Read MUKANDA WANZAMBI Maroma 11 Bible Online

Maroma 11 - MUKANDA WANZAMBI bible

Maroma 11

¹Ami nami Nzambi nakinjiki antu indi, tahindi? Chinjila! Ninami nikaIsarela nawa, ni mwana kaAbarahama wakumuchidi waBenja-mini.

²Nzambi welukileŋahu dehi antu indi, hanayikinjikuku. Indi iwu mukanda wajila wunateni Elija chalembeleliyi Nzambi nakutena aIsarela, enu kwenu kwilukamu nehi?

³Nindi, Eyi Yehova, anajalii dehi atuprofwetu tweyi, anasandi dehi tumeŋa tweyi, ami yami nashaluhu kanka wami hohu, ninami nawa hiyakukeŋa kunjaha.

⁴Ilaŋa Nzambi hakumwakula nindidi? Nindi, Nashali namakombakaji awantu atanu nayedi anabuli kufukamina Bayali.

⁵Hela katataka nawa hadi amu anashaluku mwaya kutonda kwaNzambi kwaluwi.

⁶Ilaŋa neyi chineli chaluwi, komana hichanyidimu nawaku, mukunkulwayi luwi hilukwikala nawa luwuku.

⁷Dichi dinu! Chakeŋeluwu aIsarela, hiyachitambwiluku; liakwinza atondeluwu achitambwili, ilaŋa asheluhu ayichinchikishili.

⁸Mwomwanasonekuwu nawu, Nzambi nayinki spiritu yakunoŋoka, nimesu ákubula kumona, nimatu ákubula kutiya, nikwifuku dalelu.

⁹NiDavidi nindi, Mesa yawu yiikali muhetu nichidiya nikwakudimbukila, yakuyifweta nachu.

¹⁰Mesu awu eyili bwi abuli kumona; zembesha nyima jawu mafuku ejima.

¹¹Dichi nukwila nami, aselumukili kulonda adimbukili chikupu, tahindi? Chinjila! Chanadimbukuwu wena, ajentili anamoni kuhanda, kulonda kuyivuloka atiyi mukawu.

¹²Neyi dinu chanadimbukmvu wena, antu amunu mwishina anaheteluku, nikuhalwa kwawu kunaheteshi ajentili, indi chamba kawaninawu chikupu hichakaswejaku?

¹³Ami nahoshi nanenu ajentili; nanichi chinidi kapostolu kawajentili, nenda nilemesha mudimu wami;

¹⁴hamwaha nukuvulokahu akwetu nasemuka nawu, kulonda atiyi mukawu, nitweshi kuhandisha amakwawu.

¹⁵Muloŋa neyi chanayikinjikuwu chinakundamishi antu amunu mwishina, indi chakayitambulawu cheŋi chakela ŋahi? Hikusaŋuka mudi afuku?

¹⁶Neyi wuŋa wajila, ninshima nawa yikwikala yajila; neyi muji wajila ninyitayi nawa yikwikala yajila.

¹⁷Ilaŋa neyi nyitayi yi kwawu ayikunkwiluku, nineyi mutondu wamuolive wamumpata akunuŋili mukachi kayu, hiwukudiila hamu nayu nikumuji nikumanji amuolive,

¹⁸bayi wudisamba chakudiwula nyitayuku; neyi wukudisamba hiyeyi wakoleshaŋaa mujuku, muji diwu wakukoleshaŋa eyi.

¹⁹Eyi keŋa wili neyi, Nyitayi ayikunkwiluku kulonda anuŋilumu ami.

²⁰Eŋa chalala. Wena ayikunkwili chabuliluwu kukuhwelela, ilaŋa eyi wakwatila Ŋovu kukukuhwelela kweyi. Bayi wudinka wantaku, chiŋa wutiya woma.

²¹Chabuliliyi Nzambi kwanakena nyitayi yikweti mutondu, nineyi hakakwanakenaku.

²²Talenu kuwaha nikuzuwa kwaNzambi; wena adimbukili amweni kuzuwa, Ilaŋa eyi wukumona kuwaha kwaNzambi, neyi wukukakela mukuwaha kwindi; mukunkulwayi nineyi nawa akakukunkulaku.

²³Niwena nawa, neyi akabula kukakela muntadi jawu, akayinuŋilamu; muloŋa Nzambi natweshi kuyinuŋilamu cheŋi.

²⁴Indi neyi eyi akukunkwili kumutondu wamuolive wameneni mumpata, akunuŋili mumutondu wamuolive wakudima, wabula kwikala chisemwa cheyi, indi nyitayi yambala yamuolive wakudima akabuli kuyinuŋa cheŋi mumutondu wayu, tahindi?

²⁵Enu ana kwetu, hinakeŋenu kuyamba nsaŋu iyi yajindawuku, mwakenda kadisamba nenu tukweti maana. Nami kuchinchika kunawani aIsarela amakwawu, nichamba kawaninawu ajentili.

²⁶Chochina aIsarela ejima amba kahanda; mwomwanasonekuwu nawu, KuZiyona kwakafuma Nkúuli, wakafumisha kasekesha kakusekesha Nzambi kudi Yakoba.

²⁷Nindi, Dichi chitiyaŋenu chami chinakatiyaloŋana nawena hinakafumisha nyiloŋa yawu.

²⁸Kunsaŋu yayiwahi aneli ayilumbu, kulonda kuyikwashaku enu; ilaŋa hakutoŋola kwaNzambi achidi kuyikeŋa, hansaŋu jawankakulula jawu.

²⁹Muloŋa yamukunkulu nikutambika kwaNzambi hikwabalumukaŋaku.

³⁰Chimwelili enu hanyaka yamunyima kwovwahila Nzambi nehi, hakwila katataka munamoni dehi luwi hansaŋu yakujikwa kwawu;

³¹dichi niwena nawa anekali ajikwa akamona luwi lumunamonenu.

³²Muloŋa chanenzeleliyi Nzambi antu ejima mukujikwa, nalondi kwanakena antu ejima.

³³Maheta amaana nayuma yelukayi Nzambi, o chiyakunama! Wuŋaji windi, o chiwakaŋanya kuwiluka! Njila jindi, o chijakaŋanya kujishinshika!

³⁴Mwatoŋojokayi Yehova welukamu hinyi? Hinyi nashakami nindi hampùŋa?

³⁵Muntwinyi wasambilahu dehi kumwinka chuma, mwaka akamufuntishilichu?

³⁶Muloŋa yuma yejima yafumaŋa kudi yena, ayilaŋa mudi yena, amwililaŋa yena. Kudi yena kwikali kulema haya nyaka. Amena.