Read MUKANDA WANZAMBI Maroma 12 Bible Online

Maroma 12 - MUKANDA WANZAMBI bible

Maroma 12

¹Dichi enu ana kwetu, nayilembeleli naluwi lwaNzambi, nami, lambulenu nyijimba yenu yili himulambu wawumi, wajila, wakutiyisha nachu Nzambi kuwaha; diwu mudimu wenu waya muma ana.

²Bayi mulondeja mwelaŋawu antu amakonuku; ilaŋa yitoŋojoka yenu yibalumuki kwikala yayiha; kulonda mushinshiki mwaya muchima waNzambi, diwu wawuwahi, watiyishaŋa kuwaha, walala chikupu.

³Naleji antu ejima adi mukachi kenu, naluwi lwananyinkuwu, nami muntu bayi aditoŋojoka kulema kwakubadika mwatelela kutoŋojokaku; Ilaŋa toŋojoki namuchima wawunda, mwayesekela dehi Nzambi antu kukuhwelela wejima wawu.

⁴Ilaŋa chitukweti yidi yayivulu mumujimba wumu, niyidi yejima hiyikweti mudimu wowumuku,

⁵choche nochu nawa etu tudi amavulu tudi mujimba wumu mudi Kristu, twekala chidi chamuntu namukwawu hamuntu hamuntu.

⁶Etu chitukweti yamukunkulu yaambuka mwaya luwi lwatwinkeluwu, hela wuprofwetu, tuprofweti mwatwesekelawu kukuhwelela kwetu;

⁷hela kumudimu, tushi muchima kumudimu wetu. Muntu mukwakuleja akwawu, ashi muchima kukuleja kwindi.

⁸Muntu mukwakukonkomwena, ashi muchima kukukonkomwena kwindi. Muntu wahanaŋa, ahani makasa ayedi. Muntu wayulaŋa, ayuli nakashinshi. Muntu welaŋa nyidimu yaluwi, eli nakuseha.

⁹Kukeŋa kwenu kubuli wufwikŋi. Tiyenu kutama nayuma yatama, kakelenu yuma yayiwahi.

¹⁰Keŋaŋanenu nawana kwenu nawushona; itejenu mwinenu abadiki kulema.

¹¹Hansaŋu yatela kudikwatisha, bayi mulabaku; ikalenu neyena muspiritu, nakumukalakela Mwanta.

¹²Zaŋalalenu mukuchiŋeja; tatakenenu hakumona yihuŋu; kakelenu kulomba chakadi kuzeya.

¹³Kwashenu akwakujila nayuma yabulawu; shenu muchima kukutambula enyi.

¹⁴Kiswilenu ayikabishaŋa nkisu; kumina dakukisula nkisu, bayi kushiŋanaku.

¹⁵Zaŋalalenu nawakwakuzaŋalala; dilenu nawakwakudila.

¹⁶Ikalenu nayitoŋojoka yoyimu muntu namukwawu; bayi mudinka wantaku; dikundenu nawantu abula kulema. Bayi muditoŋojoka nenu, yetu tweluka hohuku.

¹⁷Bayi mwila mwinenu chatama nakatama kanayiliyuku. Keŋenu kwila yuma yalumbwa kumesu awantu ejima.

¹⁸Neyi chikutwesheka, shakamenu chachiwahi nawantu ejima, mwejima mumukutweshela enu aweni.

¹⁹Enu akwetu twakeŋa a, bayi muditendaku; kuminenu dakwovwahila kuzuwa, muloŋa anasoneki nawu, Yehova nahoshi nindi, Yami nukutenda, yami nukufweta.

²⁰Neyi chilumbu cheyi natiyi nzala, mwinki yakudya adiyi; neyi natiyi mpwila, mwinki meji anwi; muloŋa neyi mukwila mwenomu, wukumulumbikila makala akesi hanamutu windi.

²¹Kutama bayi kuyimika mushinduku; fwomonenu yatama nayayiwahi.