Read MUKANDA WANZAMBI 1 Makorinte 10 Bible Online

1 Makorinte 10 - MUKANDA WANZAMBI bible

1 Makorinte 10

¹Enu ana kwetu, hinakeŋenu kuyamba cheliluwu ankakulula jetuku; adiŋi mwishina devu wejima wawu; ahitili mukaluŋalwiji wejima wawu;

²ayipapatishili mudi Mosi nimwivu nimukaluŋalwiji wejima wawu;

³adiili yakudya yawuspiritu yoyimu wejima wawu;

⁴anwini yakunwa yawuspiritu yoyimu wejima wawu. Muloŋanwini kwilola dawuspiritu dayilondeli, ilolodu yowu Kristu.

⁵Hela chochu, Nzambi hatiyili akwawu amavulu kuwahaku; wayijilumwini mwisaŋa.

⁶Hiyuma yakutalilahu etu kulonda tubuli kufwila yuma yatama yafwililuwu wena.

⁷Bayi mwikala akwakupesha, neyi chapesheluwu wena amakwawuku; neyi chanasonekuwu nawu, Antu ashakamini nakudya nakunwa, hiyakunyamoka nakuhema.

⁸Bayi twila wuvumbi neyi cheliluwu wena amakwawuku; hiyakufwa makombakaji makumi ayedi namakombakaji asatu ifuku dawu dimu.

⁹Bayi tumweseka Mwanta neyi chamwesekeluwu wena amakwawuku; hiyakuyijilumuna kudi atupela.

¹⁰Bayi mutoba neyi chatobeluwu wena amakwawuku; hiyakuyijilumuna kudi mukwakujilumuna.

¹¹Yumiyi dinu yayishikeneni wena kulonda etu tutaliluhu; ayisonekeli kulonda kutukonkomwena, etu tudi kunu kunsa yanyaka yamakonu.

¹²Dichi yowu natoŋojoki nindi nemani, ababali kuchina kudimbuka.

¹³Hikunayiwani kweseka kwabulaŋa kutweshawu antu ejimaku; ilaŋa Nzambi washinshika, hakwiteja kuyeseka chabadika muŊovu jenuku; chakuyesekawu wukubuzilaku njila yakupulukila, kulonda mutweshi kukakela.

¹⁴Dichi enu akwetu twakeŋa a, temukenu kupesha.

¹⁵Chinahoshaŋa nanenu nelaŋa nami muyakwamaana; shinshikenu munukuhosha.

¹⁶Nami ilu lupasa lwankisu lutwakisulana, hikutiyaloŋana mumashi aKristu hamu. Dinkendi idi ditwahumunaŋa, hikutiyaloŋana mumujimba waKristu hamu.

¹⁷Hela tunekali amavulu, tudi dinkendi dimu, tudi mujimba wumu; Muloŋa wejima wetu twatambulana dinkendi dimu, hamu.

¹⁸Talenu chelaŋawu aIsarela kumuchidi wawu. Wena adyaloŋa yimuna yaketulaŋawu hamu nakameŋa.

¹⁹Nukuhosha namidi? Nami, chimuna chaketwilaŋawu akishi hichuma, tahindi? Hela mukishi hichuma chalala, tahindi?

²⁰Nehi, ami nami yimuna yaketulaŋawu ajentili aketwilaŋa ademoni, hiyamuketwilaŋa Nzambuku. Hinakeŋenu kutambula hamu nawademonuku.

²¹Himukutwesha kwila munwa mulupasa lwaMwanta, munwa nawa mulupasa lwawademonuku. Himukutwesha kwila mutambula kumesa yaMwanta, mutambula nawa kumesa yawademonuku.

²²Tumutiyishi Mwanta mukawu, tahindi? Twamubadika Ŋovu, tahindi?

²³Yuma yonsu yaloŋa; ilaŋa yuma yi kwawu hiyakwashanaŋaku. Yuma yonsu yaloŋa, ilaŋa yuma yi kwawu hiyakoleshaŋaaku.

²⁴Bayi muntu alonda yakudiwahisha nachu yomwenuku, chiŋa yakuwahisha nachu mukwawu.

²⁵Yuma yalandishaŋawu kwakulandila yejima, kuminenu dakudya chakadi kwihula, kuchina kuyibayisha kudi chinleji chamuchima.

²⁶Maseki ejima ambala aYehova, niyuma yalumbamamu.

²⁷Neyi muntu wabula kwitiya wukuyitambika kuya nakudya nindi, neyi munakeŋi kuya, ilukenu dakudya yakuyitentekelawu yejima, chakadi kwihula, hansaŋu yachinleji chamuchima.

²⁸Kwinza neyi akuyileja kudi muntu wumu nindi, Iyi ayipeshela akishi; bayi mudyaku, hansaŋu yayenowu nakuleji, ninsaŋu yachinleji chamuchima.

²⁹Ami nami chinleji chamukwenu chamuchima bayi cheyeyi awenuku. Muloŋanyi wakunsompeshelawu chuma chineteji nachinleji chamuntu wacheŋi?

³⁰Neyi natambulaŋa nakusakilila, Muloŋanyi wakuntenenawu chatama nachuma chinasakililaŋa?

³¹Dichi dinu, hela mukudya hela mukunwa, mumwelaŋa mwejima ilenu kulonda kulemesha Nzambi.

³²Bayi mwila chuma chakudimbwisha hela aYudeya, hela aHeleni, hela chipompelu chaNzambuku.

³³Chochinatiyishaŋa ntu ejima kuwaha muyuma yejima, hinakeŋa kwami kudikwasha ami awenuku; chiŋa yowu kukwasha antu amavulu, kulonda ahandi.