Read MUKANDA WANZAMBI Maroma 3 Bible Online

Maroma 3 - MUKANDA WANZAMBI bible

Maroma 3

¹Indi kaYudeya wabadikila hanka? Mukwalama mudi kumwena muchu manyi?

²Kwabadika muyuma yayivulu. Chuma chakusambila chochayishililuwu kuhemba mazu aNzambi.

³Indi neyi amu abulili kukuhwelela, chanabuluwu kukuhwelela chikujaha kashinshi kaNzambi, tahindi?

⁴Chinjila! Chalala, Nzambi ekali walala, antu ejima ekali antwambi; chochasonekawu dehi nawu, Chiwakahosha akakumoni nawu waloŋa, chakakusompeshawu wakayihishi.

⁵Neyi kuluwa kwetu kukumwekesha kuloŋa kwaNzambi, tukwila netwidi? Chazuwaŋayi Nzambi haloŋaku, komana? Nahoshi mwahoshaŋawu antu.

⁶Chinjila! Neyi ochu, Nzambi wakasompesha ŋahi antu amunu mwishina?

⁷Neyi kutwamba kwami kunasweji kulemesha nsaŋu yaNzambi yalala, indi ami akunsompesheladi nawu nimukwanshidi?

⁸Indi tukulekeladi kuhosha netu twilenuŋa chatama kulonda kwinzi kuwaha? Muloŋatutwambilaŋa nawu dimu twahoshaŋa. Antu ahoshaŋa mwenimu, anateli kuyitanyisha.

⁹Dichi dinu, etu aYudeya twayibadika wena, tahindi? Nehi, hela hanti! Muloŋa twasambila dehi kutanyisha niakwetu aYudeya, niaHeleni nawa netu wejima wawu adi kunshidi hohu.

¹⁰Mwomwanasonekuwu nawu, Kwosi waloŋa, hela niwumuku;

¹¹lewosi washinshikaku; kwosi wakeŋa akeŋaŋa Nzambuku.

¹²Wejima wawu anasenuki dehi hambadi; wejima wawu aneli amukunkulwayi hohu; kwosi welaŋa chachiwahi hela wumuku.

¹³Nyidiwu yawu hiŋamu dachashi; adimbekaŋa akwawu namadimi awu; wulembi watubandayula wudi kunyivumbu yawu.

¹⁴Mutunwa twawu mwenzala kushiŋana nindulu.

¹⁵Nyendu yawu yanyakashanaŋa kuya nakupwekesha mashi;

¹⁶munjila jawu mwekala kwakukisaŋana hohu nikujilumuna.

¹⁷Hiyaneluki njila yakumona kuwundaku.

¹⁸Kumesu awu woma waNzambi kwosi.

¹⁹Dichi dinu, etu tweluka netu nsaŋu jahoshaŋa nshimbi jejima, jahoshaŋa nawena ekala kunshimbi; kulonda kujika tunwa twawantu ejima, niantu ampata yamunu mwishina ejima akahi namuloŋa kumesu aNzambi.

²⁰Muloŋa hikudi muntu wukwi kala waloŋa kumesu indi nanyidimu yanshimbuku; muloŋa kunshimbi diku kwelukilaŋawu antu chiyekala nshidi.

²¹Ilaŋa hanu, kuloŋa kwaNzambi kwakadi nshimbi kunamwekani dehi, anakushimuni nikunshimbi nikudi atuprofwetu;

²²kwokuloŋa kwaNzambi kwenzaŋa kudi akwakwitiya ejima nakukuhwelela Yesu Kristu, muloŋa hikwekala kwambula antuku.

²³Muloŋa antu ejima anavulumuni, anakaŋanyi kushika mwashikila kulema kwaNzambi,

²⁴akuyibalumuna kwikala aloŋa naluwi lwindi chamukunkulwayi, nakukuula kwekala mudi Kristu Yesu.

²⁵Yenowu Nzambi wamutoŋweli yena kwikala itanda daluwi namashi indi hakukuhwelela, kulonda kumwekesha kuloŋa kwindi, chadiwiliyi Nzambi nyiloŋa yavulumwinuwu dehi chachikulu, nawushona windi;

²⁶amwekeshi kuloŋa kwindi hamafuku anu; kulonda yomweni ekali waloŋa, ekali nawa mukwakubalumuna muntu wukukuhwelela Yesu kwikala waloŋa.

²⁷Indi tukudisamba nanka? Anafumishi dehi kudisamba. Tukudisamba nanshimbi, indi kwiji nanyidimu, tahindi? Chinjila! Chiŋa nalushimbi lwakukuhwelela hohu.

²⁸Dichi dinu, tunafu ukuli netu muntu wukumona kuloŋa nakukuhwelela chakadi kwila nyidimu yanshimbi.

²⁹Nzambi hiNzambi wawaYudeya hohu, tahindi? HiNzambi yawajentili nawaku? Eŋa, hiNzambi yawajentili nawa.

³⁰Tunamoni netu hiNzambi yowumu, diyi mukwakubalumuna antu kwikala aloŋa; akwakwalama nindi aloŋa nakukuhwelela; ayidima kwokukukuhwelela nawa.

³¹Komana dinu, nshimbi tukuyitena netu yela dehi yamu kunkulwayi nakukuhwelela, tahindi? Chinjila! Chalala tukukolesha nshimbi.