Read MUKANDA WANZAMBI 1 Makorinte 12 Bible Online

1 Makorinte 12 - MUKANDA WANZAMBI bible

1 Makorinte 12

¹Enu ana kwetu, hinakeŋenu kuyamba yuma yaSpirituku.

²Muneluki dehi chimwadiŋi ajentili mwalumbukili nakulondelaakishi abulaŋa kuhosha, mwejima mwayitweluwu mwomu.

³Dichi nakeŋenu mwiluki muntu wukuhosha nindi Yesu washiŋewa, hahoshaŋa mudi Spiritu yaNzambuku. Muntu wukuhosha nindi Yesu diyi Mwanta, kuchihosha chiŋa mudi Spiritu Wajila.

⁴Kudi yamukunkulu yacheŋi nayacheŋi, ilaŋa Spiritu yowumu.

⁵Kudi nyidimu yacheŋi nayacheŋi, ilaŋa Mwanta yowumu.

⁶Kudi kukalakala kwacheŋi nakwacheŋi, ilaŋa Nzambi yowumu wakalakalaŋa yuma yejima mudi ejima.

⁷Ilaŋa ntu ejima, muntu himuntu, anayinki mwamwekena yamukunkulu yaSpiritu, kulonda kukwashaŋana.

⁸Muloŋa muntu wumu anamwinki mazu amaana naSpiritu; mukwawu anamwinki mazu akwiluka, mwaya Spiritu yowumu;

⁹mukwawu anamwinki kukuhwelela, naSpiritu yowumu; mukwawu anamwinki yamukunkulu yakuuka, naSpiritu yowumu;

¹⁰mukwawu anamwinki kwila yinjikijilu; mukwawu anamwinki kuprofweta; mukwawu anamwinki kushinshika aspiritu eŋi na eŋi; mukwawu anamwinki madimi eŋi na eŋi; mukwawu anamwinki kulumbulula madimi.

¹¹Yamukunkulu yejimiyi ayikalakeshaŋa kudi Spiritu yowumu, wayambwilaŋa hamuntu hamuntu mwaya muchima windi.

¹²Mujimba chiwuneli wumu, wekala nayidi yayivulu, niyidi yamumujimba yejima, hela yayivulu, yineli mujimba wumu; dichi chekalayi niKristu nawa.

¹³Muloŋa wejima wetu atupapatisha dehi mudi Spiritu wumu twi kali mujimba wumu, hela tudi aYudeya hela aHeleni, hela tuyanduŋu hela anyana, wejima wetu atunwisha dehi kudi Spiritu wumu.

¹⁴Muloŋa mujimba hiwekala chidi chimu hohuku, yekala yayivulu.

¹⁵Neyi mwendu wukuhosha nindi, Chinabula kwikala chikasa hiniwamujimbaku; chalala kwaamu, hanekali wamujimbaku, tahindi?

¹⁶Neyi itu dikuhosha nindi, Chinabula kwikala disu hiniwamujimbaku; komana hanekali wamujimbaku, tahindi?

¹⁷Neyi mujimba wejima wukwi kala disu hohu, wukutiya nanka? Neyi mujimba wejima wukwi kala kwakutiya hohu, wukutiya nanka ivumba?

¹⁸Ilaŋa Nzambi nashi mumujimba yidi yejima, hachidi hachidi, mwomwatiyililiyi kuwaha.

¹⁹Indi neyi yejima yinekali chidi chimu hohu, mujimba wadi kwikala kudihi?

²⁰Dichi dinu kwekala yidi yayivulu, ilaŋa mujimba wumu.

²¹Disu hidikutwesha kwila chikasa nindi, Ami kwami chami chaduku! Hela namutu hiwukutwesha kwila nyendu nindi, Ami kwami yami yaduku!

²²Eŋa, mwalala yidi yamumujimba yinekali dehi hiyaheta Ŋovuku, diyi yikweti nyidimu.

²³Niyidi yitwatoŋojokaŋa netu yabula kulema chalala, diyi twalemeshaŋa nankashi; niyidi yetu yikweti nsonyi, diyi yabadika kulema,

²⁴hakwila yidi yetu yalubanji hiyakalaku. Ilaŋa Nzambi naŋati chachiwahi mujimba, nasweji kulemesha yidi yabula kulema;

²⁵kulonda mumujimba mubuli kwikala kwambuka, chiŋa yidi yejima yihembaŋani.

²⁶Neyi chidi chimu chikukaba, yidi yejima yamwenaŋa hamu kukaba; hela chimu akuchilemesha, yidi yejima yazaŋalelaŋa hamu.

²⁷Enu mudi mujimba waKristu, muntu himuntu mudi yidi yamujimbowu.

²⁸Nzambi nashi muchipompelu, akusambila apostolu, amuchiyedi atuprofwetu, amuchisatu ankuluŋaŋa; himukulondela akwakwila nyidimu yaŋovu; nkumininamu akwakuuka, niankwashi, niakwakuyula, niakwakuhosha madimi eŋi na eŋi.

²⁹Antu ejima liiyapostolu, tahindi? Antu ejima hiyatuprofwetu, tahindi? Antu ejima hiyankuluŋaŋa, tahindi? Antu ejima hiyakwakukoŋa nyidimu yaŋovu, tahindi?

³⁰Ejima akweti yamukunkulu yakuuka, tahindi? Ejima ahoshaŋa madimi eŋi, tahindi? Ejima alumbululaŋa madimi, tahindi?

³¹ilaŋa fwilenu nankashi yamukunkulu yabadika. Dichi nukuyileja njila yabadikamu nankashi kuwaha.