Read MUKANDA WANZAMBI 1 Makorinte 1 Bible Online

1 Makorinte 1 - MUKANDA WANZAMBI bible

1 Makorinte 1

¹Ami Pawulu, antambikili niikali kapostolu kaYesu Kristu mwaya muchima waNzambi, nimana kwetu Soseteni,

²tudi nakuyisonekelamukanda, enu akwachipompelu chaNzambi chekala kuKorinda, ajilikawu mudi Kristu Yesu, atambikawu kwikala akwakujila, hamu nawantu ejima adi kwejima atambikaŋa ijina daYesu Kristu, Mwanta wawu ninetu Mwanta wetu.

³Luwi lwikali nanenu, nikuwunda kwakufuma kudi Nzambi, Tata yetu, nikudi Mwanta Yesu Kristu.

⁴Nasakililaŋa Nzambi yami hansaŋu yenu mafuku ejima, naluwi lwaNzambi lwanayinkuwu mudi Kristu Yesu,

⁵chanayiheteshuwu muvana yejima mudi yena, mukuhosha kwejima nimukwiluka kwejima;

⁶ranochu chanakoleshuwu wunsahu waKristu mudenu.

⁷Himunabuli chamukunkulu nichimuku, chimuchidi kuchiŋilila kumwekana kwaMwanta wetu Yesu Kristu,

⁸yowu wakayikolesha ndo nikukukuminina, mwakekali akadi muloŋa mwifuku daMwanta wetu Yesu Kristu.

⁹Nzambi washinshika, yowu wayitambikih kulonda mukundaŋani naMwanindi Yesu Kristu, Mwanta wetu.

¹⁰Enu ana kwetu, nayilembeleli mwijina daMwanta wetu Yesu Kristu, nami hoshenu mazu wowamu wejima wenu; bayi mwambuka aha chendu chimu, aha chendu chikwawuku; chiŋa kudibomba hamu nayitoŋojoka yimu nikutiyaloŋana kumu.

¹¹Muloŋa enu akwetu, ananleji kudi akwetala daKolowe, nawu mukachi kenu mudi kufwilaŋana.

¹²Natiyi nawu mwelapa nenu, Ami nimuntu waPawulu; mukwawu nindi, Ami nimuntu waApolosi; mukwawu nindi, Ami nimuntu waKefwasi; mukwawu nindi, Ami nimuntu waKristu.

¹³Komana Kristu anamwambuli? Pawulu diyi apopeleluwu kukulusu kukoolenu? Ayipapatishili mwijina daPawulu?

¹⁴Nasakililaŋa Nzambi chinabulili kupapatisha hela mwinenu wumu, chiŋa yowu Kirisipu naGayusi hohu;

¹⁵akenda kahosha nawu nayipapatishili mwijina dami.

¹⁶Eŋaŋi, naŋapatishili nawa niakwetala daSetefwanasi; indi neyi kudi amakwawu inaŋapatishili chinanhiti kumuchima.

¹⁷Muloŋa Kristu hantemesheli nakupapatishaku, chiŋa kushimuna nsaŋu yayiwahi; bayi nama ana akuhoshaku, kulusu yaKristu yakenda kekala yamukunkulwayi.

¹⁸Muloŋa antu adi nakuya nakunoŋa, nsaŋu yakulusu ayitoŋojoka nawu hiwusupi; hakwila etu twahandaŋa, netu diyi Ŋovu yaNzambi.

¹⁹Muloŋa nasoneki nawu, Nukukisaŋana maana awakwamaana, nukudiwula kubabala kwawakwakubabala.

²⁰Mukwamaana wudi kudihi? Nsoneki wudi kudihi? Mukwakutadika wamakonu wudi kudihi? Nzambi hanasupishi dehi maana ampata yinu yamunu mwishinaku, tahindi?

²¹Muloŋa Nzambi cheliliyi namaanindi nindi, antu amumpata yamunu mwishina abulili kumwiluka Nzambi namaanawu, Nzambi natiyi kuwaha kuhandisha antu akwitiya nansaŋu yakushimuna kwawusupi.

²²Muloŋa Yudeya alombaŋa yinjikijilu, aHeleni akeŋa kudiza maana;

²³hakwila etu twashimunaŋa Kristu apopeleluwu kukulusu; aYudeya nawu hichuma chakudimbukila, aHeleni nawu hiwusupi;

²⁴ilaŋa antu atambikawu, hela aYudeya hela aHeleni, nawu Kristu diyi Ŋovu yaNzambi, diyi maana aNzambi.

²⁵Muloŋa wusupi waNzambi wabadika maana awantu; kuzeya kwaNzambi kwabadika Ŋovu yawantu.

²⁶Enu ana kwetu, toŋojokenu kutambika kwenu kwayitambikiluwu; hiyanatambiki antu amavulu akweti maana awuntu, hela amavulu akwaŋovu, hela alemaku.

²⁷Ilaŋa Nzambi watondeli yuma yampata yamunu mwishina yabula maana, kulonda atiyishi nachu akwamaana nsonyi. Nzambi watondeli yuma yampata yamunu mwishina yabula Ŋovu yitiyishi nachu akwaŋovu nsonyi.

²⁸Nzambi watondeli yuma yamunu mwishina yabula kulema niyuma yadiwulewa; eŋaŋi, watondeli niyuma yabula kwikala kwoku, kulonda elishi yamukunkulwayi yuma yidi kwoku;

²⁹kulonda kubuli muntu wukudisamba kumesu aNzambi.

³⁰Ilaŋa kudi yena enu mwekala mudi Kristu Yesu, yena anamwilishi kudetu maana akufuma kudi Nzambi, nikuloŋa, ni kujila, nikukuula;

³¹kulonda muntu wukudisamba adisambili mudi Yehova; mwomwanasonekuwu.