Read MUKANDA WANZAMBI 1 Makorinte 14 Bible Online

1 Makorinte 14 - MUKANDA WANZAMBI bible

1 Makorinte 14

¹Londenu kukeŋa. Fwilenu nawa niyamukunkulu yaSpiritu, chiŋa muswejeshi kuprofweta.

²Muntu wahoshaŋa mwidimi dacheŋi wahoshaŋa naNzambi, hahoshaŋa nawantuku; muŋa kwosi muntu wukuchitiyaku, ilaŋa wahoshaŋa nsaŋu jakujinda muSpiritu.

³Hakwinza muntu waprofwetaŋa wahoshaŋa nawantu kulonda kuyikolesha, nikuyikonkomwena, nikuyikundeja.

⁴Muntu wahoshaŋa mwidimi dacheŋi wadikoleshaŋa yomweni hohu; hakwinza muntu waprofwetaŋa wakoleshaŋaa chipompelu.

⁵Ami nakeŋi muhoshi madimi eŋi wejima wenu; hakwila chuma chinakeŋi nankashi nami muprofweti. Muloŋa muntu waprofwetaŋa wabadika muntu wahoshaŋa madimi eŋi, chiŋa yolumbulula kulonda kukolesha chipompelu.

⁶Dichi dinu enu ana kwetu, neyi nukwinza kudenu nakuhosha madimi eŋi, chakadi kuhosha munayi chimwekeshu, hela munabuli kuya kwiluka hela kuprofweta hela kuleja, chikuyikwasha ŋahi?

⁷Niyuma yakadi wumi, yidi neyi chimama nikadada, neyi yikuvuma chakadi kulumbuluka, akwiluka ŋahi mwanembuwu nachimama nakadada?

⁸Neyi mpùŋa yikuvuma chakadi kuiumbuluka, hinyi wukumanyeka ayi kunjita?

⁹Ninenu nawa chochu; neyi mukubula kuhosha mazu alumbuluka, akwiluka ŋahi mumukuhosha? Chidi neyi mukuhosha kwamumpepela hohu.

¹⁰Chalala mumpata yamunu mwishina mwekala madimi amavulu eŋi na eŋi; hikwekala nidimu dabula mudayaku.

¹¹Dichi dinu, neyi nabuli kwiluka mwaya idimi damuntu wukuhosha, nukwi kala kudi yena neyi ŋeji, niyena nawa wukwi kala neyi ŋeji kudami.

¹²Yamukunkulu yaSpiritu yimudi nakufwila, fwilenu nankashi yakukolesha nachu chipompelu.

¹³Dichi muntu wukuhosha mwidimi dacheŋi, alombi kulonda atweshi kulumbulula.

¹⁴Muloŋa neyi nukulomba mwidimi dacheni, spiritu yami diyi yidi nakulomba, ilaŋa kashinshi kami hikakumwenamu chumaku.

¹⁵Chiŋa chila ŋahi? Chiŋa nilombi naspiritu ninakashinshi nawa; chiŋa niimbi naspiritu ninakashinshi nawa.

¹⁶Mukunkulwayi neyi wukukisula nkisu naspiritu hohu chiwukusakilila, mukwenu wabula kwilukamu wukwiteja ŋahi nindi, Amena? Muloŋa yena kwindi hanatiyi muwunahoshuku.

¹⁷Chakusakilila wunasakilili chachiwahi, hakwinza mukwenu hiwunamukoleshuku.

¹⁸Nasakililaŋa Nzambi nami nahoshaŋa madimi eŋi chakubadika enu ejima;

¹⁹hakwinza muchipompelu nakeŋa nankashi kuhosha nakashinshi kami hela mazu atanu akuleja nachu akwetu; hinakeŋa kuhosha mwidimi dacheŋi kumi damakombakaji amazuku.

²⁰Enu ana kwetu, bayi mutoŋojoka yawansuku; kunsaŋu yankunyi ikalenu anyikeki, muyitoŋojoka ikalenu akula dehi.

²¹Munshimbi anasoneki nawu, Nakahosha namuziwu nawantu amadimi acheŋi, nanyivumbu yawaŋeji; Yehova nindi, Hela chochu, hiyakantiyaku.

²²Dichi madimi eŋi hichinjikijilu chawantu abula kwitiya, hichawakwakwitiyaku; hakwinza kuprofweta hichinjikijilu chawakwakwitiya, hichawantu abula kwitiyaku.

²³Dichi neyi chipompelu chejima chinapompi, ninenu ejima himukuhosha madimi acheŋi, neyi mukwijila antu akadi maana, hela abula kwitiya, hiyakuhosha nawu mwazalukaku?

²⁴Hakwila neyi ejima adi nakuprofweta, himukwijila muntu wabula kwitiya hela wakadi maana, akumukonkolola hela kumusompesha kudi antu ejima.

²⁵Yuma yanajindiyi mumuchima windi yikumwekana, wukubulamana heseki nakudifukula kudi Nzambi, wukwila nindi, Chalala Nzambi wekala mukachi kenu.

²⁶Nochu dinu enu ana kwetu, mukwilaŋa pahi? Chimwapompaŋa, iwu wukweti isamu, iwu wukweti yakuleja antu, iwu wukweti chuma chanamumwekesheluwu, iwu wukweti idimi dacheŋi, iwu wukweti kulumbulula. Ilenu yuma yejima kulonda mukoleshi akwenu.

²⁷Neyi akuhosha mwidimi dacheŋi, ahoshi hela antu ayedi, bayi abadika asatuku, iwu alondeli mukwawu, wumu, wumu; muntu wumu alumbululi.

²⁸Neyi hikudi mukwakulumbululaku, akumini dakumwena muchipompelu, ahoshi naNzambi mumuchima windi.

²⁹Niatuprofwetu ahoshi ayedi hela asatu, akwawu ashinshikumu.

³⁰Neyi muntu nashakamuku diyi anamwekesheluwu chuma chimu, muntu wakusambila amweni.

³¹Muloŋa chachiwahi kuprofweta wejima wenu, wumu alondeli mukwawu, kulonda ejima akwati maana, ejima akwati Ŋovu.

³²Aspiritu awatuprofwetu ovwahilaŋa akwawu atuprofwetu.

³³Muloŋa Nzambi hiNzambi wakuluwaŋeshaku, hiNzambi wakuwunda; neyi chekala muyipompelu yawakwakujila yejima.

³⁴Ambanda amweni muyipompelu, Muloŋa chinjila wena kuhosha; akumini dakwovwahila, neyi chinahoshi nshimbi nawa.

³⁵Neyi akukeŋa kwiluka chuma, ehuli anfumu jawu aweni kumatalawu; muloŋa mumbanda kuhosha muchipompelu chi kweti nsonyi.

³⁶Komana mazu aNzambi afumini kudenu, hela ashikili kudenu kanka wenu hohu, tahindi?

³⁷Muntu natoŋojoki nindi nikaprofwetu, indi kwiji nimuntu waSpiritu, eluki chikupu nindi iyi yuma yinasoneki, anayinleji kudi Mwanta.

³⁸Ilaŋa muntu nayambi, ayambi kwindi.

³⁹Dichi dinu enu ana kwami, fwilenu kuprofweta, bayi mulekesha kuhosha madimi eŋuku.

⁴⁰Chiŋa yuma yejima ayili chakutela nakuloŋa.