Read MUKANDA WANZAMBI Maroma 6 Bible Online

Maroma 6 - MUKANDA WANZAMBI bible

Maroma 6

¹Tukwakula netwidi? Tukakelenu nakuvulumuna kulonda luwi luvuli, tahindi?

²Chinjila! Etu twafwili dehi, kunshidi tuyafu, tukutwesha kuhandilamu cheŋi ŋahi?

³Enu munayambi, tahindi? Etu ejima apapatishiluwu mudi Kristu Yesu, atupapatishili twiŋili mukufwa kwindi.

⁴Dichi kuchipapatishu atujiikili chimu nindi twiŋili mukufwa, kulonda chasaŋwiluwu Kristu mudi afu nakulema kwaTata, dichi ninetu nawa twendi muwumi wawiha.

⁵Muloŋa chitunadibombi dehi nindi nachifwikija chakufwa kwindi, dichi chitukwikala nachifwikija chakusaŋuka kwindi nawa.

⁶Chituneluki netu muntu wetu wamukulu amupopeleli hamu naYesu kukulusu, kulonda mujimbiwu wanshidi wili wamukunkulwayi, kulonda kufumisha henohu tubuli kwikala nawa cheŋi muwuduŋu wanshidi.

⁷Muloŋa muntu nafwi nayiŋi dehi, nshidi yinamani dehi.

⁸Ilaŋa neyi twafwili hamu naKristu, tunetiyi netu tukuhandila nawa hamu nindi.

⁹Tuneluki netu chamusaŋwiluwu Kristu mudi afu hakufwa nawa cheŋuku; kufwa hikwamba kekala cheŋi mwanta winduku.

¹⁰Chafwiliyi yena, wafwili hansaŋu yanshidi kamu hohu bweŋi, hakwila ichi chahandayi, wamuhandila Nzambi.

¹¹Choche nochu nawa ninenu aweni difuukulenu nenu kunshidi muyafu, hakwinza mudi Kristu Yesu munekali amomi akuhandila Nzambi.

¹²Dichi dinu, bayi mwiteja nshidi kwikala mwanta munyijimba yenu yakufwaku, mwaka mwovwahili kufwila kwayuku.

¹³Hela yidi yenu yamujimba, bayi muyilubula kunshidi yiikali yakukoŋa nachu nyidimu yaheŋaku. Chiŋa mudilubuli kudi Nzambi, nenu muyantu anasaŋuki dehi mukufwa; mulubuli yidi yenu yiikali yakumukala kelaŋa Nzambi nyidimu yaloŋa.

¹⁴Muloŋa nshidi hiyikwikala mwanta wenuku; muloŋa mudi kuluwi, himudi kunshimbuku.

¹⁵Ichi dinu tukwakula netwidi? Tuvulumunenu nanichi chitudi kuluwi, hitudi kunshimbuku, tahindi? Chinjila!

¹⁶Mweluka dehi, neyi mukudilubula kudi muntu mwili anduŋu jindi akumwovwahila, muneli dehi anduŋu janowu mwovwahilaŋa; hela janshidi nakutwala kukufwa, hela jakwovwahila nakutwala kukuloŋa.

¹⁷Ichi dinu, tumusakililenu Nzambi, netu hela mwadiŋi anduŋu janshidi, munekali dehi akwakwovwahila munyichima yenu kuleja mwayilejeleluwu.

¹⁸Chayi fumishiluwu muwuduŋu wanshidi, mwabalumukili kwikala anduŋu jakuloŋa.

¹⁹Nahoshi mwahoshaŋa antu nansaŋu yakuzeya kwachisemwa chenu chaheseki; Muloŋa chimwalubwili yidi yenu yiikali anduŋu jawuzondu nŋakuluwa kwakulunjika hakuluwa, dichi dinu, lubulenu yidi yenu yiikali anduŋu jakuloŋa kulonda mwikali ajila.

²⁰Chimwadiŋi anduŋu janshidi, mwabulili wuduŋu wakuloŋa.

²¹Ochu yumoyu yimunatiyili nsonyi katataka, hamwaka mwamwenenumu chumanyi? Muloŋa kwakumina yumoyu kudi kufwa.

²²Ichi dinu, katataka munafumi muwuduŋu wanshidi, munabalumuki kwikala anduŋu jaNzambi, mukusoŋelamu nyikabu yaya kukujila, kukukuminina hiwumi wahaya nyaka.

²³Muloŋa wufwetu wanshidi hikufwa, ilaŋa chamukunkulu chaNzambi hiwumi wahaya nyaka, mudi Kristu Yesu, Mwanta wetu.