Read MUKANDA WANZAMBI Maroma 14 Bible Online

Maroma 14 - MUKANDA WANZAMBI bible

Maroma 14

¹Tambulenu muntu wabula Ŋovu mukukuhwelela, ilaŋa bayi chakutadika ninduku.

²Muntu wumu wekala nakukuhwelela kwakudya yuma yonsu, mukwawu wabula Ŋovu wadyaloŋa kwamafu.

³Muntu wadyaloŋa, bayi asekesha mukwawu walekaŋa kudyaku; muntu walekaŋa kudya, bayi asompesha mukwawu wadyaloŋaku, muloŋa Nzambi namutambuli.

⁴Eyi wukusompesha ŋamba yambala, yeyinyi? Hela nemani hela nadimbuki, hinsaŋu yaMwanta windi omweni. Chalala akamwimika, muloŋa Mwanta natweshi kumwimika.

⁵Muntu wumu walemeshaŋa ifuku dimu nindi dabadika di kwawu; mukwawu nindi mafuku ejima wowamu hohu. Chachiwahi antu ejima eluki chalala awenawu, iwu mwanatoŋojokiyi, iwu mwanatoŋojokiyi.

⁶Muntu wajilikaŋa ifuku, wadiŋilikileŋa Mwanta; muntu wadyaloŋa, wadijilikaŋa Mwanta, muloŋa wamusakililaŋa Nzambi; muntu walekaŋa kudya walekelaŋa hansaŋu yaMwanta, niyena nawa wamusakililaŋa Nzambi.

⁷Kwosi mwinetu wadihandilaŋa yomwenuku; kwosi wadifwilaŋa yomwenuku.

⁸Muloŋa hela tukuhanda, tukumuhandila Mwanta; hela tukufwa, tukumufwila Mwanta. Dichi hela tukuhanda hela tukufwa, tudi ambala aMwanta.

⁹Dihu hafwililiyi Kristu hakuhanda cheŋi, kulonda akekali Mwanta wawafu niamomi.

¹⁰Eyi mukwetu, wasompeshelaŋadi mana kweyi? Cheŋi nawa, eyi mukwetu mukwawu, wasekeshelaŋadi mana kweyi? Muloŋa wonsu wetu twamba kemana kwitanda daNzambi dakusompela.

¹¹Muloŋa nasoneki nawu, Yehova nahoshi nindi, Chinahandaŋichi, manuŋu ejima amba kanfukamina, madimi ejima amba keteja kudi Nzambi.

¹²Dichi dinu, wejima wetu twamba kalumbulula kudi Nzambi mutwelaŋa hamuntu hamuntu.

¹³Bayi tusompeshaŋa akwetu nawa cheŋuku. Chakala tubabalenu tubuli kushila mana kwetu chuma chakudimbukila hela chakuhukena munjila yindi.

¹⁴Neluki chikupu mudi Mwanta Yesu, nami hikwekala chuma chaditaminaŋa chachenuku; Ilaŋa muntu watoŋojokaŋa nindi chatama, chikwikala chuma chatama kudi yenowu.

¹⁵Neyi waneŋeshaŋa mukwenu nakudya kweyi, wunaleki dehi kwenda mukukeŋa. Bayi wukisaŋana mukwenu afwililiyi Kristu, nakudya kweyuku.

¹⁶Chimwelaŋa chachiwahi bayi achitenaŋa nawu chatamaku.

¹⁷Muloŋa wanta waNzambi hiwalemena mukudya nakunwaku, walemena mukuloŋa, nimukuwunda, nimumuzaŋalu wamudi Spiritu Wajila.

¹⁸Muntu wakalakelaŋa Kristu mwenimu, wamutiyishaŋa Nzambi kuwaha, amuhamekaŋa nikudi antu nawa.

¹⁹Dichi tushenu muchima hakwila yuma yaletaŋa kuwunda, niyuma yakudikolesha nachu wumu namukwawu.

²⁰Bayi mujaha mudimu waNzambi nansaŋu yakudyaku. Chalala yuma yejima yayiwahi; ilaŋa chatama muntu kudimbwisha mukwawu nachuma chadyaloŋayi.

²¹Chachiwahi kuleka kudya mbiji, hela kunwa walwa, hela kwila chuma chimu chakudimbwisha nachu mana kweyi.

²²Kukuhwelela kweyi kuwekala naku, ikalaku naku eyi aweni kumesu aNzambi. Muntu wabulaŋa kudi bayisha nachuma chetejaŋayi, nakooleki.

²³Hakwila muntu wukudya nantadi nabayi, muloŋa nadyi chakadi kukuhwelela; Muloŋa yuma yejima yabula kuya mukukuhwelela hinshidi.