Read MUKANDA WANZAMBI 1 Makorinte 15 Bible Online

1 Makorinte 15 - MUKANDA WANZAMBI bible

1 Makorinte 15

¹Nochu enu ana kwetu, nukuyileja nsaŋu yayiwahi yinayishimwinini, yimwatambwili, mumwemena.

²Yoyi nsaŋu yayihandishaŋa, neyi mukukakelamu; neyi nehi, kwiji mwetiyili chamukunkulwayi.

³Muloŋa násambilili kuyileja nsaŋu yanlejeluwu ami, yeliluwu nawu, Kristu wafwili kukoola nyiloŋa yetu, mwomwaya nyikanda yajila;

⁴nawu, amujiikili, amusaŋwili mudi afu hefuku damu chisatu, mwomwaya nyikanda yajila;

⁵nawu, wamwekeni kudi Petulu, kulondelamu nikudi ikumi nayedi.

⁶Kulondelamu hakumwekana kudi ana kwetu apompeli hamu, kuyichinda makulakaji atanu anakehi; amavulu achidi kwoku nilelu, amakwawu anakami dehi tulu.

⁷Kulondelamu hakumwekana kudi Yakoba, kulondelamu hakumwekana kudi apostolu ejima.

⁸Nkumininaku hakumwekana nikudami nawa, nafwana neyi mwana wakusulumuna mwivumu.

⁹Muloŋa ami yami nakehelamu hadi apostolu ejima, hinatela kuntena nawu kapostoluku, muloŋa nakabishili chipompelu chaNzambi.

¹⁰Ilaŋa mwejima munekali imu, nekalumu naluwi lwaNzambi hohu; niluwi lwindi lwantiyililiyi hilunayi mwamukunkuluku. Eŋa, nalukuti chakubadika ejima; ilaŋa hiyamuku, lwoluwi lwaNzambi nadiŋi nalu.

¹¹Dichi twashimunaŋa, hela ami hela wena, enu himukwitiya.

¹²Indi neyi Kristu amushimunaŋa nawu amusaŋula dehi mudi afu, enu amakwawu mwahoshelaŋadi nenu afu hiyakuyisaŋulaku?

¹³Dichi neyi afu hiyakuyisaŋulaku, komana niKristu hiyamusaŋulaku.

¹⁴Neyi Kristu hiyamusaŋulaku, komana kushimuna kwetu kunekali dehi kwamukunkulwayi, nikukuhwelela kwenu kunekali kwamukunkulwayi nawa.

¹⁵Neyi afu hiyakuyisaŋulaku, komana niKristu hiyamusaŋwiluku, ninetu, twashimunaŋa netu Nzambi wamusaŋwili Kristu mudi afu, tunekali dehi ayinsahu akutwambila Nzambi.

¹⁶Muloŋa neyi afu hiyakuyisaŋulaku, komana niKristu nawa hiyamusaŋulaku.

¹⁷Neyi Kristu hiyamusaŋulaku, kukuhwelela kwenu kunekali kwamukunkulwayi, muchidi munshidi yenu,

¹⁸niantu anakami dehi tulu mudi Kristu ananoŋi dehi kwawu.

¹⁹Neyi tunakuhweleli Kristu muwumi wunu hohu bweŋi, komana yetu tunabadiki antu ejima wushona.

²⁰Ilaŋa Kristu amusaŋula dehi mudi afu, nekali dehi nyikabu yatachi yawenawa anakami tulu.

²¹Muloŋa chaleteluwu kufwa kudi muntu, kudi muntu nawa diku kwenjili kusaŋuka kwawafu.

²²Muloŋa chafwaŋawu antu ejima mudi Adama, dichi nawa antu ejima akayihandishila mudi Kristu.

²³Chiŋa muntu nachendu chindi, muntu nachendu chindi; Kristu diyi nyikabu yatachi, nkumininaku niantu ambala aKristu hakenzayi.

²⁴Henohu dihu hakenza kukumisha, hakahanayi Kristu wanta kudi Nzambi, yowu Tata; hamba kela nanoŋeshi dehi kuyula kwejima, niwanta wejima, niŋovu jejima.

²⁵Chiŋa akayula yule-e, nichamba kadatayi ayilumbu jindi ejima.

²⁶Chilumbu chakukuminina akanoŋeshayi, yowu kufwa.

²⁷Muloŋa mumukanda wajila aneli nawu, Anamwovwahishili yuma yejima nakuyisha mwishina danyendu yindi. Ochu chaneliyi nindi anamwovwahishili yuma yejima, hiyanateni niwamwovwahishilili yuma yejimaku.

²⁸Chakela yuma yejima yinamwovwahili dehi yena, henohu niyomweni Mwana nawa wakamwovwahila Mukwakwovwahisha yuma yejima; kulonda Nzambi akekali diyi hohu kanka windi chikupu, mwejima.

²⁹Neyi nehi, indi awa apapatishilaŋawu afu analondidi? Neyi afu hiyakayisaŋulaku, ayipapatishilaŋadi?

³⁰Iku kufwa kutwakeŋa aŋa kumona hefuku hefuku, tukukumwenadi?

³¹Enu ana kwetu, nukuyileja chakola, nanochu chinadisambilaŋa hansaŋu yenu mudi Kristu Yesu Mwanta wetu, nami nafwaŋa hefuku hefuku.

³²Chinalwili kuEfwesesa neyi chalwaŋawu antu nawanyama ayisumi, chikunheteshadi neyi afu hiyakuyisaŋulaku? Komana tukumini dakudya nakunwa, muloŋa kumadiki tukufwa.

³³Bayi ayidimbaku; kudikunda nawantu atama kwatamishaŋa maana amawahi.

³⁴Tonenu mwikali aloŋa, mubuli kuvulumuna; muloŋa kudi antu amu hiyamwiluka Nzambuku. Chinahoshi ichi nalondi kuyitiyisha nsonyi.

³⁵Muntu wumu wukwihula nindi, Afu akuyisaŋula ŋahi? akenza namujimba wudi ŋahi?

³⁶Eyi wabula maana, oyu yiwukutumba, chiŋa yisambili kufwa kulonda yihandi.

³⁷Ninoyu mbutu yiwukutumba, hiwukutumba chuma chamba kekalaku, chiŋa inawu dadeni, hela datidiku hela dambutu yacheŋi.

³⁸Ilaŋa Nzambi hakuyimenesha mwakeŋa elayi yomweni, mbutu namwayu, mbutu namwayu.

³⁹Nyijimba[2] yejima hinyijimba yoyimuku; kudi yawantu, kudi nyijimba yacheŋi yawanyama, kudi nyijimba yacheŋi nawa yawatujila, niyacheŋi yawanshi.

⁴⁰Kudi yuma yamwiwulu, niyuma yahanu hamaseki. Kudi kuwaha kwachuma chamwiwulu, kudi kuwaha kwacheŋi kwachuma chahanu hamaseki.

⁴¹Kudi kuwaha kwetaŋwa, kudi kuwaha kwacheŋi kwakakweji, nikuwaha kwacheŋi kwatutumbwa; muloŋa nitutumbwa twaambuka, aka nakuwaha kwaku, aka nakuwaha kwaku.

⁴²Dimu mwakasaŋulawu niafu. Akutumbawu nakutoka akamusaŋula nákubula kutoka.

⁴³Akutumbawu nakusawuka akamusaŋula nakulema. Akutumbawu nákubula Ŋovu akamusaŋula naŋovu.

⁴⁴Mujimba waheseki wakutumbawu, akawusaŋula himujimba waspiritu. Kwekala mujimba waheseki, kwekala nawa mujimba waspiritu.

⁴⁵Dichi anasoneki nawa nawu, Adama watachi welili muntu wawumi; Adama wakukuminina welili spiritu wahandishaŋa.

⁴⁶Waheseki diyi wasambilaŋa, bayi waspirituku, himukulondela waspiritu.

⁴⁷Muntu watachi wahamaseki hilunkuŋu; muntu wamuchiyedi wamwiwulu.

⁴⁸Chineli muntu wahamaseki hilunkuŋu, chochaduwu ninawa ahamaseki nawa; chekalayi wamwiwulu, dichi chaduwu ninawa amwiwulu nawa.

⁴⁹Chitunekali mwekalayi muntu wahamaseki, dimu mutwakekalila nawa neyi chekalayi muntu wamwiwulu.

⁵⁰Ichi dinu enu ana kwetu, nukuhosha nami mujimba waheseki hiwukutwesha kuswana wanta waNzambi uku; hela kutoka hikukuswana kubula kutokaku.

⁵¹Tiyenu niyileji nsaŋu yajindawu. Wejima wetu hitwakakama tuluku, ilaŋa akatu balumuna wejima wetu;

⁵²hohenohu, mukulabula kwadisu, hampùŋa yakukuminina. Muloŋa mpùŋa yakavuma, niafu akayisaŋula nákubula kutoka, ninetu akatu balumuna.

⁵³Muloŋa ichi chatokaŋa chiŋa chakavwala[3] kubula kutoka, niniwu wafwaŋa chiŋa akavwala kubula kufwa.

⁵⁴Ichi chatokaŋa chichakavwala kubula kutoka, niniwu wafwaŋa chakavyalayi kubula kufwa, henohu dihu dinu hakalumbuluka ichi chanasonekuwu nawu, Mushindu wunaminyi kufwa.

⁵⁵Eyi kufwa, mushindu weyi wowudihi? Eyi kufwa, kusumana kweyi kwokudihi?

⁵⁶Imuna yakufwa yoyi nshidi; Ŋovu yanshidi nshimbi.

⁵⁷Tusakililenu Nzambi watwimikilaŋa mushindu mudi Mwanta wetu Yesu Kristu.

⁵⁸Dichi enu ana kwetu twakeŋa a, ikalenu akola mbe chakadi kuswŋiewa. Swejenu kukalakala mudimu waMwanta mafuku ejima, muloŋa mweluka dehi kukalakala kwenu kumwakabakanaŋa mudi Mwanta hikwamukunkulwayuku.