Read MUKANDA WANZAMBI 1 Makorinte 16 Bible Online

1 Makorinte 16 - MUKANDA WANZAMBI bible

1 Makorinte 16

¹Nsaŋu yakupompesha yamukunkulu yakukwasha nachu akwakujila. Munalejeleli yipompelu yamuŊalija, dimu mumukwila ninenunawa.

²Ifuku damulungu damuchimu didu dimukutentekela hambadi mali wejima wenu, iwu mwanaheteliyi, iwu mwanaheteliyi, kulonda chinakenza nakawani yakupompesha dehi.

³Chinakashika nakatemesha antu imukwiteja munyikanda yenu, akatwali yamukunkulu yenu kuYerusalema.

⁴Neyi chakawaha kuya ninami, nakaya nawu.

⁵Ami nakenza kudenu neyi nahiti dehi muMasidoniya, muloŋa chalala dimu nakahitila.

⁶Kwiji nakashakama nenu hela kuchelukilaku noŋa, kulonda mwakanshinji kŋuku munjila yami kwejima kunakaya.

⁷Hinakeŋi kuyimona katataka chakuhita munjilaku; muloŋa nakuhweleli nami, neyi Nzambi neteji nakashakama nenu mafuku.

⁸Chiŋa nakalabila kuEfwesesa nichakashika pentekosta

⁹muloŋa chenzelu chanyidimu cheneni chinaŋenzulukili; kudi nawa ayilumbu amavulu.

¹⁰Neyi Timotewu wakashika oku, akashakami nanenu chakadi woma; muloŋa wakalakalaŋa mudimu waMwanta neyi chinelaŋa ami nawa.

¹¹Bayi amusekesha kudi muntuku. Ilaŋa mwakamushinjikŋaŋaku nawa chachiwahi munjila yindi, kulonda akenzi kudami; muloŋa nidi nakumutalila nami wakenza hamu nawana kwetu.

¹²Nsaŋu yamana kwetu Apolosi. Namulembeleli nankashi nami enzi kudenu nawana kwetu, ilaŋa yena hanakeŋi kwinza oku katatakaku; nindi wakenza hakamuwahila kwinza.

¹³Tonenu, imanenu chakola mukukuhwelela, dikwatishenu jawuyala, ikalenu naŋovu.

¹⁴Yuma yejima yimukwila, yilenu mukukeŋa.

¹⁵Enu ana kwetu, muneluki akwetala daSetefwanasi, diwu nyikabu yamu Akaya yatachi; muneluki chanashuwu muchima kumudimu wakukalakela akwakujila.

¹⁶Dichi nayilembeleli nami mwovwahilaŋa wena adochu, niantu ejima akwashaŋa mumudimu ni kukabakana.

¹⁷Natiyi kuwaha chanenzuwu aSetefwanasi naFwotunatu niAkayikusi, muloŋa wena anaŋilili yimwabulili kuŋililenu.

¹⁸Wena aneli atulisha muchima wamami, amilisha nawa nimuchima wenwenu. Dichi tambulenuŋa antu adochu.

¹⁹Yipompelu yamuAsiya yinayimwishi. Akwila naPirisila anayimwishi nankashi mudi Mwanta, nichipompelu chekala mwitala dawu.

²⁰Ana kwetu ejima anayimwishi. Dimwishenu muntu namukwawu nachikasa chajila.

²¹Ami Pawulu, hinukusoneka kwimwishiku nachikasa chamami aweni.

²²Muntu wabula kukeŋa Mwanta ekali washiŋewa. Mwanta hakwinza.

²³Luwi lwaMwanta Yesu Kristu lwikali nanenu.

²⁴Kukeŋa kwami kwikali nanenu ejima mudi Kristu Yesu. Amena.