Read MUKANDA WANZAMBI Maroma 8 Bible Online

Maroma 8 - MUKANDA WANZAMBI bible

Maroma 8

¹Dichi dinu, antu ekala mudi Kristu Yesu hikwekala kuyihisha namuloŋaku.

²Muloŋa lushimbi lwaSpiritu lwawumi wekala mudi Kristu Yesu, lunaŋamwini dehi kulushimbi lwanshidi nakufwa.

³Muloŋa nshimbi chiakaŋenyi nanochu chijazeyeli hansaŋu yachisemwa chaheseki, Nzambi hakutemesha Mwanindi yomweni akadifwani namuntu wachisemwa chanshidi, akekali himulambu wahanshidi, akatanyishi nachu nshidi muchisemwa chaheseki.

⁴Kulonda mwaloŋela nshimbi mulumbuluki mudetu twabulana kwenda mwaya chisemwa chaheseki, chiŋa mwaya Spiritu.

⁵Muloŋa antu endaŋa mwaya chisemwa chaheseki atoŋojokaŋaa yuma yachisemwa chaheseki. Antu endaŋa mwaya Spiritu atoŋojokaŋaa yuma yaSpiritu.

⁶Yitoŋojoka yachisemwa chaheseki hikufwa, ilaŋa yitoŋojoka yaSpiritu hiwumi nikuwunda.

⁷Muloŋa vitoŋojoka yachisemwa chaheseki yekala nawulumbu naNzambi; hiyovwahilaŋa nshimbi jaNzambuku, hela kutweshamu nehi.

⁸Antu achisemwa chaheseki hiyakutwesha kutiyisha Nzambi kuwahaku.

⁹Neyi Spiritu yaNzambi washakama mudenu, komana mudi aSpiritu, himudi achisemwa chahesekuku. Neyi muntu wabula Spiritu yaKristu, himuntu winduku.

¹⁰Neyi Kristu wekala mudenu, mujimba wafwa dehi hansaŋu yanshidi; hakwila spiritu nahandi hansaŋu yakuloŋa.

¹¹Neyi Spiritu yayenowu wasaŋwili Yesu mudi afu washakama mudenu, yena wasaŋwili Kristu Yesu mudi afu wukuhandisha nawa ninyijimba yenu yakufwa, naSpiritu yindi washakama mudenu.

¹²Nochu dinu, enu ana kwetu, hitukweti mukudi wachisemwa chaheseki mwaka twendi mwaya chisemwa chahesekuku.

¹³Muloŋa neyi mukwenda mwaya chisemwa chaheseki, mukufwa; ilaŋa neyi mukufwisha nyidimu yachisemwa chaheseki naSpiritu, mukuhanda.

¹⁴Muloŋa antu ejima alombola ŋawu kudi Spiritu yaNzambi, diwu anyana[1] kaNzambi.

¹⁵Muloŋa himwatambwili spiritu yawuduŋu mwaka mutiyi cheŋi womaku; mwatambwili spiritu yakwikala anyana, yowu twatambikaŋa nachu netu, Aba, Tata!

¹⁶Yomweni Spiritu washimunaŋa wunsahu hamu naspiritu yetu, nindi muyanyana kaNzambi.

¹⁷Neyi tuyanyana komana tudi answana; answana aNzambi akuswana chimu naKristu, neyi tukumona nindi makabi, kulonda akatulemeshi chimu nindi nawa.

¹⁸Nafu ukuli nami makabi akatataka hiyanateli kweseka nakulema kwamba kamwekana kudetuku.

¹⁹Kuleŋa kwejima kwachiŋililaŋa nakudihudika chamba kamwekana anyana kaNzambi.

²⁰Muloŋa kuleŋa kwejima chi kwelili kwakuhemesha, hichakudikeŋelaku, chiŋa mwomwaya muchima wanowu wakwilili chochochu nakuchiŋeja.

²¹Kulonda kuleŋa kwakweni kufumi muwuduŋu wakutoka kwiŋili muwaana wawanyana kaNzambi wowu waana walema.

²²Tuneluki netu kuleŋa kwejima kwa abaŋa nakufunyisha hamu, nikulelu.

²³Hidimu hohu bweŋuku, ninetu aweni, tukweti nyikabu yatachi yaSpiritu, twaabaŋa munyichima yetu nawa, nakuchiŋilila chitwakela anyana chikupu, kwokukuula kwamba kakúulawu nyijimba yetu.

²⁴Tunahandili kuchiŋeja; ilaŋa kuchiŋeja chuma chakumona dehi hikuchiŋejaku. Hinyi wachiŋejaŋa chuma chamonayi dehi?

²⁵Ilaŋa neyi twachiŋejaŋa chuma chakubula kumona, henohu dinu tukutatakena nakuchichiŋilila.

²⁶Mwomumu nawa niSpiritu watukwashaŋa hitwazeyazeyaloŋa; muloŋa hituneluki mutwadi kulombaku, ilaŋa Spiritu yomweni watulembelelaŋa nakwaba kwakweni kwakaŋanya kushimuna.

²⁷Niyena washinshikaŋa munyichima yawantu, neluki mwatoŋojokaŋayi Spiritu, muloŋa walembelelaŋa akwakujila mwaya muchima waNzambi.

²⁸Tuneluki netu yuma yejima yakaiakelaŋa hamu, nakuletela antu akeŋa Nzambi kuwaha, wowu atambikiliyi mwafuukwiliyi dehi.

²⁹Muloŋa antu asambili laŋayi dehi kwiluka, wayikunjikila ŋahu dehi nawa, nindi abalumuki kwikala neyi chekalayi Mwanindi; kulonda yena akekali wedi mukachi kawana kwindi amavulu.

³⁰Awa asambili laŋayi dehi kukunjika, wayitambikili nawa; awa atambikiliyi wayibalumwini kwikala aloŋa nawa; awa abalumwiniyi kwikala aloŋa hakuyilemesha nawa.

³¹Ichi dinu, yumiyi tukwakula netwidi? Neyi Nzambi nekali wetwetu, wukwi kala chilumbu chetu hinyi?

³²Yena wabulili kwanakena Mwanindi omweni, hakumuhana hansaŋu jetwetu ejima, abuli kutulunjikila hadi yena yuma yejima makasa ayedi?

³³Antu atondayi Nzambi, akuyiholokela kudinyi? Yomweni Nzambi diyi wayibalumunaŋa kwikala aloŋa.

³⁴Akuyihisha kudinyi? Yomweni Kristu Yesu diyi wafwili, eŋa chalala, diyi asaŋwiluwu mudi afu, diyi wekala kuchikasa chaNzambi chachidiilu, diyi watulembelelaŋa nawa.

³⁵Wukutwambula kukukeŋa kwaKristu hinyi? Yihuŋu tahindi? Kumona kukala tahindi? Makabisha tahindi? Nzala tahindi? Wuvu tahindi? Yuma yafwana tahindi? Mpoku yakabali tahindi?

³⁶Chochanasonekuwu nawu, Hansaŋu yeyi atujahaŋa mwaana wonsu, atufuukulaŋa neyi anyikoku ateji kujaha.

³⁷Kwakulehi! Muyuma yejimiyi tunekali akwakwimika mushindu nikubadikamu, naŋovu jayena watukeŋeli.

³⁸Muloŋa neluki chikupu nami hela kufwa, hela wumi, hela aŋelu, hela mawanta, hela yuma yakatataka, hela yuma yamba kenza, hela yuma yikweti Ŋovu,

³⁹hela kuleha kwakwiwulu, hela kukunama, hela chuma chacheŋi chaleŋeluwu chimu, hiyikutwesha kutwambula kukukeŋa kwaNzambi kwekala mudi Kristu Yesu, Mwanta wetuku.