Read MUKANDA WANZAMBI Maroma 4 Bible Online

Maroma 4 - MUKANDA WANZAMBI bible

Maroma 4

¹Ichi dinu, tukwila netu nkakulula yetu Abarahama wakuchisemwa wamwenidi?

²Muloŋa neyi Abarahama waloŋeli nanyidimu yindi, mutenowu wamweni hakudisambila; bayi dinu kumesu aNzambuku.

³Muloŋa mumukanda wajila nawudi? Nawu, Abarahama wamwitiyili Nzambi, amufuukwililichu nawu hikuloŋa.

⁴Muntu wakoŋaŋa mudimu, wufwetu windi hiyawufuukulaŋa nawu waluwuku, wamudimu windi.

⁵Hakwila muntu wabulaŋa kukoŋa mudimu, ilaŋa wakuminaŋa dakukuhwelela mukwakubalumuna antu adiŋi asekesha Nzambi kwikala aloŋa; kukuhwelela kwayenowu muntu akakufuukula nawu hikuloŋa.

⁶Mwomwatenena ŋayi Davidi kukooleka kwamuntu afuukwilaŋayi Nzambi kuloŋa kwakadinyidimu;

⁷nindi, Antu anaanakenuwu kuluwa kwawu, anabutiluwu nyiloŋa yawu, anakooleki.

⁸Muntu ákubula kufuukwilawu nshidi kudi Yehova, nakooleki.

⁹Kukoolekiku anakuteneni akwakwalama hohu, tahindi niayidima nawa? Muloŋa netu kukuhwelela kwaAbarahama amufu ukwililichu nawu hikuloŋa.

¹⁰Akufuukwili ŋahi? Chadiŋiyi mukwalama, tahindi mukubula kwalama? Himukwalamaku, chiŋa mukubula kwalama.

¹¹Chinjikijilu chakwalama chatambwiliyi, himufunda wakuloŋa kwatambwiliyi nakukuhwelela kwakuhweleleliyi hadiŋiyi chidima; kulonda akekali nkakulula yawakwakukuhwelela ejima, hela ayidima, kulonda akayifuukwili kuloŋa;

¹²akekali nkakulula yawa kwakwalama; hiyakwakwalama hohuku, ninawa endaŋa mwaya kukuhwelela kwankakulula yetu Abarahama nawa, kwadiŋiyi naku hadiŋiyi chidima.

¹³Muloŋa ichi chikaninu chamukaninuwu Abarahama ni anyanindi, nawu akaswani mpata yamunu mwishina, hiyachikanini chakunshimbuku, ilaŋa chakukuloŋa kwakukuhwelela.

¹⁴Neyi akwanshimbi aneli answana, komana kukuhwelela kuneli dehi kwamukunkulwayi, nichikaninu chineli dehi chamu kunkulwayi.

¹⁵Muloŋa nshimbi jaletaŋa kuzuwa, ilaŋa kwabula nshimbi hikwekala kuvulumunaku.

¹⁶Dichi chineli chakukuhwelela, kulonda chili chaluwi, kulonda chikaninu chakakoli nawanyanindi ejima; bayi nawanyana akunshimbi hohuku, ninawa akweti kukuhwelela kwaAbarahama, diyi nkakulula yetu wejima wetu;

¹⁷kumesu aNzambi etiyiliyi, wahandishaŋa fu, watenaŋa yuma yabulaŋa kwikala kwoku nindi yidi kwoku. Mwomwanasonekuwu nawu, Ami nakwilishi kwikala nkakulula yanyuza yayivulu.

¹⁸Wakuminini dakuchiŋeja chakadi hakuchiŋejela, kulonda akekali nkakulula yanyuza yayivulu; mwomwahosheluwu dehi nawu, Dimu mwakekalilaŋa anyaneyi.

¹⁹Hela watoŋojokeli mujimba windi nindi wafwa dehi, muloŋa nyaka yindi yashi kili kafwampi neyi nkulakaji, hela welukili nindi Sara wachinyika dehi, hazeyeli mukukuhwelela kwinduku.

²⁰Eŋaŋi, wadiŋi nakutalila mwakaniniyi Nzambi; halabili nantaduku, ilaŋa watambwili Ŋovu nakukuhwelela, hakumulemesha Nzambi.

²¹Welukili chikupu nindi Nzambi wukutwesha kukoŋa mwakaniniyi.

²²Dichi amufu ukwililichu nawu hikuloŋa.

²³Chamufu ukwililuwu ochu hiyachisonekeli hansaŋu yayena hohuku,

²⁴nihansaŋu yetwetu nawa, etu akukeŋa kufu ukwilawu, etu tunetiyi Nzambi wasaŋwili Yesu, Mwanta wetu, mudi afu;

²⁵yena amuheneni akooli nyiloŋa yetu, amusaŋwili kulonda etu twi kali aloŋa.