Read MUKANDA WANZAMBI Maroma 16 Bible Online

Maroma 16 - MUKANDA WANZAMBI bible

Maroma 16

¹Nayileji muheletu Fwibi, mukwakukalakela chipompelu chekala kuKenikiri;

²mwakamutambuli mudi Mwanta mwatelela akwakujila; mwakamukwashuku namudimu windi, mwejima mwakakeŋelayi. Yena nakwashi nankashi antu amavulu, ninami aweni nawa.

³Ŋimwishili aPirisila ni akwila, hiyakwakukalakala hamu nanami mudi Kristu Yesu.

⁴Wena akeŋeli kufwa kukoola wumi wami; hiyami nayisakililaŋa kanka wami hohuku, niyipompelu yawajentili yonsu nawa.

⁵Ŋimwishili nichipompelu chekala mwitala dawu. Ŋimwishili Epenetu nakeŋa, diyi wásambilili kwitiya Kristu muAsiya.

⁶Ŋimwishili Mariya, wayikabakeneni nyidimu yayivulu.

⁷Ŋimwishili awusoku wami Andironiku naYuniya, twadiŋi nawu mukaleya; atiyakana mukachi kawapostolu, asambilili kwitiya Kristu, ami kanda.

⁸Ŋimwishili Ampiliyasu, nakeŋa mudi Mwanta.

⁹Ŋimwishili Uribani, mukwakukalakala hamu nanami mudi Kristu, niSitakisi nakeŋa.

¹⁰Ŋimwishili Apelesi, esekawu dehi mudi Kristu. Ŋimwishili niakwetala daArisitobolu.

¹¹Ŋimwishili kawusoku wami Herodiyoni. Ŋimwishili akwetala daNarakisu, adi mudi Mwanta.

¹²Ŋimwishili aTirifwena naTirifwosa, akabakanaŋa mudimu mudi Mwanta. Ŋimwishili niPerisa wdkeŋewa, wakabakeni nyidimu yayivulu mudi Mwanta.

¹³Ŋimwishili niRufusa watondewa mudi Mwanta, nimama yetu, niyena ninami.

¹⁴Ŋimwishili niAsinkiritu, niFweleŋona, niHeremesi, niPatiroba, niHerema, niana kwetu ejima adi chimu nawu.

¹⁵Ŋimwishili Fwiloloŋu naYuliya, niNereyusi namuhelindi, niOlimpasa, niakwakujila ejima adi chimu nawu.

¹⁶Dimwishenu wejima wenu nachikasa chajila. Yipompelu yaKristu yejima yinayimwishi.

¹⁷Enu ana kwetu nayilembeleli, babelenu antu aletaŋa kwambuka ninsaŋu yakudimbwisha akwawu, hiyayaloŋa mwaya kuleja kumwadiziluku. Yitondolwelenu,

¹⁸muloŋa antu adi ochu hiyamukala kelaŋa Mwanta wetu Kristuku, akalakelaŋa mavumu awu awenawu; enda adimbeka nyichima yawantu akadi maana namazu awu amwovu akulambisha.

¹⁹Kwovwahila kwenu kunatiyakani dehi kudi antu onsu; dichi nazaŋalali liansaŋu yenu. Nakeŋi nami mwikali akwamaana nayuma yayiwahi, mubuli maana nayuma yatama.

²⁰Nzambi wakuwunda keŋa achiki Satana mwishina danyendu yenu. Luwi lwaMwanta wetu Yesu Kristu lwikali nanenu.

²¹Timotewu, mukwakukalakala nanami, nayimwishi. Awusoku wami aLusiyu naYasoni niSosipata anayimwishi.

²²Ami Teretiyu, nasoneki mukandiwu, nayimwishi mudi Mwanta.

²³Gayusi, mukwakudiisha ninami nichipompelu chonsu, nayimwishi.

²⁴Erasitusi, mukwakuhemba mali aŋanda, nayimwishi, nimana kwetu Kwotusi.

²⁵Kisu kisu yena natweshi kuyikolesha mwaya nsaŋu yayiwahi yinashimunaŋami yakushimuna Yesu Kristu, mwaya kumwekesha kwanamwekeshuwu nsaŋu yakujinda yajindiluwu munyaka yamunyima yejima,

²⁶hakwinza katataka anayimwekeshi dehi, anayitiyakeshi dehi nanyikanda yawatuprofwetu yajila, mwahita nyuza yejima, mwaya kuleja kwaNzambi wahaya nyaka, kulonda kuleta kwovwahila kukuhwelela.

²⁷Kudi yena Nzambi, mwinimaana kanka windi, kwikali kulema mudi Yesu Kristu haya nyaka. Amena.