Read MUKANDA WANZAMBI Maroma 15 Bible Online

Maroma 15 - MUKANDA WANZAMBI bible

Maroma 15

¹Ichi dinu, etu twakola twadi kusenda kuzeyazeya kwawantu abula Ŋovu, bayi kuditiyisha etu aweni kuwahaku.

²Tutiyishenuakwetu kuwaha wejima wetu hamuntu hamuntu; tulondenu yuma yayiwahi yakukwasha akwetu.

³Muloŋa Kristu haditiyishili yomweni kuwahaku; chochanasonekuwu nawu, Matuka anawa akutukili ananshikenami.

⁴Muloŋa yuma yejima yasonekeluwu hashankulu, ayisonekeli kulonda kutuleja nachu maana, kulonda nakutatakena, nikukukundeja kwanyikanda yajila, tumwenuku kuchiŋeja.

⁵Dichi Nzambi wakutatakena niwakukundeja, ayiiteji kwikala nayitoŋojoka yoyimu muntu namukwawu, mwatoŋojokaŋayi Kristu Yesu;

⁶kulonda mulemeshi Nzambi yaMwanta wetu Yesu Kristu, yowu Tata yindi, namuchima wumu nikanwa kamu.

⁷Dichi ditambulenu muntu namukwawu neyi chayitambwiliyi Kristu, kulonda kulemesha Nzambi.

⁸Muloŋa ami nami Kristu welili mukwakukalakela akwakwalama, kulonda kushimuna nsaŋu yaNzambi yalala, akoleshi yikaninu yakaninuwu dehi ankakulula;

⁹kulonda ajentili akalemeshi Nzambi nanochu chadiyi naluwi, mwomwanasonekuwu nawu, Nukukusakilila mukachi kawajentili, nukuseŋa ijina deyi.

¹⁰Neli cheŋi nawa nindi, Enu ajentili, zaŋalalenu hamu nawantu indi.

¹¹Neli cheŋi nawa nindi, Hamekenu Yehova, enu ajentili ejima; muhamekenu enu antu amumatuŋa ejima.

¹²Cheŋi nawa Isaya nindi, Kwamba kekala muji wajesi, wakemana kulonda kwikala nyuli yawajentili, kulonda ajentili akakuhweleli yena.

¹³Nzambi wakuchiŋeja ayinki muzaŋalu nikuwunda kwejima mukukuhwelela kwenu, kulonda kuchiŋeja kwenu kusweji Ŋovu yaSpiritu Wajila.

¹⁴Enu ana kwami, hansaŋu yenu neluki chikupu nami mwasweja kuwaha munyichima, mwasweja nima ana ejima, munatweshi kudileja muntu namukwawu.

¹⁵Ilaŋa mi nidi nakuyisonekela mazu antesha chakadi woma, niyanukishi cheŋi; muloŋa ananyinki luwi kudi Nzambi,

¹⁶nili mukwamudimu waKristu Yesu wakukalakela ajentili; nili mudimu wajila wakushimuna nsaŋu yaNzambi yayiwahi, kulonda ajentili ekali himulambu wakutiyisha Nzambi kuwaha, wakujilika kudi Spiritu Wajila.

¹⁷Dichi ni kweti nsaŋu yakudisamba nachu mudi Kristu Yesu, namudimu wami wakukalakela Nzambi.

¹⁸Muloŋa ami kutwesha kutena yuma yakoŋeluwu antu acheŋi nehi; chiŋa kutena yuma yakoŋeliyi Kristu nanami, yakushimuna mazu indi, nikukoŋa nyidimu yindi nawa, kulonda kwovwahisha nachu ajentili,

¹⁹muŊovu yayinjikijilu nayihayamisha, nimuŊovu yaSpiritu Wajila. Dichi chinashimuni chalala nsaŋu yaKristu yayiwahi, kufumisha kuYerusalema nakunyeŋumuka ndo nikullirikumi.

²⁰Eŋaŋi, nashaŋa muchima hakushimuna nsaŋu yayiwahi kwabula kutenawu ijina daKristu, nakenda katuŋila hachikuku chamuntu wacheŋi;

²¹mwomwanasonekuwu nawu, Antu abulili kutiya nsaŋu yindi akamona; niwena abulili kumutiya akeluka chalumbuluka.

²²Dihu hanafumi kunfuntishamu kakavulu, mwaka nikaŋanyi kushika kudenu.

²³Ichi dinu, katataka hinikweti cheŋi nsaŋu yakukalakala kumutamba wunuku, ninyaka yinafwilaŋa kwinza kudenu yineli dehi yayivulu.

²⁴Chinamba kaya kuHisipeni nakahitila kudenu. Nakuhweleli nami nakayimwena munjila yami, ninenu mwakantwaluku munjila yami, hinakela nasambila dehi kutiya kuwaha nakuhanjika nenu mafuku antesha.

²⁵Ilaŋa katataka nidi nanjila yakuya kuYerusalema nayuma yakukwashaku akwakujila.

²⁶Muloŋa kwaMasidoniya niakwaAkaya atiyili kuwaha kupompesha yuma yakukwasha nachu atuzweŋi ahadi akwakujila ekala kuYerusalema.

²⁷Eŋaŋi, anatiyi kuwaha, muloŋa wena anekali akwanyikudi yawu. Muloŋa chanatambuluwu ajentili yuma yawu yawuspiritu, niwena akweti mukudi wakuyikwasha nayuma yawu yakumujimba.

²⁸Dichi neyi neli dehi mwenimu, neyi nayishikŋili dehi wena yumiyi, nakahitila kudenu nakuya kuHisipeni.

²⁹Neluki nami, chinakenza kudenu nakenza nenzala nkisu yaKristu to-o.

³⁰Dichi dinu, enu ana kwami, hinukuyilembelela hadi Mwanta wetu Yesu Kristu, nihakukeŋa kwaSpiritu, nami kabakanenu chimu nanami mukulomba kwenu kumwanlombelaŋa kudi Nzambi;

³¹kulonda akampulwishi kudi antu amuYudeya abula kwitiya; kulonda mudimu wami wakuYerusalema akawutambuli chachiwahi kudi akwakujila;

³²kulonda nakenzi kudenu namuzaŋalu, neyi akaŋiteja kudi Nzambi, nakatulishi muchima chimu nanenu.

³³Nzambi wakuwunda ekali nanenu ejima. Amena.