Read MUKANDA WANZAMBI Maroma 2 Bible Online

Maroma 2 - MUKANDA WANZAMBI bible

Maroma 2

¹Dichi eyi muntu wasompeshaŋa akwenu, hiwukweti mwakuleyelaku; muloŋa muwasompeshaŋa mukwenu dimu mwaditanyishaŋa eyi aweni, muloŋa eyi wasompeshaŋa welaŋa mwomumu.

²Etu tuneluki chasompeshaŋayi Nzambi mwaya nsaŋu yalala, wahishaŋa ntu elaŋa yuma yidi neyi iyi.

³Indi eyi muntu wasompeshaŋa wena akoŋaŋa yumiyi, iku eyi aweni welaŋa mwomumu, wunatoŋojoki neyi wakapuluka kukuhisha kwamba kahishayi Nzambi, tahindi?

⁴Eyi wunasekeshi maheta akuwaha kwindi, nichabulaŋayi kuzuwa swayi, nanichi chetejaŋayi kudi wunjika nansaŋu jeyi, tahindi? Eyi hiwuneluki neyi kuwaha kwaNzambi kudi nakukukoka nindi wubalumuki mumuchimaku, tahindi?

⁵Ilaŋa chiwachinchikaŋa mumuchima nákubula kubalumuka, eyi wukudilumbikila kuzuwa kuwamba kamona hefuku damba kamwekeshayi Nzambi kuzuwa kwindi nikusompesha kwindi kwaloŋa.

⁶Wamba kayinka antu ejima mwesekela nyidimu yawu;

⁷atatakenaŋa munyidimu yayiwahi, akabilaŋa kulema nimpuhu nikubula kutoka, wenawa wakayinka wumi wahaya nyaka;

⁸ileŋa akwantadi abulaŋa kwovwahila nsaŋu yalala, ovwahileŋa yeheŋa hohu, wena akamona nindombu nikuzuwa.

⁹Kudi antu ejima elaŋa yatama kwakekala lukadi nimakabi, kusambila aYudeya, niaHeleni nawa;

¹⁰hakwila kudi antu ejima elaŋa yayiwahi, kwakekala kulema nimpuhu nikuwunda, kusambila aYudeya, niaHeleni nawa.

¹¹Muloŋa kudi Nzambi hikwekala kwakama antu kumesuku.

¹²Antu ejima anavulumuni chakadi nshimbi, akanoŋa chakadi nshimbi; antu ejima anavulumuni chakwiluka nshimbi, akayisompesha nanshimbi.

¹³Muloŋakwakutiya nshimbi chakutiya hohu, hidiwu aloŋa kumesu aNzambuku, chiŋa akwakukoŋa nshimbi diwu akabalumunawu kwikala aloŋa.

¹⁴Hela ajentili abula nshimbi, chakwilawu yuma yekala kunshimbi mwaya chisemwa chawu, wenawa abula nshimbi anadilili dehi lushimbi awenawu;

¹⁵amwekeshaŋa nachu nyidimu yanshimbi jakusoneka dehi munyichima yawu, chinleji chawu chamuchima hichikwikala chinsahu, niyitoŋojoka yawu hiyi kuya ninimu ninimu, hekwawu kuyitanyisha, hekwawu kuyiyiŋisha;

¹⁶hefuku damba kasompeshayi Nzambi naYesu Kristu yuma yawantu yakujinda, mwaya nsaŋu yayiwahi yinashimunaŋami.

¹⁷Eyi wekala nejina dakaYudeya, wakuhwelelaŋa nshimbi, wadisambaŋa naNzambi yeyi,

¹⁸weluka mwakeŋa ayi, wetejaŋa yuma yasweja kuwaha, akulejaŋa yuma yekala munshimbi.

¹⁹Eyi wadikuhwelelaŋa neyi walombolaŋa mputamesu, neyi wuchejeji chawena ekala mumwidima.

²⁰Eyi neyi wumukwakuleja akadi maana, wunkulupaŋa yawanyikeki. Kunshimbi wamonaŋa mwekalila maana, ninsaŋu yalala.

²¹Eyi walejaŋa mukwenu, hiwadilejaŋa eyi awenuku, tahindi? Eyi washimunaŋa neyi wukombi watama, eyi aweni weyaloŋa, tahindi?

²²Eyi wahoshaŋa neyi kwila wuvumbi chinjila, eyi welaŋa wuvumbi, tahindi? Eyi wahelaŋa akishi, wabuwaŋa mumatembeli awu, tahindi?

²³Eyi wadisambaŋa nanshimbi, eyi aweni chiwamotokaŋa nshimbi wasawulaŋa Nzambi.

²⁴Muloŋa ijina daNzambi enda adishiŋa mukachi kawajentili hansaŋu yenwenu, mwomwanasonekuwu.

²⁵Chalala kwalama kwakwashaŋa neyi welaŋa nshimbi; hakwila neyi wamotokaŋa nshimbi, kwalama kweyi kuneli dehi kubulakwalama.

²⁶Dichi neyi chidima wukwila mwaya nshimbi, chabulayi kwalama hichikwikala neyi amwadika dehuku?

²⁷Indi neyi chidima wachisemwa wukwila mwaya nshimbi chalala, abuli kukusompesha eyi wukweti nyikanda yakusoneka dehi nikwalama, nanochu chiwamotokaŋa nshimbi, tahindi?

²⁸Muloŋa kaYudeya hikaYudeya wakuditena tuhuku, nikwalama kwakumujimba hidiku kwalama kwalalaku.

²⁹KaYudeya walala chiŋa wamumuchima, nikwalama kwalala hichuma chaku muchima, muspiritu hichamunsonaku, wahamekewa kudi Nzambi, bayi kudi antuku.