? chafwana neyi kuleta Kristu mwishina.

⁷Hela kwila neyi, Wukukunkumuka mukaluŋa hinyi? chafwana neyi kumusaŋula Kristu mudi afu.

⁸Ilaŋa nawudi? Nawu, Izu didi kwakwihi naneyi, didi mukanwa keyi nimumuchima weyi, dodizu dakukuhwelela ditwashimunaŋa.

⁹Muloŋa neyi wukwiteja nakanwa keyi neyi Yesu diyi Mwanta, nakwitiya mumuchima weyi neyi Nzambi wamusaŋwili mudi afu, eyi wukuhanda.

¹⁰Muloŋa namuchima muntu wetiyaloŋa nakutambula kuloŋa; nakanwa wetejaŋa nakumona kuhanda.

¹¹Mukanda wajila nawu, Muntu wukumukuhwelela hiyakamutiyisha nsonyuku.

¹²Muloŋa nikaYudeya nikaHeleni hiyanaambukuku; Mwanta yowumu diyi Mwanta wawu wejima wawu; mahetindi ejima ambala awantu ejima akumutambika.

¹³Muloŋa muntu wukutambika ijina daYehova wukuhanda.

¹⁴Akumutambika ŋahi chakadi kumwitiya? Akumwitiya ŋahi chakadi kumutiya? Akutiya ŋahi chakadi mukwakushimuna?

¹⁵Akushimuna ŋahi chakadi kuyitemesha? Mwomwanasonekuwu nawu, O lubanji lwanyendu yawantu akuleta nsaŋu yayiwahi yayuma yakuluŋisha!

¹⁶Hekala amakwawu abulili kutiyilila kunsaŋu yayiwahi. Muloŋa Isaya nindi, Eyi Yehova netiyi muntu nashimuni, hinyi?

¹⁷Dichi kukuhwelela kwafumaŋa hakutiya, nikutiya kwenzaŋa namazu aKristu.

¹⁸Ilaŋa mi nami abulili kutiya, tahindi? Nehi mwani, lushindu lwawu lwatiyakeni munu mumpata yamunu mwishina mwejima, nimazu awu ashikili kwakumina matuŋa.

¹⁹Ilaŋa mi nami aIsarela abulili kwiluka, tahindi? Hakusambila Mosi nindi, Ami nukuyivuloka mutiyi mukawu nawantu anabuli kwikala muza; nukuyizuwisha namuza wakadi maana.

²⁰Nilsaya nasweji kuumika nindi, Anweni kudi antu abulili kunkeŋakeŋa, namwekeni kudi antu abulili kuŋihula.

²¹Ilaŋa hakuhosha nawaIsarela nindi, Mwaana wejima nolweli antu adikaŋa, akweti nintadi, makasami.